Сардори хадамоти истихборотии «Толибон» бо ҳашт аъзои ин гурӯҳ дар вилояти Балх маҳв карда шуданд

ДУШАНБЕ, 16.04.2021 /АМИТ «Ховар»/. Аҷмал «Мошак», сардори хадамоти истихборотии «Толибон», ҳамроҳ бо ҳашт ҷангҷӯи дигари ин гурӯҳ дар вулусволии Балхи вилояти Балх кушта ва панҷ нафари дигар маҷрӯҳ шуданд, хабар медиҳад АМИТ «Ховар» бо истинод ба сомонаи “8 Субҳ” 8am.af.

Корпуси низомии 209-уми «Шоҳин» бо нашри хабарномае гуфтааст, ки Аҷмал «Мошак» рӯзи чаҳоршанбе (14 апрел) дар деҳаи Ҳусейнхели вулусволии Балх ду шаҳрванди ғайринизомиро ба қатл расонид. Пас аз ин маҳали будубоши ӯ аниқ ва ҳадафи ҳамлаҳои ҳавоӣ қарор гирифт.

Дар хабарнома омадааст, ки дар натиҷаи ҳамлаи қувваҳои ҳавоӣ сардори хадамоти истихборотии «Толибон» Аҷмал «Мошак» ҳамроҳ бо ҳашт ҷангҷӯи ин гурӯҳ кушта ва панҷ нафари дигар шадидан захмӣ шудаанд.

Дар  хабарномаи Корпуси низомии 209-уми «Шоҳин» қайд шудааст, ки  Аҷмал «Мошак» дар куштори ҳадафманди низомиёни неруҳои мусаллаҳ ва кормандони ҳукумат дар вилояти Балх даст дорад.

Дар хабарнома инчунин омадааст, ки Аҷмал «Мошак» фаъолияти чандин гурӯҳҳои террористиро роҳбарӣ мекард ва дар куштори ҳадафманди кормандони зан дар вилояти Балҳ ва доктор Солеҳ Самим, сардухтури Корпуси низомии 209-уми «Шоҳин» чанд рӯз қабл нақши калидӣ дошт.