ФУТБОЛ. 29 май дар Шарҷа бозии дӯстонаи дастаҳои мунтахаби Тоҷикистон ва Тайланд баргузор мегардад

ДУШАНБЕ, 26.05.2021 /АМИТ «Ховар»/. Дастаи мунтахаби  Тоҷикистон оид ба футбол бозии навбатии дӯстонаашро дар доираи омодагӣ ба бозиҳои ҷамъбастии интихобӣ ба Чемпионати ҷаҳон-2022 29 май доир мекунад. Дар ин рӯз шогирдони Усмон Тошев дар Варзишгоҳи Халид ибни Муҳаммад дар Шарҷа (АМА) ба муқобили  дастаи мунтахаби  Тайланд бозӣ мекунанд. Вохӯрии дастаҳо соати 21:45 бо вақти Душанбе оғоз мешавад. Дар ин бора шореҳи варзиши АМИТ «Ховар» Меҳрони Қурбон бо истинод ба Федератсияи футболи Тоҷикистон иттилоъ медиҳад. 

24 май аввалин  бозии дӯстонаи дастаи   мунтахаби футболи Тоҷикистон  бо дастаи мунтахаби Ироқ дар Варзишгоҳи   «Ал-Файҳ»-и Ироқ хеле ҷолиб баргузор гардида, бо ҳисоби мусовӣ — 0:0 анҷом  ёфта буд.

Ҳарду даста  дар аввалин бозии дӯстонаи худ барои задани гол хеле кӯшиш карданд, аммо натавонистанд ба дарвозаи якдигар тӯб ворид намоянд. Ҳамин тавр, ин рақобати ҷолиб  бидуни гол хотима ёфт.

Ин бори дуюм аст,  ки дастаҳои мунтахаби  Ироқ ва Тоҷикистон байни ҳам вомехӯранд. Дар бозии аввал, ки 3 августи соли 1999 дар доираи мусобиқаи интихобии Ҷоми Осиё-2000 дар шаҳри  Душанбе  сурат гирифта буд, дастаи мунтахаби Ироқ бо ҳисоби 2:1 ғалаба карда буд. Голи дастаи мунтахаби  Тоҷикистонро он вақт Тоҳир Муъминов ба нишон расонида  буд.

Бозии рафиқона

Ироқ – Тоҷикистон – 0:0

Ҳайати дастаи мунтахаби Тоҷикистон: Рустам Ятимов, Ваҳдат Ханонов, Давронҷон Эргашев, Аҳтам Назаров, Манучеҳр Сафаров, Абдулмуъмин Забиров (Зоир Ҷӯрабоев, 46), Муҳаммадҷон Раҳимов (Нуриддин Ҳамроқулов, 59), Эҳсони Панҷшанбе, Комрон Турсунов (Илҳом Баротов, 82), Шериддин Бобоев, Рустам Соиров.