Қисмати «Б»-и бинои Беморхонаи марказии ноҳияи Нуробод – таваллудхона мавриди истифода қарор мегирад

НУРОБОД, 31.05.2021 /АМИТ «Ховар»/. Бо мақсади  дар сатҳи баланд пешвоз гирифтани 30-солагии Истиқлоли давлатӣ  дар арафаи ин ҷашни миллӣ  қисмати «Б»-и  бинои беморхонаи марказии ноҳияи Нуробод мавриди баҳрабардорӣ қарор  дода мешавад. Бинои мазкур барои таваллудхонаи марказии ин ноҳияи кӯҳистони мамлакат пешбинӣ шудааст.

Масъулини мақомоти иҷроияи ҳокимияти давлатии ноҳияи Нуробод ба хабарнигори АМИТ “Ховар” Субҳониддини Маҳмуд гуфтанд, ки корҳои пардозкунии қисмати “б”-и  беморхонаи марказии шаҳраки Дарбанд  соли сипаришуда  оғоз гардидааст. Айни замон дар қисмати берунии бино  корҳои рангуборкунӣ ба анҷом расида, чунин амал  дар дохили бино  ва  корҳои ободонию сабзазоркунӣ дар атрофи он бомаром идома доранд. Маблағгузори иншооти мазкур  Вазорати тандурустӣ ва ҳифзи иҷтимоии аҳолии Ҷумҳурии Тоҷикистон  буда, корҳои сохтмонии онро  ҶДММ “Рамзес” ба ӯҳда дорад.

Ёдовар мешавем, ки дар ноҳияи Нуробод дар ҳамкорӣ бо вазорату идораҳо, сармоягузорон ва  соҳибкорону сокинон  дар доираи ҷашни бузурги 30-солагии Истиқлоли давлатӣ 248 иншооти таъйиноти  гуногунро бунёд мешавад. Аз ин теъдод  185 иншоот   мавриди баҳрабардорӣ қарор гирифта,  корҳои сохтмонӣ дар 63 адади он  идома дорад.

Тибқи иттилои масъулин,  ба ҳолати якуми майи соли равон дар ин иншоот 246 ҷойҳои кори доимӣ ва мавсимӣ муҳаё гардидаанд.

АКС аз муаллиф