СААД аз хуруҷи неруҳои ИМА аз Афғонистон нигарон аст — дар ин бора дабири кулли созмон дар Душанбе изҳор кард

ДУШАНБЕ, 20.05.2021 /АМИТ «Ховар»/.  Созмони Аҳдномаи Амнияти Дастаҷамъӣ (СААД) аз хуруҷи неруҳои Амрико аз Афғонистон нигарон аст. Тавре дабири кулли СААД дирӯз дар Душанбе, ки дар он ҷо дар ҷаласаи Шӯрои вазирони СААД ширкат дошт, зикр кард, вазъи кунунӣ ба ҳалли мусолиматомези низоъ дар Афғонистон таъсир хоҳад гузошт.

«Оғози хуруҷи неруҳои амрикоӣ ва қитъаҳои низомии НАТО аз онҷо, мутаассифона, ба ҳаллу фасли сулҳомези низои дохилиафғонӣ умедвор намекунад», — гуфт Зас пас аз мулоқот.

Ёдовар мешавем, ки Иёлоти Муттаҳида ва НАТО моҳи октябри соли 2001 неруҳои худро ба Афғонистон ворид карданд.

Ҳамлаи террористӣ ба бурҷҳои дугоник дар Ню — Йорк, ки қариб 3 ҳазор нафар кушта шуданд, сабаби ин амалиёти низомӣ гардид.

Ҳадафи асосии маъракаи афғонии ИМА сарнагун кардани режими «Толибон», маҳв сохтани раҳбари ташкилоти террористии «Ал-Қоида» (мамнӯъ дар қаламрави Тоҷикистон, Россия ва як қатор кишварҳои дигар) Усома бин Лодин ва озод кардани ҷумҳурӣ аз террористон буд.

Ҷанги Афғонистон ба Иёлоти Муттаҳида хеле гарон афтод. Зиёда аз 2 ҳазор сарбози амрикоӣ қурбон ва беш аз 20 ҳазор низомиён маҷрӯҳ шуданд. Тибқи иттилои расмӣ, дар ин маърака тақрибан 777 млрд доллар сарф шудааст, аммо таҳлилгарон дар бораи масрафи 2 триллион доллар мегӯянд.

Аз 1 май Иёлоти Муттаҳида хуруҷи фаъоли неруҳояшро аз Афғонистон оғоз кард. Аз ибтидо, ин раванд бояд то 11 сентябр ба анҷом мерасид. Аммо, бинобар хашми намояндагони ҷунбиши радикалии «Толибон», сарбозон метавонанд то нимаи моҳи июл ҷумҳуриро тарк кунанд.

АКС аз бойгонӣ