Шоҳҷоизаи Мусобиқаи ҷумҳуриявӣ оид ба гӯштини миллӣ дар мавзеи Чилчанори Ховалинг насиби кӣ гардид?

Май 17, 2021 13:11

ДУШАНБЕ, 17.05.2021 /АМИТ «Ховар»/. Беш аз 700 нафар варзишгарони наврас, ҷавон, собиқадорон ва инчунин бонувон аз тамоми минтақаҳои Тоҷикистон ва кишварҳои хориҷӣ, назири Россия ва Ӯзбекистон дар Мусобиқаи кушоди ҷумҳуриявӣ оид ба гӯштини миллӣ, ки 16 май дар мавзеи зебоманзар ва хушобуҳавои Чилчанори  ноҳияи Ховалинг доир гардид, иштирок ва қувваозмоӣ намуданд. Ин мусобиқаи варзишии сатҳи баланд бо ташаббус ва дастгирии Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе Рустами Эмомалӣ, роҳбарияти Вазорати корҳои дохилии Ҷумҳурии Тоҷикистон, Федератсияи миллии «Гӯштингирӣ»-и Тоҷикистон ташкил карда шуд.

Хабарнигори АМИТ «Ховар», ки дар ин мусобиқаи варзишии ҷумҳуриявӣ иштирок дошт, иттилоъ медиҳад, ки ҷараёни баргузории мусобиқаи ҷумҳуриявии гӯштини миллиро беш аз  50 ҳазор нафар мухлисону ҳаводорон ва дӯстдорони гӯштини миллӣ тамошо намуданд. Мусобиқаи кушоди ҷумҳуриявии гӯштини миллӣ ба 30-юмин солгарди ҷашни  Истиқлоли давлатии Ҷумҳурии Тоҷикистон ва Рӯзи ҷавонони Тоҷикистон, ки 23 май таҷлил мешавад, бахшида шуда, ҳадафаш эҳё ва рушди варзиши суннатии халқи тоҷик, бахусус гӯштини миллӣ мебошад, ки таърихи беш аз панҷҳазорсола дорад. Ба беҳтарин паҳлавонон, ки дар майдон қувва озмуданд, дар  маросими ботантана маблағҳои пулӣ, туҳфаҳои арзишнок, аз ҷумла, қолин, мошинаи ҷомашӯӣ, телевизор, гӯсфанд, гов, шутур, асп ва шоҳҷоизаи мусобиқа –мошини сабукрави тамғаи хориҷӣ тақдим гардид.

Барои мукофоти якум- Шоҳҷоиза паҳлавони номдори Ҷумҳурии Тоҷикистон Темур Раҳимов бо паҳлавони Ҷумҳурии Ӯзбекистон Муҳсин Ҳисомиддинов қувваозмоӣ намуд. Варзишгари тоҷик Темур Раҳимов ғолиб омада, сазовори  шоҳҷоизаи аввали мусобиқа-мошини  тамғаи хориҷӣ гардид. Барои дарёфти мукофоти олии дуюм-Шоҳҷоиза паҳлавонони Федератсияи Россия  ва Ҷумҳурии Ӯзбекистон Валерий Ендовитский ва Зоид Ҳусейнов қувва озмуданд, ки дар натиҷа  паҳлавони ӯзбекистонӣ Зоид Ҳусейнов ба гирифтани Шоҳҷоизаи дуюми мусобиқаи кушоди гӯштини миллӣ-мошини тамғаи хориҷӣ мушарраф гардид.

Баъд  аз натиҷагирии се даври мусобиқа паҳлавони тоҷик Хуршед Маҷидов ва варзишгари ӯзбекистонӣ Зоид Ҳусейнов ҳаққи ба даст овардани Шоҳҷоизаи сеюмро пайдо карданд. Аммо  бинобар  сабаби даст кашидани паҳлавони ӯзбекистонӣ аз қувваозмоӣ Шоҳҷоизаи сеюми мусобиқаи кушоди ҷумҳуриявӣ оид ба гӯштини миллӣ –мошини сабукрави тамғаи хориҷӣ ба гӯштингири Маъруфи тоҷик Хуршед Маҷидов сазовор дониста шуд.

Тавре дар суҳбати ихтисосӣ бо хабарнигори АМИТ «Ховар» муовини аввали директори Муассисаи давлатии телевизиони «Варзиш» Алӣ Шарифов, ки шореҳи марказии Мусобиқаи кушоди ҷумҳуриявӣ оид ба гӯштини миллӣ дар мавзеи Чилчанори ноҳияи Ховалинг буд, иброз дошт, ки баргузории чунин мусобиқаҳои варзишии сатҳи баланд на танҳо ба эҳё ва рушду такомули варзиши суннатӣ, хусусан гӯштини миллӣ, балки ба таҳкими дӯстиву рафоқат, бародарӣ ва ваҳдати тамоми сокинони Тоҷикистон мусоидат менамояд, зеро дар як майдони бузург  ҳамдигарро ба оғӯш гирифтан ва қувваозмоӣ намудани паҳлавонон рамзи дӯстиву бародарӣ ва  далериву мардонагӣ буда, атрофи як хон ҷамъ гардидану таом хӯрдани намояндагони тамоми минтақаҳои Тоҷикистон-ин рамзи ваҳдат ва сарҷамъии сокинони минтақаҳои гуногуни Тоҷикистон мебошад.

Марзия САИДЗОДА,
АМИТ «Ховар»

                                                     Душанбе-Ховалинг-Душанбе

 АКСҲО: АМИТ «Ховар» ва ВКД

Май 17, 2021 13:11

Хабарҳои дигари ин бахш

Таҳкими ҳамкорӣ байни Тоҷикистон ва вилояти Форси Эрон дар бахши ҷавонон ва варзиш баррасӣ гардид
Дар Ҳисор мусобиқаи «CAFA Nations Сup 2025» дар гурӯҳи «В» оғоз мешавад
Ҳайати Кумитаи кор бо ҷавонон ва варзиши Тоҷикистон бо Академияи Кумитаи миллии олимпии Эрон шинос шуд
Барномаи иҷроии ҳамкорӣ байни Тоҷикистон ва Эрон дар соҳаи варзиш ва ҷавонон ба имзо расид
Бо иштироки ҷавонони Тоҷикистон ва Эрон ҳамоиш доир гардид
Дар Теҳрон густариши ҳамкории Тоҷикистон ва Эрон дар самти ҷавонон ва варзиш баррасӣ гардид
Ғолиби «Ҷоми Раиси ВМКБ» аз намуди волейбол муайян карда шуд
«Tojiktelecom» сарпарасти расмии мусобиқаи бонуфузи байналмилалии Осиёи Марказӣ ва Ҷанубӣ — CAFA Nations Cup 2025 гардид
ФУТБОЛ. Бозии ниҳоии Ҷоми Тоҷикистон-2025 байни «Регар-ТадАЗ» ва «Эсхата» дар Хуҷанд доир мегардад
Дар Тоҷикистон лоиҳаи «Football For Schools»-и ФИФА амалӣ карда мешавад
ҶОМИ ТОҶИКИСТОН. Дастаҳои футболи «Регар-ТадАЗ» ва «Эсхата» ба финали ин мусобиқа роҳ ёфтанд
Дар вохӯрии дастаҳои Тоҷикистон ва Ҳиндустон автомобили BYD ба бозӣ гузошта мешавад