Мулоқоту музокироти сатҳи олии Тоҷикистон ва Туркманистон

Август 4, 2021 15:30

ДУШАНБЕ, 04.08.2021 /АМИТ «Ховар»/. Масоили ҳамкории ду кишвар дар мулоқоти хоссаи сарони давлатҳо оғоз гардида, дар музокироти сатҳи олӣ бо иштироки ҳайатҳои расмии Тоҷикистон ва Туркманистон идома ёфт.

Президенти мамлакат муҳтарам Эмомалӣ Раҳмон дар оғоз ба Сарвари кишвари мизбон — Гурбонгулӣ Бердимуҳаммадов барои даъват ҷиҳати анҷом додани сафари давлатӣ ба Туркманистон изҳори сипос намуда, иброз доштанд, ки мо тарафдори рушди ҳамаҷонибаи муносибатҳои дӯстӣ ва ҳамкории Тоҷикистон бо Туркманистон мебошем.

Таъкид гардид, ки давоми солҳои истиқлолият миёни Тоҷикистон ва Туркманистон заминаи боэътимоди ҳамкорӣ дар соҳаҳои сиёсат, тиҷорат, иқтисод, фарҳангӣ-гуманитарӣ ба вуҷуд омадааст ва дар асоси ин дастовардҳо ҳамкории давлатҳо ба сатҳи шарикии стратегӣ бароварда шуд.

Дар ҷараёни мулоқот маҷмӯи васеи масъалаҳои кунунии ҳамкории ду кишвар, инчунин якчанд масъалаҳои мубрами рӯзномаи минтақавӣ ва байналмилалӣ баррасӣ гардид.

Изҳори умед карда шуд, ки ҳамкории мутақобилан судманди байни кишварҳо минбаъд низ ба нафъи халқҳои бародар фаъолона рушд хоҳад кард.

Барои рушди ҳамкории сиёсӣ ва тиҷоратӣ — иқтисодӣ роҳандозии тадбирҳо оид ба татбиқи Барномаи байниҳукуматии ҳамкории тиҷоративу иқтисодӣ то соли 2023, инчунин ташкили Харитаи роҳ оид ба афзоиши тиҷорат дар ду соли оянда зарур шумурда шуд.

Дар мулоқот таъкид гардид, ки баҳрабардорӣ аз имконоти васеи соҳаҳои саноат, нақлиёт, ташкили мусофиркашонӣ дар роҳи оҳан ва хатсайрҳои ҳавоӣ, ташкил ва боло бурдани ҳаҷми ҳамлу нақли байналмилалии боркашонӣ бо мошин ва роҳи оҳан тавассути қаламрави Туркманистон, истифодаи бандари байналмилалии баҳрии «Туркманбошӣ» ҳамчун маркази логистикии борҳои транзитии Тоҷикистон ба манфиати ҳарду ҷониб хоҳад буд.

Зимни мулоқот оид ба рушди ҳамкорӣ дар соҳаи кишоварзӣ, таъсиси корхонаҳои муштараки кишоварзӣ, аз ҷумла дар бахши зироаткорӣ ва чорводорӣ бо истифодаи имконоту иқтидори мавҷуда табодули афкор карда шуд.

Рушди ҳамкории дуҷониба дар соҳаҳои фарҳангӣ — гуманитарӣ, маориф, тандурустӣ ва густариши робитаҳои байниминтақавӣ, аз ҷумла байни вилояти Суғди Тоҷикистон ва вилояти Ахали Туркманистон аз мавзуъҳои дигари мулоқоту музокироти сатҳи олии Тоҷикистон ва Туркманистон буд, ки ҷонибҳо барои татбиқи онҳо омодагӣ ва ҳавасмандии худро изҳор доштанд.

Дар рафти мулоқот ҷонибҳо масъалаҳои ҳамкории судманди кишварҳоро дар чаҳорчӯби ташкилоту созмонҳои бонуфузи минтақавию байналмилалӣ, аз ҷумла Созмони Милали Муттаҳид, Иттиҳоди Давлатҳои Мустақил, Фонди байналмилалии наҷоти Арал, Созмони Амният ва ҳамкорӣ дар Аврупо ва дигар сохторҳо муҳокима карданд.

Зимни баррасии мушкилоти амниятии минтақавӣ, ба таҳдидҳои асосӣ, аз қабили терроризми байналмилалӣ, экстремизм, радикализми динӣ ва ҷинояткории муташаккили фаромиллӣ, аз ҷумла қочоқи маводи мухаддир ва вазъи душвори муқовимати дохилӣ дар Афғонистон таваҷҷуҳ зоҳир карда шуд.

Дар охири музокирот Президенти мамлакат муҳтарам Эмомалӣ Раҳмон аз Президенти Туркманистон Гурбонгулӣ Бердимуҳаммадов даъват ба амал оварданд, ки дар вақти барояшон мувофиқ бо сафари ҷавобӣ ба Тоҷикистон ташриф оранд.
Мулоқоту музокироти сатҳи олии Тоҷикистону Туркманистон 04.08.2021

Август 4, 2021 15:30

Хабарҳои дигари ин бахш

Идомаи сафари давлатии Президенти Ҷумҳурии Тоҷикистон Эмомалӣ Раҳмон дар Туркманистон ва боздид аз бандари баҳрии байналмилалии Туркманбошӣ
Изҳороти муштараки Президенти Ҷумҳурии Тоҷикистон Эмомалӣ Раҳмон ва Президенти Туркманистон Гурбонгулӣ Бердимуҳамедов
Изҳороти матбуотии Президенти Ҷумҳурии Тоҷикистон Эмомалӣ Раҳмон аз рӯйи натиҷаҳои мулоқоту музокирот бо Президенти Туркманистон Гурбонгулӣ Бердимуҳамедов дар доираи сафари давлатӣ ба Туркманистон
Президенти Ҷумҳурии Тоҷикистон Эмомалӣ Раҳмон дар майдони Маҷмааи «Ёдгории миллӣ» гулчанбар гузоштанд ва аз Осорхонаи «Муқаддасоти Ватан»-и Туркманистон боздид намуданд
Маросими имзои санадҳои нави ҳамкорӣ миёни Тоҷикистон ва Туркманистон
Сафари давлатии Президенти Ҷумҳурии Тоҷикистон Эмомалӣ Раҳмон дар Туркманистон оғоз гардид
Президенти Ҷумҳурии Тоҷикистон Эмомалӣ Раҳмон бо сафари давлатӣ вориди шаҳри Ашқобод — пойтахти Туркманистон шуданд
Пешвои миллат Эмомалӣ Раҳмон ба Сарвазири Ҷумҳурии Арманистон Никол Пашинян барқияи табрикӣ ирсол намуданд
Сафари давлатии Президенти Ҷумҳурии Тоҷикистон Эмомалӣ Раҳмон ба Туркманистон
Бо розигии Пешвои миллат Эмомалӣ Раҳмон Хусрав Нозирӣ ба вазифаи Дабири кулли Созмони ҳамкориҳои иқтисодӣ таъйин гардид
Қарори Ҳукумати Ҷумҳурии Тоҷикистон
Фармонҳои Президенти Ҷумҳурии Тоҷикистон

Хабарҳои муҳимтарин

Маводҳои таҳлилӣ