Дар Ҳисор беҳтарин донандагони Кодекси андоз ғолиби озмуни шаҳрӣ гардиданд

ДУШАНБЕ, 18.10.2021 /АМИТ «Ховар»/. Дар шаҳри Ҳисор озмуни шаҳрии «Маданияти андозсупорӣ – баҳои бофарҳангии ҷомеа» ҷамъбаст гардида, 17 нафар ғолибон бо  Сипосномаи Мақомоти иҷроияи ҳокимияти давлатии шаҳри Ҳисор, туҳфаҳои хотиравӣ ва маблағҳои пулӣ сарфароз гардонида шуданд.

Аз Мақомоти иҷроияи ҳокимияти давлатии шаҳри Ҳисор ба АМИТ «Ховар» иттилоъ доданд, ки озмуни шаҳрии «Маданияти андозсупорӣ – баҳои бофарҳангии ҷомеа» дар асоси фармоиши Кумитаи андози назди Ҳукумати Ҷумҳурии Тоҷикистон, тибқи қарори Раиси шаҳри Ҳисор бо мақсади тақвияти маданияти андозсупорандагон гузаронида шуд.

Озмун аз рӯи номинаҳои «Андоз аз нигоҳи наврасон», «Расми беҳтарин», «Беҳтарин донандаи Кодекси андози Ҷумҳурии Тоҷикистон» доир гардида, дар он шумораи зиёди кормандони нозироти андоз, соҳибкорон, донишҷўёни литсею коллеҷҳо ва хонандагони муассисаҳои таҳсилоти ибтидоӣ, миёнаи асосӣ ва умумӣ иштирок намуданд.

     Акс  аз мақомоти иҷроияи  ҳокимияти  давлатии  шаҳри Ҳисор.