«ҶОМИ ТОМИРИС». Варзишгардухтарони тоҷик дар Мусобиқаи байналмилалӣ оид ба камонварӣ иштирок мекунанд

ДУШАНБЕ, 26.10.2021 /АМИТ «Ховар»/. Аз   27  то  29 октябр  дар шаҳри Самарқанди Ҷумҳурии Узбекистон нахустин Мусобиқаи байналмилалӣ оид ба камонварӣ миёни занон — «Ҷоми Томирис» баргузор мешавад, хабар дод намояндаи расмии Кумитаи миллии олимпии Тоҷикистон Умаралӣ Сафаралӣ ба шореҳи варзиши АМИТ «Ховар» Меҳрони Қурбон.

Дар мусобиқа ба ҷуз варзишгарони мизбон беш аз 50 варзишгар аз ҷумҳуриҳои Гурҷистон, Қазоқистон, Қирғизистон, Русия, Тоҷикистон ва Украина ширкат хоҳанд кард.  Барои иштирок дар Мусобиқаи  байналмилалӣ   оид ба камонварӣ миёни занон аз Ҷумҳурии Тоҷикистон  се варзишгар ва як мураббӣ ба   шаҳри Самарқанди  Ҷумҳурии Узбекистон  сафарбар гардиданд.

Дар мусобиқа варзишгарони бомаҳорати   тоҷик- Фирӯза Зубайдова, Заронаи Фирӯз ва Мавзуна Азимова, инчунин мураббии ботаҷриба Майрам Кантаева ширкат мекунанд.

Хотиррасон  мешавем, ки  мусобиқаи мазкур дар масофаи 70 метр – даври олимпӣ ба таври инфиродӣ ва даставӣ сурат мегирад.

Акс аз Кумитаи миллии олимпии Тоҷикистон