Афғонистон ба Тоҷикистон ваъда дод, ки қарзи ҳаққи неруи барқро бармегардонад

Ноябрь 18, 2021 12:19

ДУШАНБЕ, 18.11.2021 /АМИТ «Ховар»/. Корпоратсяи давлатии энергетикии Афғонистон (DABS) ваъда дод, ки дар кӯтоҳтарин муддат қарзи неруи барқро пардохт хоҳад кард, иттилоъ медиҳад шабакаи «Tolo news». 

Роҳбарияти DABS дар муроҷиати худ ваъда дод, ки қарзро бармегардонад. Сухан дар мавриди қарздорӣ дар назди кишварҳои Осиёи Марказӣ меравад. Шабака зикр менамояд, ки қарзи Афғонистон барои ҳаққи қувваи барқ тақрибан 62 миллион долларро ташкил медиҳад, ки аз ин миқдор $25 млн доллар ба Эрон, $11,1 млн доллар ба Тоҷикистон, $9,9 млн доллар ба Узбекистон ва $5 млн доллар ба Туркманистон рост меояд.

Ба иттилои манбаъ, ҳар моҳ Афғонистон барои неруи барқи воридшуда 22-25 млн доллар пардохт менамояд.

«DABS тасмим гирифтааст, то дар муддати кӯтоҳ қарзҳоро ба кишварҳои ҳамсоя пардохт намояд»,-иброз медорад шабака бо истинод ба гуфтаи раиси DABS Ҳикматуллоҳ Нурзай.

Тавре аз палатаи саноат ва маъдани Афғонистон иттилоъ доданд, соҳибони фабрикаҳо ва чанд корхонаи кишвар дар сурати қатъи неруи барқ аз ҷониби кишварҳои воридкунанда маҷбур мегарданд фаъолияташонро қатъ кунанд.

«Фаъолияти корхонаҳои истеҳсолӣ аз қувваи барқ вобастагии зиёд дорад, агар барқ набошад, мушкилот зиёд хоҳанд шуд»,-гуфт директори кулли палата Муҳаммад Карим Азимӣ.

Тавре сардори маркази матбуоти «Барқи тоҷик» Нозирҷон Ёдгорӣ хабар дод, Тоҷикистон яке аз содиркунандагони асосии неруи барқ ба Афғонистон мебошад.

Тибқи шартнома миёни «Барқи тоҷик» ва ширкати саҳомии афғонии «Да Афганистан Брешна Ширкат» (DABS), Тоҷикистон ба ҷониби Афғонистон дар мавсими зимистон ҳудуди 25-30 мегаватт неруи барқ интиқол медиҳад. Тобистон ширкат ба Афғонистон 500 мегаватт неруи барқ содирот менамояд.

Қаблан DABS ба кишварҳои ҳамсоя-содироткунандагони қувваи барқ-Узбекистон, Тоҷикистон, Туркманистон ва Эрон мактуб оид ба пардохти қарзи худ ирсол намуда буд.

Инчунин ширкати афғонӣ ба намояндагии СММ ҷиҳати кумак расонидан дар ҳалли ин мушкилот муроҷиат намудааст. Намояндагони DABS зикр намуданд, ки дар сурати набудани сарчашмаҳои сармоягузорӣ ба онҳо лозим меояд, то аз худи афғонҳо, навобаста аз вазъи зиндагияшон маблағро ҷамъоварӣ намоянд.

Вазъият аз он ҷиҳат мураккаб гаштааст, ки соли 2021 дар ҷумҳурӣ аз сабаби хушксолӣ захираҳои энергетикӣ маҳдуд шуданд.

Нурзай изҳор дошт, ки ҳоло дар кишвар камбуди неруи барқ нест, аммо дар сурати қатъи он аз ҷониби Осиёи Марказӣ вазъият бад мешава.

АКС: news.myseldon.com

Ноябрь 18, 2021 12:19

Хабарҳои дигари ин бахш

Дар Эстония Хонаи савдои Тоҷикистон таъсис дода мешавад
Намояндагони Тоҷикистон дар «Аirspace world 2024» дар Женева иштирок намуданд
Роҳбари хоҷагии деҳқонии «Бобои Носир»: «Истифодаи оқилонаи 7,5 гектар замин ва даромад аз он дар баланд гардидани сатҳи зиндагии 5 оила мусоидат намуд»
Деҳқонони ноҳияи Мастчоҳ имсол дар майдони зиёда аз 23 ҳазор гектар кишту парвариши зироати кишоварзиро ба нақша гирифтаанд
Дар шаҳри Хуҷанд Намоишгоҳи X байналмилалии савдо «Суғд-2024» доир мегардад
«РОҲ БА СӮИ ТИЁНШОН». Душанбе охири моҳи май мизбони конфронси байналмилалӣ мегардад
Соли 2023 ба буҷети шаҳри Гулистон аз ҳисоби хизматрасонии сайёҳӣ ва табобатӣ зиёда аз 40 миллион сомонӣ ворид шуд
Ҳоҷагидорони Кооперативи истеҳсолии «Сомон-Бохтар»-и ноҳияи Кӯшониён майдони парвариши лимӯро васеъ менамоянд
Сардхонаи муосири деҳоти «Файзи Истиқлол»-и ноҳияи Кӯшониён ба аҳолӣ хизмат мерасонад
«ТОҶИКИСТОН-2024». Дар Душанбе Намоишгоҳи байналмилалии универсалӣ доир мешавад
120 гектар замини канори деҳаи Ғӯсари шаҳри Панҷакент бо оби полезӣ таъмин мегардад
Масъалаи тезонидани корҳо оид ба тармим ва навсозии нақби «Истиқлол» дар Душанбе баррасӣ гардид