Имрӯз дар Душанбе даври шаҳрии Фестивали қаннодӣ ва ҳалвопазӣ ҷамъбаст гардид

Ноябрь 4, 2021 15:00

ДУШАНБЕ, 4.11.2021. /АМИТ «Ховар»/. Имрӯз дар Муассисаи давлатии «Боғи фарҳангиву фароғатии ба номи Абулқосим Фирдавсӣ» даври шаҳрии Фестивали қаннодӣ ва ҳалвопазӣ баргузор гардид, ки дар он аз рӯи номинаи «қаннодӣ» ҷойи аввал ба ҶДММ «Анас-ОА»-и ноҳияи Синои шаҳри Душанбе супорида шуд. Дар номинаи «ҳалвопазӣ» ҷойи аввалро соҳибкори инфиродӣ аз ноҳияи Шоҳмансур  Ҳокимой Шоева ба даст овард.

Ҳамчунин дар номинаи «қаннодӣ» ҷойи дуюм ба ҶДММ «Амирӣ» ва ҷойи сеюм ба намояндаи ноҳияи Исмоили Сомонӣ супорида шуд.

Дар номинаи ҳалвопазӣ ҷойи дуюмро намояндаи ноҳияи Фирдавсӣ сазовор гардида, ҷойи сеюм ба намояндаи ноҳияи Исмоили Сомонии шаҳри Душанбе тақдим гардид.

Бояд зикр намуд, ки дар фестивали мазкур роҳбарияту намояндагони мақомоти иҷроияи ҳокимияти давлатии шаҳри Душанбе, вазорату идораҳо, намояндагони корхонаву ширкатҳои қаннодӣ ва ҳалвопазии пойтахт иштирок намуданд.

Дар даромадгоҳи фестивал меҳмонону иштирокчиён аз намоиши навъҳои гуногуни маҳсулоти қаннодии чор ноҳияи пойтахт дидан намуда, ба намунаҳои беҳтарини онҳо баҳои баланд доданд.

Муовини Раиси шаҳри Душанбе Дилшод Одиназода иброз дошт, ки мақсад аз баргузории фестивали  мазкур- баланд бардоштани иқтидори истеҳсоли корхонаҳои саноатии пойтахт ва беҳтар намудани сифати истеҳсоли ватанӣ мебошад.

Зикр шуд, ки миллати тоҷик аз қадимтарин мардумони минтақаи Осиёи Марказӣ буда, дар ташаккули тамаддуни ҷаҳонӣ бо мероси бойи фарҳангии моддӣ ва ғайримоддӣ мақоми шоиста касб намудааст.

Зикр гардид, ки дар бахши омодасозии шириниву қаннодиҳо бонувони тоҷик маҳорати баланди кадбонугӣ дошта, хони идонаи ҷашнҳои миллии тоҷиконро бидуни шириниҳои гуногуни болаззати омоданамудаи занону духтарони  тоҷик тасаввур намудан ғайриимкон аст.

Бояд тазаккур дод, ки ҳунари қаннодиву ҳалвопазии тоҷикон таърихи куҳан дошта, дар тӯли ҳазорсолаҳо то имрӯз ташаккул ёфта истодааст.

Ҳалвопазӣ яке аз ҳунарҳои  аҷдодӣ  буда, он миёни мардуми тоҷик аз даврони қадим дар тӯю маъракаҳо ва дигар ҷашну маросим бо анвои  васеъаш омода карда мешавад.

Ҳалвоҳое, ки миёни мардуми тоҷик маъмуланд, инҳоянд: ҳалвои сафедак, ҳалвои сурх, ҳалвои  тар, ҳалвои ширӣ, ҳалвои кунҷидӣ, парварда, ҳалвои пашмак,  ҳалвои лавз,  ҳалвои бодомӣ, ҳалвои чормағзӣ, ҳалвои пистагӣ, ҳалвои печак, ҳалвои мағзӣ, ҳалвои регак, ҳалвои оби дандон, ҳалвои оби набот  ва ғайра. Бояд як нуктаро зикр намуд, ки бонувони тоҷик дар тўю маъракаҳояшон бештар  ҳалвоҳои сафедак ва  сурх  омода месозанд.

Сокини маҳаллаи Мир Саид Алии Ҳамадонии ноҳияи Синои шаҳри Душанбе Уғулой Мирзоева, ки дар фестивали мазкур навъҳои гуногуни ҳалворо пешкаши меҳмонону иштирокчиён гардонидааст, иброз дошт, ки ҳалворо тоҷикон, махсус  дар тӯю маъракаҳо ва ҷашну маросими хурсандиашон бештар рӯйи дастархон мегузоранд. Онро ҳамчун рамзи ширинии ҳаёт дар ҷашни арӯсӣ ва маросими дигар бо муроду орзуи нек ба соҳибҷашнҳо мечашонанд.

Ба зикри мавсуф, маъмултарин ҳалвои мардуми тоҷик ҳалвои сафедак ба шумор меравад, ки дар аксарияти шаҳру ноҳияҳои Тоҷикистон онро омода менамоянд. Таркиби ҳалвои сафедак аз равғани яхии  гӯсфанд  ё  равғани зард, орд ва хокаи шакар иборат мебошад.

Дар фарҷоми фестивал аъзои ҳакамони чорабинӣ ғолибонро  муайян намуда, ба онҳо аз  ҷониби мақомоти иҷроияи ҳокимияти давлатии шаҳри Душанбе диплому сипосномаҳо супорида шуданд.

Зарангези ЛАТИФ,
Мақсудҷон МУҲИДДИНҶОН,
АМИТ «Ховар»

АКСҲО: АМИТ «Ховар»

 

Ноябрь 4, 2021 15:00

Хабарҳои дигари ин бахш

Доир ба имконоти сайёҳӣ, заминаҳои воқеӣ ва дурнамои рушди шаҳри Душанбе ҳамоиш доир шуд
Ба 2500 нафар кӯдакони ятиму бепарастори пойтахт аз номи Раиси шаҳри Душанбе Рустами Эмомалӣ туҳфаҳои солинавӣ тақдим гардиданд
Ба зиёда аз 11 ҳазор нафар ниёзмандон кумакҳои Раиси шаҳри Душанбе Рустами Эмомалӣ тақдим шуданд
Имрӯз дар пойтахт Иҷлосияи ҳаштуми Маҷлиси вакилони халқи шаҳри Душанбе, даъвати шашум баргузор гардид
Дар Душанбе барномаҳои фарҳангии солинавӣ дар доираи маҳдуд гузаронида мешаванд
Дар Душанбе бахшида ба Соли нав ярмаркаҳои фурӯши маҳсулоти мавриди ниёзи аввал ташкил шудаанд
Дар Душанбе даври шаҳрии озмунҳои «Мураббии сол-2021», «Омўзгори сол-2021» ва «Хонандаи сол-2021» баргузор мегардад
ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар ноҳияи Синои пойтахт якчанд иншоот ба истифода дода шуд
«ДУШАНБЕ — ПОЙТАХТИ ФАРҲАНГИИ ИТТИҲОД-2021». Имрӯз дар Театри давлатии академии опера ва балети Тоҷикистон маросими натиҷагирӣ аз тадбирҳои андешидашуда доир гардид
«ДУШАНБЕ – ПОЙТАХТИ ФАРҲАНГИИ ИДМ-2021». Пагоҳ маросими расмии натиҷагирӣ аз тадбирҳои андешидашуда доир мегардад
Дар Душанбе тарабхонаи амрикоии зудхизматрасони KFC ифтитоҳ ёфт
Дар «Бозори Корвон»-и шаҳри Душанбе таваққуфгоҳи замонавӣ ифтитоҳ ёфт