Миссияи маҷозии ташхисӣ ва машваратии СУГ оид ба идоракунии захираҳои инсонӣ барои Хадамоти гумруки Тоҷикистон ба кор шурӯъ намуд

Декабрь 23, 2021 16:43

 ДУШАНБЕ, 23.12.2021 /АМИТ «Ховар»/. 22 декабр тариқи маҷозӣ миссияи ташхисӣ ва машваратии Созмони Умумиҷаҳонии Гумрук оид ба идоракунии захираҳои инсонӣ барои Хадамоти гумруки назди Ҳукумати Ҷумҳурии Тоҷикистон ба кор шурӯъ намуд, хабар доданд ба АМИТ «Ховар» аз Хадамоти гумрук.

Сардори Хадамоти гумрук, генерал — лейтенанти хадамоти гумрук Хуршед Каримзода изҳор дошт, ки масъалаи интихоб ва ҷобаҷогузории кадрҳо дар мақомоти гумрук яке аз масъалаҳои калидӣ ба шумор рафта, масъалаи мазкур зимни мулоқоту суханрониҳои Президенти Ҷумҳурии Тоҷикистон муҳтарам Эмомалӣ Раҳмон бо Дабири кулли Созмони Умумиҷаҳонии Гумрук Кунио Микурия мавриди баррасӣ қарор дошт.

Ҳадаф аз баргузории миссияи мазкур гузаронидани ташхиси идоракунии захираҳои инсонӣ дар асоси стандартҳои СУГ аст, ки самти стратегӣ, салоҳият ва профили кор, банақшагирӣ ва идоракунии самаранокӣ, омӯзиш, рушди касб, музди меҳнат ва имтиёзҳо буда, таъсис додани заминаҳои ҷорӣ намудани идоракунии муосири ба салоҳият асосёфтаи захираҳои инсонӣ дар асоси стандартҳои СУГ ва таҷрибаи беҳтарини байналмилалиро дар бар мегирад. Ҳамчунин арзёбии эҳтиёҷоти интиқодӣ ва камбудиҳои салоҳиятдор дар доираи Барномаи миёнамуҳлати рушди мақомоти гумруки Ҷумҳурии Тоҷикистон барои солҳои 2020-2024 низ аз ҳадафҳои дигари миссия ба шумор меравад.

Менеҷери барномаи рушди инсонии Созмони Умумиҷаҳонии Гумрук доктор Си Муҳаммад барои дар сатҳи баланд баргузор намудани чорабинии мазкур изҳори миннатдорӣ намуда, иброз дошт, ки миссия барои давлатҳои аъзои СУГ дар Осиёи Марказӣ аввалин буда, қадами асосӣ дар пешбурди фаъолияти кадрии мақомоти гумруки Ҷумҳурии Тоҷикистон саривақтӣ ба шумор меравад.

Намояндаи гумруки Ҷумҳурии Мардумии Чин, коршиноси аккредитатсияшудаи СУГ — доктор Ҳуа ТОНГ изҳори омодагии хешро барои такмил додани стратегияи рушди неруи инсонии мақомоти гумруки Ҷумҳурии Тоҷикистон баён дошта, тавсия ва пешниҳодҳои мушаххасро аз таҷрибаи кишвари хеш ва пешқадами ҷаҳонро барои пешбурди ин фаъолият пешниҳод намуд.

Ёдовар мешавем, ки 12 октябри соли 2021 дар шаҳри Брюссели Подшоҳии Белгия мулоқоти Президенти Ҷумҳурии Тоҷикистон муҳтарам Эмомалӣ Раҳмон бо Дабири кулли Созмони ҷаҳонии гумрук Кунио Микурия баргузор шуда буд.

Ҷонибҳо зимни мулоқот масъалаҳои мукаммалгардонии маъмурияти гумрук, низоми иттилоотии автоматикунонидашудаи он бо технологияҳои муосир, таҷдиди зерсохтори гумрук ва рушди иқтидори захираҳои инсониро дар соҳаи фаъолияти гумрукӣ муҳокима карданд. Дар ин зимн фаъол кардани ҳамкории судманд бо СУГ барои баланд бардоштани иқтидори касбии кормандони ниҳоди гумрукии Тоҷикистон зарур шумурда шуд.

Дар мулоқот амалисозии санадҳои қабулшуда дар доираи Созмон, аз ҷумла Конвенсияи байналмилалӣ оид ба содагардонӣ ва ҳамоҳангсозии расмиёти гумрукии Киото (соли 1973), Созишнома оид ба содагардонии расмиёти савдо (соли 2013) ва мутобиқ намудани Кодекси гумруки Ҷумҳурии Тоҷикистон ба талаботи Конвенсия ва Созишномаи зикршуда баррасӣ карда шуданд.

Хотиррасон мекунем, ки Тоҷикистон соли 2018 меъёрҳои боҷҳои гумрукии воридотӣ мутобиқ ба стандартҳои СУГ-ро қабул намудааст.

Имтиёзҳои гумрукию андозӣ ва дастгирии истеҳсолкунандагони молҳои ватанӣ ба рушди устувори иқтисодиёти миллӣ мусоидат менамоянд. Онҳо инчунин ба афзун гардидани ҳаҷми истеҳсоли молҳои ватанӣ ва беҳтар намудани фазои сармоягузорӣ замина гузоштанд.

Зимни вохӯрӣ масъалаи такмили қонунгузорӣ дар арсаи тиҷорату иқтисод ва амалисозии сиёсати давлатии дастгирии содирот низ муҳокима гардид.

Изҳори итминон карда шуд, ки гузариши пурра ба стандартҳои байналмилалие, ки аз ҷониби СУГ таҳия ва пешниҳод мешаванд, дар  зиёд гардидани гардиши тиҷорат ва қисми воридотии буҷаи давлат, инчунин рушди муносибатҳои иқтисодӣ бо кишварҳои ҳамҷавор ва минтақа саҳми арзанда мегузоранд.

Бояд гуфт, ки кори миссияи мазкур ҳанӯз идома дошта, то 29 декабри соли 2021 идома меёбад.

АКСҲО: Хадамоти гумруки назди Ҳукумати ҶТ

Декабрь 23, 2021 16:43

Хабарҳои дигари ин бахш

Дар Тоҷикистон барои соҳибкорони инфиродии тибқи патент ё шаҳодатнома фаъолияткунанда тартиби нави андозбандӣ муқаррар гардид
«Моликияти зеҳнӣ ва ҷавонон: Инноватсия барои ояндаи беҳтар». Таҳти чунин унвон дар Душанбе ҳамоиш доир шуд
Татбиқи «Барномаи рушди нақлиёти барқӣ дар Ҷумҳурии Тоҷикистон барои солҳои 2022-2026» истифодаи электромобилҳоро афзоиш медиҳад
ПАНҶСОЛАИ РУШДИ САНОАТ. ҶДММ «Тоҷфилиз» дар се моҳ ба маблағи зиёда аз 2 миллион сомонӣ маҳсулот истеҳсол намуд
ТАЪМИНИ АМНИЯТИ ОЗУҚАВОРӢ. Дар Маркази назорати давлатии санитарию эпидемиологии Суғд бо масъулини соҳаи савдо мулоқот доир шуд
«Somon Air» дар масири Душанбе-Алмато-Душанбе ҳафтае ду маротиба парвоз анҷом медиҳад
Дар Душанбе дурнамои нишондиҳандаҳои рушди соҳаҳои воқеии иқтисоди миллӣ баррасӣ гардид
Дар ноҳияи Ҷалолиддини Балхӣ вобаста ба содироти маҳсулоти кишоварзӣ ҷаласа доир шуд
Дар Душанбе рушди ҳамкории мутақобилан судманди Тоҷикистон ва Дафтари Швейтсария оид ба ҳамкории иқтисодӣ баррасӣ гардид
НАМОИШГОҲИ «ИННОПРОМ.Осиёи Марказӣ». Дар он маҳсулот ва хизматрасонии 28 корхонаи Тоҷикистон ба намоиш гузошта шудааст
Дар шаҳри Бохтар ярмарка-фурӯши маҳсулоти мавриди ниёзи аввал бо нархҳои нисбатан арзон фаъолият дорад
Дар Тоҷикистон дар зиёда аз 152 ҳазор гектар зироати баҳорӣ кишт шудааст