БЛИНКЕН МУСИҚИИ ТОҶИКИРО ДӮСТ МЕДОРАД. Роҳбари Департаменти давлатии ИМА дар бораи сурудҳои дӯстдоштааш изҳори назар намуд

Январь 4, 2022 16:56

ДУШАНБЕ, 04.01.2022 /АМИТ «Ховар»/. Дар арафаи Соли нав Котиби давлатии ИМА Энтони Блинкен дар Твиттер ду рӯйхати сурудҳои дӯстдоштаи худро, ки соли 2021 гӯш кардааст, нашр намуд. Дар ин бора АМИТ «Ховар» хабар медиҳад.

Блинкен изҳор намуд, ки мусиқӣ ҷузъи доимии ҳаёт маҳсуб мешавад. Дар ҷамъбасти сол Котиби давлатӣ мехоҳад бо истифода аз фурсати муносиб оид ба баъзе сурудҳои дӯстдоштааш, ки соли 2021 нашр шудаанд, изҳори назар намояд.

Рӯйхати аввали таронаҳоро Котиби давлатӣ «Дар хона» номид. Ба он 17 таронаи ҳунармандони амрикоӣ, ба мисли Ҷастин Бибер, Дайана Росс, Бруно Марс ва Тейлор Свифт шомил гардидаанд.

Давомнокии умумии рӯйхат 1 соату 3 дақиқаро ташкил медиҳад.

“Яу қисмати кори ман пешбурди дипломатияи мардумӣ ва барқарор кардани робита бо дигар миллатҳо тавассути муҳаббати муштарак ба фарҳанг, маориф, мусиқӣ, ғизо ва ғайра мебошад. Инҳо чанд суруди дӯстдоштаи ман дар соли равонанд, ки аз ҷониби ҳунармандони амрикоӣ иҷро шудаанд ва ман умедворам, ки гӯш кардани онҳо дар саросари ҷаҳон ба одамон лаззат мебахшад”,-омадааст дар тавсифи рӯйхати сурудҳо.

Рӯйхати дуюм «Дар роҳ» (On the Road) ном дорад. Он сурудҳои навозандагон аз тамоми ҷаҳон, аз ҷумла The Weeknd, Stromae, Adel, Dua Lipa ва дигаронро дар бар мегирад. Рӯйхати мусиқӣ 2 соату 18 дақиқа тӯл кашида, аз 36 трек иборат аст.

Қобили зикр аст, ки дар ин феҳрист ду таронаи тоҷикӣ — «Камароб» (Camarob, Safarmuhammad, M.One) дар иҷрои овозхони ҷавони тоҷик Сафармуҳаммад Рустами 25-сола ва ҳамчунин таронаи як овозхони Афғонистон Ориёно Саид бо номи «Нафасам» (Nafasam,  Aryana Sayeed) ҷой дода шудаанд. Зимнан, Сафармуҳаммад (солҳои 2014-2019) дар Донишгоҳи Ляонини шаҳри Шеняни Чин таҳсил кардааст.

Ба ғайр аз ин, миёни таронаҳои  дӯстдоштаи Котиби давлатии Амрико суруди «Муҳаббат» (Mohabbat, Arooj Aftab)-и Оруҷ Офтоб (сарояндаи покистонӣ) низ ҳаст.

«Мусиқӣ одамонро ба ҳам меорад — он марзҳо ва ҳама чизи дигареро, ки метавонанд моро ҷудо кунанд, убур мекунад. Дар охири соли 2021 ман баъзе сурудҳои дӯстдоштаи худро, ки имсол (ё чанде пеш) аз ҷониби сарояндагони саросари ҷаҳон эҷод шудаанд, мубодила хоҳам кард. Умедворам, ки ба шумо низ чун  ба ман писанд меоянд”,-омадааст дар тавсифи рӯйхати сурудҳои “Дар роҳ”.

                                                            АКС: Evelyn Hockstein / Reuters

Январь 4, 2022 16:56

Хабарҳои дигари ин бахш

Филми кӯтоҳи «Этюд» дар Фестивали 45-уми байналмилалии Гризлони Олмон иштирок мекунад
«БАҲОРИ ТОШКАНД». Фестивали VI байналмилалии опера ва балет чунин унвон гирифтааст
Даври аввали Озмуни ҷумҳуриявии «Тоҷикистон-Ватани азизи ман» ҷараён дорад
Тоҷикистон узви Маркази байналмилалии тадқиқотӣ оид ба ҳифз ва барқарорсозии мероси фарҳангӣ гардид
ТАВЗЕҲИ ПАЁМИ ПЕШВОИ МИЛЛАТ. Ба аъзои ташкилоти ибтидоии ҳизбии «Эҷод»-и АМИТ «Ховар» нуктаҳои ин ҳуҷҷати стратегӣ шарҳ дода шуданд
Чор рассоми навраси тоҷик дар Форуми байналмилалии аниматсия дар Тошканд иштирок мекунанд
Мазҳакаи «Табиби паррон»-и Театри мусиқӣ-мазҳакавии шаҳри Хуҷанд соҳиби ду ҷоизаи байналмилалӣ гардид
ИМРӮЗ — РӮЗИ БАЙНАЛМИЛАЛИИ ҲИФЗ ВА НИГОҲДОРИИ ЁДГОРИҲО ВА ҶОЙҲОИ ТАЪРИХӢ. Ҳадафи он ҷалби ҷомеаи ҷаҳон ба ҳифзи мероси умумибашарист
УСТОД САДРИДДИН АЙНӢ- ЧЕҲРАИ ТОБНОКИ ТАМАДДУНИ ШАРҚ. Имрӯз ба зодрӯзи намои адабиёти миллати тоҷик 144 сол пур шуд
«ТОҶИКИСТОНИ ОЗОДИ МАН…». Имрӯз ба зодрӯзи муаллифи оҳанги Суруди миллии Тоҷикистон Сулаймон Юдаков расо 106 сол пур мешавад
Дар Тоҷикистон омодагӣ ба Рӯзи Мавлоно Ҷалолуддини Балхӣ оғоз гардид
Тоҷикистон ва Литва ҳамкории судмандро дар соҳаи сайёҳӣ таҳким мебахшанд