Мубодилаи барқияҳои табрикии Президенти Ҷумҳурии Тоҷикистон Эмомалӣ Раҳмон ва Сарвазири Шоҳигарии Муттаҳидаи Британияи Кабир ва Ирландияи Шимолӣ Борис Ҷонсон

Январь 31, 2022 18:40

ДУШАНБЕ, 31.01.2022 /АМИТ «Ховар»/. Имрӯз миёни Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Сарвазири Шоҳигарии Муттаҳидаи Британияи Кабир ва Ирландияи Шимолӣ муҳтарам Борис Ҷонсон ба муносибати 30-юмин солгарди барпо намудани робитаҳои дипломатии ду кишвар мубодилаи барқияҳои табрикӣ ба амал омад.

Дар барқияи табрикии Президенти Ҷумҳурии Тоҷикистон муҳтарам Эмомалӣ Раҳмон ба унвони Сарвазири Шоҳигарии Муттаҳидаи Британияи Кабир ва Ирландияи Шимолӣ муҳтарам Борис Ҷонсон омадааст:

«Ҷаноби Олӣ,

Дар иртибот ба таҷлили 30-солагии барқарории робитаҳои дипломатӣ миёни Ҷумҳурии Тоҷикистон ва Шоҳигарии Муттаҳидаи Британияи Кабир ва Ирландияи Шимолӣ сарфарозам ба Шумо ва мардуми дӯсти кишваратон таманниёти нек ва табрикоти самимии ин ҷонибро изҳор намоям.

Боиси қаноатмандист, ки тайи солҳои сипаришуда муносибатҳои дӯстӣ ва ҳамкориҳои судманди кишварҳои мо ба таври мусбат ва ба нафъи ҷонибҳо бомаром рушд ёфта, сатҳи сифатан навро касб карданд.

Тоҷикистон таҳкиму тавсеаи минбаъдаи робитаҳои некро бо Британияи Кабир, ки дар қатори аввалинҳо соҳибистиқлолии онро ба расмият пазируфт, муҳим медонад.

Дар ин росто, мо ҷиҳати густариши ҳамкориҳои пойдору дарозмуддат бо он дар ҳама арсаҳои мавриди таваҷҷуҳи тарафайн кӯшишҳои пайваста ба харҷ медиҳем.

Итминон дорам, ки бо саъю талошҳои муштараки ҷонибҳо муносибатҳои шарикии ду кишвар минбаъд ҳам идомаи босамар ёфта, дар оянда мазмуну мӯҳтавои навро касб хоҳанд кард.

Бо истифода аз фурсати фараҳбахш ба Шумо, ҷаноби Сарвазир, сиҳатмандии комилу комёбиҳои навин ва ба мардуми дӯсти Шоҳигарӣ сулҳу амонӣ ва рифоҳу шукуфоии рӯзафзун орзумандам».

Дар барқияи табрикии Сарвазири Шоҳигарии Муттаҳидаи Британияи Кабир ва Ирландияи Шимолӣ муҳтарам Борис Ҷонсон ба унвони Президенти Ҷумҳурии Тоҷикистон муҳтарам Эмомалӣ Раҳмон, чунин гуфта шудааст:

«Муҳтарам ҷаноби Президент Раҳмон,

Шоҳигарии Муттаҳида ва Ҷумҳурии Тоҷикистон рӯзи 15 январ 30-умин солгарди барқарории муносибатҳои дипломатии худро қайд намуданд. Бо истифода аз ин фурсат, мехостам қотеона ва самимона аҳамияти таҳкими муносибатҳои моро барои Шоҳигарии Муттаҳида таъкид намоям.

Дар тӯли 30 соли охир Шоҳигарии Муттаҳида ва Ҷумҳурии Тоҷикистон дар роҳи рушди шарикии наздик бар пояи усулҳои дӯстӣ ва ҳусни тафоҳум, ки ҳамкориҳоро дар соҳаҳои амният ва дифоъ, рушди инсонӣ ва иқтисодӣ, тиҷорат ва фарҳанг дар бар мегирад, ҳамкории муштарак анҷом додаанд.

Шоҳигарии Муттаҳида, ки имрӯз шарики собитқадами Ҷумҳурии Тоҷикистон мебошад, минбаъд низ дар кори дастгирии рушди устувори он ва муборизаи муштарак бо таҳдидҳои умумӣ ва глобалӣ, ба монанди амният ва тағйирёбии иқлим ҳамин тавр боқӣ мемонад. Умедвори рушди давомдори муносибатҳои ҳамкориамон дар солҳои оянда ҳастам».

Январь 31, 2022 18:40

Хабарҳои дигари ин бахш

Суратгузориши АМИТ «Ховар» аз ҷараёни Мусобиқаи байналмилалӣ оид ба қаиқронӣ дар шаҳри Душанбе
23 МАРТ — РӮЗИ УМУМИҶАҲОНИИ ОБУҲАВОШИНОСӢ. Ҳар се соат ба Хадамоти ҷаҳонии ҳавошиносӣ доир ба вазъи об ва боду ҳавои Тоҷикистон маълумот пешниҳод мегардад
Бо дастури Президенти Тоҷикистон барои бартарафсозии оқибатҳои заминларза Комиссияи ҷумҳуриявӣ таъсис дода шуд
«ҲАФТ СИН». Ин анъанаи неки Наврӯз рамзи фаровонҳосилӣ, файзу баракат ва фардои дурахшон ҳисобида мешавад
Суханронии Президенти Ҷумҳурии Тоҷикистон Эмомалӣ Раҳмон дар чорабинии канории «Харитаи роҳ барои соли 2025: Соли байналмилалии ҳифзи пиряхҳо»
Президенти Ҷумҳурии Тоҷикистон Эмомалӣ Раҳмон дар чорабинии канории «Харитаи роҳ барои соли 2025: Соли байналмилалии ҳифзи пиряхҳо» иштирок ва суханронӣ намуданд
Президенти Ҷумҳурии Тоҷикистон Эмомалӣ Раҳмон дар чорабинии канорӣ «Табдили институтҳои иқтисодии глобалӣ ба манфиати умум: Даъват барои бедоршавӣ аз ҷониби Комиссияи глобалӣ оид ба иқтисодиёти об» иштирок карданд
Пешвои миллат Эмомалӣ Раҳмон бо Раиси иҷлосияи 77-уми Маҷмаи Умумии Созмони Милали Муттаҳид Чаба Короши мулоқот намуданд
Суханронии Президенти Ҷумҳурии Тоҷикистон Эмомалӣ Раҳмон дар маросими ифтитоҳи Конфронси СММ оид ба шарҳи фарогири миёнамуҳлати ҳадафҳои Даҳсолаи байналмилалии амал «Об барои рушди устувор, солҳои 2018-2028»
Президенти Ҷумҳурии Тоҷикистон Эмомалӣ Раҳмон дар Конфронси СММ оид ба шарҳи фарогири миёнамуҳлати ҳадафҳои Даҳсолаи байналмилалии амал «Об барои рушди устувор, солҳои 2018-2028» иштирок ва суханронӣ намуданд
Сокинони ноҳияи Мастчоҳ бо шукргузорӣ аз баракати истиқлол Ҷашни байналмилалии Наврӯзро таҷлил намуданд
Дар ноҳияи Ванҷ Ҷашни байналмилалии Наврӯз бо шукуҳу шаҳомат ва ифтихору сарфарозӣ таҷлил гардид