Кумитаи иҷроияи ҲХДТ дар шаҳри Ҳисор бахшида ба 35-солагии Истиқлолияти давлатӣ озмун мегузаронад

ДУШАНБЕ, 17.01.2022 /АМИТ «Ховар»/. Ба шарафи ҷашни 35-солагии Истиқлолияти давлатии Ҷумҳурии Тоҷикистон дар шаҳри Ҳисор миёни ташкилотҳои ибтидоии шаҳр дар соли 2022 озмуни “Ташкилоти беҳтарини ҳизбӣ” гузаронида мешавад.

Тавре аз Кумитаи иҷроияи ҲХДТ дар шаҳри Ҳисор ба АМИТ “Ховар” иттилоъ доданд, масъалаи мазкур дар маҷлиси ҷамъбасти солонаи КИ ҲХДТ дар шаҳри Ҳисор мавриди муҳокима қарор гирифта, низомномаи озмун тасдиқ карда шудааст.

Низомнома масъулияти ташкилоти ибтидоиии ҲХДТ дар шаҳри Ҳисорро муқаррар намуда, дар асоси дастуру супоришҳои Пешвои миллат, Раиси муаззами   Ҳизби Халқии Демократии Тоҷикистон муҳтарам Эмомалӣ Раҳмон дар маҷлиси васеи Кумитаи Иҷроияи Марказии Ҳизби Халқии Демократии Тоҷикистон аз 7 феврали соли 2019 ҷиҳати пурзӯр намудани самти фаъолияти сиёсии  ташкилоти ибтидоии ҳизбии шаҳри Ҳисор таҳия гардидааст.

Озмуни мазкур аз рӯйи шарт ва номинаҳои   “Беҳтарин ташкилоти ибтидоӣ”, “Таблиғотчии беҳтарини ҳизбӣ аз ҳисоби собиқадорон, бонувон ва ҷавонон”, “Таблиғотчии беҳтарин дар саҳифаҳои иҷтимоии интернетӣ”, “Беҳтарин утоқи ҳизбӣ”, “Беҳтарин бахши Ташкилоти ҷамъиятии ҷавонон “Созандагони Ватан” ва “Фаъолтарин вакили Маҷлиси вакилони халқи шаҳри Ҳисор аз Ҳизби Халқии Демократии Тоҷикистон”  гузаронида мешавад.

Дар ҷамъбасти озмун ба ғолибон ҷоиза, диплом ва туҳфаи хотиравӣ тақдим мегарданд.

 АКС: КИ ҲХДТ дар шаҳри Ҳисор