Донишгоҳи байналмилалии Ал-Бухории Малайзия омода аст 30 шаҳрванди Тоҷикистонро дар зинаи бакалавр қабул намояд

ДУШАНБЕ, 13.02.2022 /АМИТ «Ховар»/. Донишгоҳи байналмилалии Ал-Бухории Малайзия омода аст, ки 30 нафар шаҳрванди Ҷумҳурии Тоҷикистонро дар зинаи бакалавр аз рӯи ихтисосҳои идоракунии тиҷорат, идоракунии тиҷорат дар соҳаи маркетинг, идоракунии тиҷорат  дар соҳаи менеҷмент, иқтисодиёт, молия, илмҳои компютерӣ, сиёсат ва муносибатҳои байналмилалӣ, таълими томактабӣ, таълими миёнаи умумӣ, воситаҳои ахбори омма ва коммуникатсия, рушди ҷомеа тариқи ройгон дар соли таҳсили 2022-2023 қабул намояд, иттилоъ доданд ба АМИТ «Ховар» дар Муассисаи давлатии «Маркази барномаҳои байналмилалӣ»-и Вазорати маориф ва илми Ҷумҳурии Тоҷикистон.

Гуфта шуд, ки ки сохтори мактаби миёнаи Ҷумҳурии Тоҷикистон 11 сол мебошад ва тибқи талаботи Малайзия (таҳсил дар мактаби миёна 12 солро ташкил медиҳад) барои таҳсил дар Донишгоҳ шаҳрванди Тоҷикистон бояд як соли дигар (курси тайёрӣ) таҳсил намояд ва ҷониби Малайзия арз доштааст, ки омода аст таҳсилро дар зинаи «курси тайёрӣ» ва барои довталабоне, ки забони англисиро дар сатҳи зарурӣ намедонанд, курсҳои забони англисиро ҳангоми таҳсил дар зинаи (курси тайёрӣ) дар асоси бурсияи Донишгоҳ (пас аз суҳбат бо довталаб) пешниҳод намояд.

Намунаи ҳуҷҷатҳо дар сомонаи www.aie.edu.my гузошта шудааст, ки довталабон метавонанд дастрас намуда, худро дар зери сомонаи http//apply. aie.edu.my  ба қайд гиранд.

Қарори ниҳоии қабули довлатаб барои бурсияи мазкур пас аз суҳбат бо довталабон аз ҷониби комиссияи қабули донишгоҳ бароварда мешавад.

Хоҳишмандон метавонанд барои дарёфти маълумоти бештар ва сабти ном ба Муассисаи давлатии «Маркази барномаҳои байналмилалӣ», воқеъ дар суроғаи шаҳри Душанбе, кӯчаи Мирзо Турсунзода 47, тавассути телефонҳои 223-23-59, 223-23-57 дар тамос шаванд ва ё аз сомонаи edu-cip.tj ва шабакаҳои иҷтимоии «facebook» ва «instagram» онро дастрас намоянд.

АКС: Маркази барномаҳои байналмилалӣ