САЙРИ ҶАҲОНИИ ҶУДО. Комроншоҳ Устопириён Тоҷикистонро дар Париж дар вазни -90кг намояндагӣ мекунад

ДУШАНБЕ, 04.01.2022 /АМИТ «Ховар»/. Мусобиқаи сайри ҷаҳонии ҷудо бо Гранд Слами Париж идома меёбад. Мусобиқа 5-6 феврал баргузор шуда, дар он Тоҷикистонро Комроншоҳ Устопириён дар вазни -90кг намояндагӣ мекунад. Дар ин бора АМИТ «Ховар» бо истинод ба Кумитаи миллии олимпии Тоҷикистон хабар медиҳад.

Дар мусобиқа иштироки 291 варзишгар (157 мард, 134 зан) аз 53 давлат дар назар аст. Варзишгарон тибқи қоидаҳои ҷудо дар 14 категорияи вазнӣ (7 вазн миёни мардҳо, 7 вазн миёни бонувон) барои ба даст овардани ҷойҳои ифтихорӣ талош мекунанд.

Рӯзи аввал қувваозмоиҳо дар вазнҳои -48кг, -52кг, -57кг, -63кг миёни бонувон, -60кг, -66кг, -73кг миёни мардҳо доир мешаванд. Дар рӯзи дуюм бонувони вазнашон -70кг, -78кг, +78кг ва мардҳои вазнашон -81кг, -90кг, -100кг, +100кг гӯштин мегиранд.

Варзишгароне, ки медал ба даст меоранд, бо ҷоизапулӣ қадрдонӣ мешаванд: ҷои якум – 5000 евро, ҷои дуюм – 3000 евро, ҷои сеюм – 1500 евро.

Ёдовар мешавем, ки дар аввалин мусобиқаи ҷудои соли 2022 – Гран Прии Португал, ки 28-30 январ дар шаҳри Алмада доир гашт, Комроншоҳ Устопириён медали биринҷӣ ба даст овард.

АКС: КМО Тоҷикистон