Умед Бобозода ва Мулугета Зевди ҳамкории судманд баҳри риоя ва ҳифзи ҳуқуқу озодиҳои инсонро баррасӣ намуданд

ДУШАНБЕ, 09.02.2022 /АМИТ «Ховар»/. 8 феврал Ваколатдор оид ба ҳуқуқи инсон дар Ҷумҳурии Тоҷикистон Умед Бобозода бо Роҳбари Намояндагии Комиссари Олии Созмони Милали Муттаҳид оид ба кор бо гурезаҳо Мулугета Зевди мулоқот намуд, хабар доданд дар мақомоти Ваколатдор оид ба ҳуқуқи инсон ба мухбири АМИТ «Ховар».

Дар вохӯрӣ ҷонибҳо оид ба ҳамкории бисёрҷабҳа миёни Ҳукумати Ҷумҳурии Тоҷикистон ва Комиссари Олии Созмони Милали Муттаҳид оид ба кор бо гурезаҳо дар самти амалинамоии ташаббусҳои ҷорӣ, ҳамчунин амалӣ намудани нақшаҳои мавҷудаи мақомоти Ваколатдор оид ба ҳуқуқи инсон ва Комиссари Олии Созмони Милали Муттаҳид оид ба кор бо гурезаҳо суҳбат намуданд.

У. Бобозода изҳор намуд, ки Ҷумҳурии Тоҷикистон ҳамчун узви комилҳуқуқи СММ ва дигар созмонҳои байналмилалӣ ҷиҳати иҷрои уҳдадориҳои байналмилалии худ дар самти риоя ва ҳифзи ҳуқуқи инсон, аз ҷумла таъмини риоя, ҳифз ва пешбурди ҳуқуқи гурезаҳо, шахсони паноҳҷӯянда ва шахсони бешаҳрвандӣ пайваста талош меварзад ва дар ин робита саҳми мақомоти Ваколатдор оид ба ҳуқуқи инсон дар Ҷумҳурии Тоҷикистон назаррас аст.

Ҳукумати  Ҷумҳурии Тоҷистон таҳти роҳнамоии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчун яке аз аввалин кишварҳо дар Осиёси Марказӣ ба Конвенсияи СММ оид ба мақоми гурезаҳо аз соли 1951 ва дигар созишномаҳои марбут ба самти мазкур ҳамроҳ шудааст.

Мулугета Зевди иқдоми мазкурро назаррас арзёбӣ карда, изҳор намуд, ки ин талошҳо барои пешрафту рушди ҳамаҷонибаи Ҷумҳурии Тоҷикистон муҳиманд.

Дар хатми мулоқот Роҳбари Намояндагии Комиссари Олии Созмони Милали Муттаҳид оид ба кор бо гурезаҳо аз Ваколатдор оид ба ҳуқуқи инсон дар Ҷумҳурии Тоҷикистон ҷиҳати пазироии самимӣ ва идома додани ҳамкории мутақобилан судманд баҳри риоя ва ҳифзи ҳуқуқу озодиҳои инсон, махсусан гурезаҳо, шахсони паноҳҷӯянда ва шахсони бешаҳрвандӣ дар Тоҷикистон ва тақвият додани ҳамкории тарафайн изҳори миннатдорӣ намуд.

 АКС: Хадамоти матбуоти ВҲИ