«ҶОМИ НАВРӮЗ-2022». Тоҷикистон пас аз пирӯзӣ бар дастаи мунтахаби Қирғизистон мақоми сеюмро соҳиб гардид

ДУШАНБЕ, 30.03.2022 /АМИТ «Ховар»/. Аз 25 то 29 март дар шаҳри Намангони Ҷумҳурии Узбекистон Мусобиқаи байналмилалӣ оид ба футбол – «Ҷоми Наврӯз-2022» баргузор шуд.
Дар мусобиқа 4 дастаи мунтахаб – Тоҷикистон, Қирғизистон, Уганда ва Узбекистон ширкат карданд, ки  дар он дастаи дастаи  мунтахаби  Тоҷикистон мақоми сеюмро соҳиб  шуд, иттилоъ медиҳад шореҳи варзиши АМИТ «Ховар» бо истинод ба Федератсияи футболи Тоҷикистон.

Дастаи  мунтахаби  Тоҷикистон бо роҳбарии сармураббӣ Петр Сегрт дар доираи мусобиқа 2 бозӣ анҷом дода, ҷои сеюмро ишғол намуд.

Мавриди зикр аст, ки дар нимфинал ҳарифи  дастаи мунтахаби  Тоҷикистон дастаи мунтахаби  Уганда буд. Бозии дастаҳо 27 март баргузор шуд. Вақти асосии бозӣ мусовӣ – 0:0 шуд, вале дар задани зарбаҳои ёздаҳметра бахт ба рӯи угандагиҳо хандида, бо ҳисоби  4:5 ғолиб омаданд.

Дар бозӣ барои ҷои сеюм, ки 29 март баргузор гардид, дастаи футболи мунтахаби Тоҷикистон бар дастаи мунтахаби  Қирғизистон бо ҳисоби 1:0 ғалаба карда, ҷои сеюмро сазовор шуд. Голро Парвиз Умарбоев дар дақиқаи 54 аз пеналтӣ  ба нишон расонид.

АКСҲО: ФФТ