ЗАБОН ДОНӢ-ҶАҲОН ДОНӢ. Дар ДДЗТ озмуни наттоқони забони ҷопонӣ доир шуд
ДУШАНБЕ, 15.03.2022 /АМИТ «Ховар»/. Президенти Ҷумҳурии Тоҷикистон муҳтарам Эмомалӣ Раҳмон 21 декабри соли 2021 зимни ироаи Паёми навбатӣ ба Маҷлиси Олӣ омӯзиши забонҳои хориҷиро муҳим арзёбӣ карда, наврасону ҷавононро ба забономӯзӣ даъват намуданд. Дар робита ба ин даъвати Пешвои миллат 14 март дар Донишкадаи давлатии забонҳои Тоҷикистон ба номи Сотим Улуғзода озмуни наттоқони забони ҷопонӣ баргузор гардид, иттилоъ медиҳад мухбири АМИТ «Ховар» бо истинод ба ДДЗТ.
Дар расми баргузории озмуни мазкур ректори донишгоҳ профессор Жило Гулназарзода, Сафири Фавқулода ва Мухтори Ҷопон дар Ҷумҳурии Тоҷикистон Айки Тошиҳи ва мутахассисону устодони забони ҷопонӣ иштирок намуданд.
Жило Гулназарзода гуфт, ки робитаҳои нек ва дӯстиву ҳамдигарфаҳмӣ, ки миёни халқҳои мо роҳандозӣ гардидаанд, бо азму талошҳои пайгиронаи сарварони хирадманди ду кишвари бо ҳам дӯст боз ҳам беҳтар шудаанд.
Тавре Президенти Ҷумҳурии Тоҷикистон муҳтарам Эмомалӣ Раҳмон 21 декабри соли 2021 зимни ироаи Паёми навбатӣ ба Маҷлиси Олӣ иброз намуданд, «омӯзиши забонҳои хориҷӣ муҳим буда, бахусус мебояд омӯзиши забонҳои русиву англисӣ дар тамоми факултаву шуъбаҳои мактабҳои олӣ боз ҳам беҳтар ба роҳ монда шавад».
Мавсуф афзуд, ки чунин озмунҳои маърифатӣ ба рушди тафаккури зеҳнӣ ва ҷаҳонбинии ҷавонон мусоидат менамояд.
Дар озмун 33 нафар иштирокчӣ аз Донишкадаи давлатии забонҳои Тоҷикистон, Донишгоҳи словянии Русия ва Тоҷикистон, Литсейи «Ҳотам ПВ» ва Маркази забономӯзӣ ва фарҳангии «КОКОРО» ширкат доштанд. Озмуни мазкур дар ду бахш гузаронида шуд.
Сафири Фавқулода ва Мухтори Ҷопон дар Ҷумҳурии Тоҷикистон Айки Тошиҳи дар якҷоягӣ бо мутахассисони соҳа ва устодони забони ҷопонӣ ба истеъдоди иштирокчиёни озмун баҳо гузошт.
Аз ҷониби ҳакамон озмун чунин натиҷагирӣ карда шуд: дар бахши қироати матни интихобӣ ҷойи аввал ба донишҷӯи курси 2-юми ДДЗТ ба номи С.Улуғзода Гулноза Амзазода, ҷойи дуввуму сеюм ба донишҷӯёни курси 2 ва 3-и ДДЗТ Мафтуна Шарипова ва Ибодат Аҳмадова дода шуд.
Дар бахши қироати иншои озод ҷойи аввал ба донишҷӯи курси 3-юми ДДЗТ Ҷамолиддин Алиқулов насиб гардида, ҷойи дуввумро донишҷӯи курси 3-юм Ҳилола Жумаева ва ҷойи сеюмро донишҷӯи курси 3-юми ин донишкада Қурбонбека Рашидбекова сазовор шуданд.
Дар фарҷоми озмун ғолибони он бо сертификат ва ифтихорномаҳо қадрдонӣ гардиданд. Ҳамзамон озмун бо барномаи фарҳангӣ ва тақдими туҳфаи тоҷикона аз ҷониби раёсати Донишкада ба сафир ҳусни анҷом пазируфт.
Акс: ДДЗТ
Ду озмоишгоҳи Институти химияи Академияи миллии илмҳои Тоҷикистон бо технологияи муосир муҷаҳҳаз карда шуд
Рӯзҳои фарҳанги Ҷумҳурии Тоҷикистон дар Федератсияи Русия идома доранд
Ёдгориҳои ёфтшуда аз шаҳристони Ҳулбук арзиши баланди илмӣ дошта, дар байни таҳқиқоти солҳои охир беназир маҳсуб мешаванд
«Шоҳнома»-и Фирдавсӣ бояд машъалафрӯзи ҳар хонадони тоҷик бошад ва анъанаи неки шоҳномасароӣ барқарор шавад
Вобаста ба таъсири зеҳни сунъӣ ба ҳастии инсоният конференсияи ҷумҳуриявӣ баргузор шуд
«ШОҲНОМА — ОРМОНИ МИЛЛӢ». Он мактаби худшиносӣ ва парчами ифтихори миллии мо аст
Ҳамкории Академияи миллии илмҳои Тоҷикистон бо Маркази пажӯҳишӣ ва машваратии TRENDS густариш меёбад
Иштирокдорони Конфронси байналмилалии сатҳи баланд оид ба ҳифзи пиряхҳо аз Чин бо яке аз маконҳои таърихии Тоҷикистон шинос шуданд
Қобилҷон Хушвахтзода: «Ташаббусҳои Пешвои миллат оид ба масоили об дар ҳалли масъалаҳои истифодаи оқилонаи захираҳои обии сайёра нақши муҳим доранд»
Намоиши ёдгориҳои таърихии Ҷумҳурии Тоҷикистон дар Ҷумҳурии Мардумии Чин баргузор мегардад
Муовини Сарвазири Тоҷикистон Дилрабо Мансурӣ бо ёрдамчии Дабири кулли ЮНЕСКО Лидия Артур Брито мулоқот намуд
КОНФРОНСИ БАЙНАЛМИЛАЛИИ САТҲИ БАЛАНД ОИД БА ҲИФЗИ ПИРЯХҲО. Обшавии босуръати пиряхҳо дар Арктика ва Антарктида боиси ноустувории қабатҳои ях мегардад
