ДАР ПАРТАВИ ДАСТУРҲОИ ПРЕЗИДЕНТ. Омӯзгорони забони англисӣ аз Тоҷикистон метавонанд дар Барномаи байналмилалии OPEN иштирок намоянд

Апрель 6, 2022 14:30

ДУШАНБЕ, 06.04.2022 /АМИТ «Ховар»/. Сафорати ИМА дар Тоҷикистон дархостҳои омӯзгорони забони англисиро барои иштирок дар курсҳои 8-ҳафтаинаи такмили ихтисоси Барномаи Online Professional English Network (OPEN) барои тобистони соли 2022, ки аз ҷониби донишгоҳҳои Амрико таҳия шудааст, қабул менамояд.

Тавре дар Сафорати ИМА хабар доданд, курсҳо аз рӯйи мавзӯъҳои «таҳия ва таълими навишти академӣ», «ташкил ва татбиқи курсҳои онлайнӣ», «ҳавасмандгардонӣ ва ҷалби донишҷӯён», «забони англисӣ ҳамчун воситаи таълим», «методологияи TESOL», «омӯзиш дар асоси мундариҷа», «ҳамгироии малакаҳои тафаккури интиқодӣ ба омӯзиши фарҳангӣ дар забони англисӣ ҳамчун муҳити забони хориҷӣ», «ташкил намудани омӯзишҳои такмили ихтисос барои омузгорони забони англисӣ», «таълими забони англисӣ дар синфҳои ибтидоӣ», «таълими грамматика бо истифода аз усулҳои коммуникатсионӣ» ва «истифодаи технологияҳои таълимӣ дар дарси забони англисӣ» гузаронида мешаванд.


Гуфта мешавад, ки дархостҳо барои иштирок дар омӯзиш то 25 апрели соли 2022 қабул мегарданд. Шаҳодатномаҳо ва нишонаҳои рақамӣ аз ҷониби Департаменти давлатии ИМА барои ҳамаи онҳое, ки омӯзишро бомуваффақият ба охир мерасонанд, дода мешаванд.

Ёдовар мешавем, ки соли 2003 Фармони Президенти Ҷумҳурии Тоҷикистон «Дар бораи такмили таълим ва омӯзиши забонҳои русӣ ва англисӣ дар Ҷумҳурии Тоҷикистон» ба имзо расида буд, ки дар асоси он се маротиба барномаҳои давлатӣ қабул гардиданд. Охирин Барномаи такмили таълим ва омӯзиши забонҳои русӣ ва англисӣ дар Ҷумҳурии Тоҷикистон соли 2019 қабул гардида, татбиқи он барои давраи то соли 2030 пешбинӣ шудааст.

Пешвои миллат муҳтарам Эмомалӣ Раҳмон 21 декабри соли 2021 зимни ироаи Паёми солонаи худ ба Маҷлиси Олӣ бори дигар ба зарурати такмили таълими забонҳои хориҷӣ, пеш аз ҳама, русӣ ва англисӣ дар донишгоҳҳои ҷумҳурӣ таваҷҷуҳ зоҳир намуданд.

«Чаро ман ба ин ду забон ишора мекунам? Азбаски аз шаш забони СММ, ки ҳамчун забонҳои муоширати байналмилалӣ эътироф шудаанд, ду забон — русӣ ва англисӣ мебошанд. <…> Ба Вазорати маориф ва илм супориш дода мешавад, ки барои омода кардани омӯзгорони фанҳои риёзӣ, дақиқ ва табиӣ бо забонҳои хориҷӣ дар донишгоҳҳои равияи омӯзгорӣ кушодани шуъбаҳои алоҳидаро пешбинӣ намояд. Умуман, зарур аст, ки таълими забонҳои хориҷӣ, махсусан, русиву англисӣ дар тамоми факултаву шуъбаҳои мактабҳои олӣ боз ҳам беҳтар ба роҳ монда шавад», — гуфтанд дар ҷаласаи якҷояи Маҷлиси миллӣ ва Маҷлиси намояндагони Маҷлиси Олӣ, ки ба воситаи тамоми шабакаҳои телевизиони ва радиои давлатӣ мустақиман пахш мегардид.

Сарвари давлат илова намуданд, ки роҳбарони муассисаҳои таълимӣ низ бояд ба масъалаи баланд бардоштани сатҳи дониш ва маҳорати касбии омӯзгорон дар тамоми зинаҳои маориф аҳамияти аввалиндараҷа диҳанд. Президенти мамлакат даъват карданд, ки ба такмили ихтисос ва таълими омӯзгорони ҷавоне, ки маҳорати касбиашон ба талаботи замони муосир ҷавобгӯ мебошад, таваҷҷуҳ зоҳир карда шавад.

АКСҲО аз манбаъҳои боз

Апрель 6, 2022 14:30

Хабарҳои дигари ин бахш

Суҳайло Ҷавадова: «Баъди хатми Донишгоҳи Фридрих Шиллер дониш ва таҷрибаамро дар Тоҷикистон самаранок амалӣ менамоям».
ЗИМИСТОНГУЗАРОНӢ. Оё муассисаҳои маорифи шаҳри Душанбе ба давраи тирамоҳу зимистон омодаанд?
Ҳифзи истиқлолу озодии давлат ва миллат аз рушди илму маориф вобастагӣ дорад
Бо иштироки муовини Сарвазири Тоҷикистон дар Варзоб муассисаҳои таълимӣ ба истифода дода шуданд
Даври ниҳоии Озмуни ҷумҳуриявии «Омӯзгори сол-2025» оғоз гардид
Дар деҳаи Обидараи Даҳанаи шаҳри Ваҳдат бинои нави муассисаи таълимӣ ба истифода дода шуд
Дар ноҳияи Темурмалик мактаби нав ба истифода дода шуд
Дар Душанбе таҳти унвони «Нақши «Шоҳнома» дар ташаккули ҷаҳонбинии ҷавонони Тоҷикистон» хониши сиёсӣ доир шуд
Дар Душанбе даври ҷумҳуриявии Озмуни «Мураббии соли Тоҷикистон — 2025» оғоз гардид
Байни Донишгоҳи технологии Тоҷикистон ва Маркази таълимии касбӣ-техникии ноҳияи Чинду шартномаи ҳамкорӣ ба имзо расид
Донишгоҳи байналмилалии сайёҳӣ ва соҳибкории Тоҷикистон бо донишгоҳҳои пешқадами Ҷопон робитаи мустақими академӣ ба роҳ мемонад
Донишҷӯи Академияи идоракунии давлатии Тоҷикистон дар Мусобиқаи байналмилалии «Asian Championship» соҳиби медали тилло шуд