Дар Тоҷикистон дар зиёда аз 152 ҳазор гектар зироати баҳорӣ кишт шудааст

Апрель 26, 2022 10:26

ДУШАНБЕ, 26.04.2022 /АМИТ «Ховар»/. То 1 апрел хоҷагиҳои ҷамъиятӣ ва деҳқонии мамлакат дар масоҳати зиёда аз 152 ҳазор гектар зироати баҳорӣ кишт намудаанд, ки нисбат ба ҳамин давраи соли гузашта 4,3 фоиз зиёд мебошад, иттилоъ доданд ба АМИТ «Ховар» дар Агентии омори назди Президенти Ҷумҳурии Тоҷикистон.

Аз замини умумии кишт 68 242 гектарро кишти зироати ғалладона ва лӯбиёӣ (бе ҷуворимакка), 2632 гектарро ҷуворимакка барои дон, 32067 гектарро зироати техникӣ (аз ҷумла 18430 гектар пахта), 9386 гектарро картошка, 20522 гектарро сабзавот, 39,5 гектарро сабзавоти тухмӣ, 5984 гектарро полезиҳои озуқаворӣ ва 13311 гектарро зироати хӯроки чорво ташкил медиҳад.

Нисбат ба ҳамин давраи соли гузашта кишти зироати ҷуворимакка барои дон 4,4 фоиз, зироати техникӣ 27,4 фоиз, аз ҷумла пахта 50,2 фоиз ва зироати хӯроки чорво 14,3 фоиз зиёд шуда, зироати ғалладона ва лӯбиёӣ (бе ҷуворимакка) 0,1 фоиз, картошка 9,4 фоиз, сабзавот 5,0 фоиз, сабзавоти тухмӣ 1,6 баробар ва полезӣ 3,5 фоиз кам кишт карда шудааст.

Тавре директори Институти зироаткории Академияи илмҳои кишоварзии Тоҷикистон Раҳмон Саидзода иброз намуд, «имрӯзҳо дар мамлакат кишти зироати баҳорӣ идома дорад. Зироати баҳорӣ дар муддати 119-120 рӯз пурра пухта расида, ҷамъоварӣ мешавад. Дар ин шабу рӯз кишти пахта ҷараён дорад. Дар ноҳияҳои ҷануби мамлакат ҷамъоварии зироати барвақтӣ, аз ҷумла картошка ва пиёз ҷараён дорад, ки ҳосили он дар бозорҳои мамлакат мушоҳида мешавад».

Бояд гуфт, ки кишоварзони мамлакат баъд аз ҷамъоварии зироати баҳорӣ дар заминҳо кишти такрорӣ ба роҳ мемонанд, ки ин омил барои таъмини амнияти озуқавории мамлакат замина мегузорад.

Тибқи дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон, дар майдонҳои кишти мамлакат технологияи муосири парвариши зироати кишоварзӣ ва гирифтани 2-3 ҳосил дар як сол ба роҳ монда шуд. Дар натиҷа ҳосили умумии ғаллагиҳо ва зироат дар ҷумҳурӣ сол ба сол зиёд мегардад.

Ба иттилои Агентии омори ҷумҳурӣ, дар се моҳи аввали соли равон дар ҳамаи категорияҳои хоҷагӣ 3880,4 тонна сабзавот ва 16,6 тонна мевагиҳо истеҳсол карда шудаанд, ки нисбат ба ҳамин давраи соли 2021 сабзавот 1,2 фоиз ва мевагиҳо 6,4 фоиз зиёд истеҳсол шудааст. Аз ҳаҷми умумии истеҳсоли сабзавот – 868,4 тонна дар гармхонаҳои хоҷагиҳои ҷамъиятӣ ва деҳқонӣ истеҳсол шудааст, ки аз ҷумла дар хоҷагиҳои вилоятҳои Суғд – 270,5 тонна, Хатлон – 534,5 тонна, шаҳру ноҳияҳои Ҳисор –28,5 тонна, Турсунзода – 20,9 тонна, Ваҳдат — 11,0 тонна, Рӯдакӣ – 2,0 тонна ва Файзобод — 1,0 тоннаро ташкил медиҳад.

АКС: АМИТ «Ховар»

Апрель 26, 2022 10:26

Хабарҳои дигари ин бахш

Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст