Миёни Вазорати кишоварзии Тоҷикистон ва Ассотсиатсияи дӯстии Корея Ёддошти тафоҳуми ҳамкорӣ имзо гардид

ДУШАНБЕ, 13.04.2022 /АМИТ «Ховар»/. Миёни Вазорати кишоварзии Ҷумҳурии Тоҷикистон ва Ассотсиатсияи дӯстии Ҷумҳурии Корея бо давлатҳои Осиёи Марказӣ Ёддошти тафоҳуми ҳамкорӣ ба имзо расид, иттилоъ доданд ба АМИТ «Ховар» дар шуъбаи матбуот ва иттилооти Вазорати кишоварзии мамлакат.

Ёдошти тафоҳуми ҳамкорӣ 11 апрел зимни мулоқоти муовини Вазири кишоварзии Ҷумҳурии Тоҷикистон Нигина Анварӣ бо ҳайати Ҷумҳурии Корея таҳти роҳбарии раиси Ассотсиатсияи дӯстии Ҷумҳурии Корея бо давлатҳои Осиёи Марказӣ хонум Ли Ок Рён ба имзо расонида шуд.

Дар мулоқот зикр гардид, ки Вазорати кишоварзии Тоҷикистон барои ҷалби таҷриба ва инноватсияи Ҷумҳурии Корея дар соҳаҳои обёрии қатрагӣ, гармхонаҳои шакли кореягӣ, смартфермаҳо, рақамикононии соҳаҳои чорводорӣ, растанипарварӣ ва такмили ихтисоси мутахассисони соҳаи кишоварзии кишвар аз таҷрибаи Корея ва табодули донишҷӯён омода мебошад.

Ҷониби намояндагони Ҷумҳурии Корея барои дар доираи лоиҳаҳои ҳаракати «Семаул Ундон» дастгирӣ намудани соҳаи кишоварзии Ҷумҳурии Тоҷикистон изҳори омодагӣ намуд.

Ҳамчунин дар мулоқот дурнамои ҳамкории минбаъда ва дарёфти нави самтҳои ояндадори он баррасӣ гардид.

АКС: Вазорати кишоварзии ҶТ