МОРАТОРИЙ БА САНҶИШҲОИ ФАЪОЛИЯТИ СОҲИБКОРӢ. Ин иқдом барои ҷалби сармоягузории дохилию хориҷӣ ва ташкили ҷойҳои нави корӣ фазои мусоид фароҳам меорад

ДУШАНБЕ, 17.04.2022 /АМИТ «Ховар»/. Эълони мораторий ба санҷишҳои фаъолияти субъектҳои фаъолияти соҳибкорӣ дар рушди иқтисодиёти кишвар дар шароити авзои феълии сиёсию молиявии ҷаҳон ва ҷорӣ намудани таҳримҳои иқтисодӣ ба  бархе аз кишварҳои ҷаҳон   нақши муҳим дорад.

Чунин гуфт дар суҳбат ба хабарнигори АМИТ «Ховар» Марзия САИДЗОДА муовини якум, муовини ректор оид ба таълими Донишгоҳи давлатии тиҷорати Тоҷикистон Саймаҳмуд САИДОВ.

Моҳи марти соли 2022 бо мақсади дастгирии давлатии фаъолияти субъектҳои соҳибкорӣ Фармони Президенти Ҷумҳурии Тоҷикистон муҳтарам Эмомалӣ Раҳмон дар бораи эълон намудани мораторий ба ҳама намуди санҷишҳои фаъолияти субъектҳои соҳибкорӣ то 1 январи соли 2023 ба тасвиб расид. Дар ин санад фароҳам овардани фазои мусоид барои ҷалби сармоягузории дохилӣ ва хориҷӣ, ташкили ҷойҳои нави корӣ ва кам намудани санҷишҳои мақомоти назоратӣ пешбинӣ шудааст.

— Ҳукумати Ҷумҳурии Тоҷикистон солҳои гузашта бораи дастгирии фаъолияти субъектҳои соҳибкорӣ мораторийҳои гуногун низ ҷорӣ намуда буд, ки онҳо барои беҳтар гардидани натиҷаҳои фаъолияти соҳибкорӣ самараи дилхоҳ доданд. Фармони мазкур марҳилаи навбатии ҳифзи ҳуқуқҳои соҳибкорон маҳсуб мешавад. Дар давраи мораторий тамоми корхонаҳо, новобаста аз шакли моликияташон имконият пайдо мекунанд, ки бемамониат фаъолияти корияшонро идома диҳанд, — афзуд мавсуф.

Номбурда шарҳ дод, ки  дар заминаи мораторийи мазкур ҷалби сармоягузориҳои дохилию хориҷӣ барои иҷрои лоиҳаҳои пешбинишуда сурат мегирад. Дар ҳамаи минтақаҳои ҷумҳурӣ механизмҳои давлатии ташкили моратория ва пурра истифода бурдани захираҳои мавҷуда ташкил карда мешаванд.

— Дар шароити муосир, ки миёни бархе аз кишварҳои ҷаҳон муборизаҳо идома доранд, эълони моратория саривақтӣ ва бамаврид буда, он имкон медиҳад, ки мушкилоти ҷойдошта сари вақт бартараф карда шаванд. Дар санадҳои барномавии мамлакат ташкили ҷойҳои нави корӣ, таъмини бозори истеъмолӣ бо молҳои истеҳсоли ватанӣ, ташкили тавлидоти молҳои воридотивазкунанда ва ба содирот нигаронидашуда аҳамияти калон дорад. Дар ин замина эълони моратория ба ҳама намудҳои фаъолияти соҳибкорӣ барои беҳтар гардидани нишондиҳандаҳои истеҳсолӣ мусоидат менамояд, — тазаккур дод коршинос.

Ҳамсуҳбати мо  таъкид намуд, ки «аз ҷониби Пешвои миллат муҳтарам Эмомалӣ Раҳмон дар ҷумҳурӣ солҳои 2022-2026  Солҳои рушди саноат эълон гардидаанд. Мораторийи ҷоришуда барои иҷрои марҳилаи аввали вазифаи мазкур заминаи мусоид фароҳам меоварад. Таъмини ҳадафҳои стратегии мамлакат, аз ҷумла, таъмини амнияти озуқаворӣ дар шароити душвори имрӯза аз ҷумлаи вазифаҳои муҳимтарин ба ҳисоб меравад. Вобаста ба ин хоҷагиҳои деҳқонӣ аз татбиқи мораторий истифода бурда, имконият пайдо менамоянд, ки вақти барои санҷиш пешбинишударо барои зиёд намудани маҳсулоти кишоварзӣ сарф намоянд. Дар баробари ин соҳибкороне, ки ба ворид намудани хатҳои нави технологӣ машғуланд, субъектҳои хоҷагидориро бо технологияҳои замонавӣ таъмин намуда, барои истеҳсоли маҳсулоти ба рақобат тобовар сайъю кӯшиши зиёд ба харҷ медиҳанд».

Саймаҳмуд Саидов илова кард, ки давоми сол соҳибкорони мамлакат аз ҳамаи имтиёзҳои дар санадҳои меъёрӣ-ҳуқуқӣ пешбинишуда аз сабукиҳое, ки дар Кодекси андози Ҷумҳурии Тоҷикистон пешбинӣ гардидаанд, инчунин аз эълони мораторий ба ҳама намуди санҷишҳои субъектҳои соҳибкорӣ истифода намуда, ба нишондиҳандаҳои баланди истеҳсолӣ ноил ва бозори истеъмолиро бо маҳсулоти хушсифати ватанӣ ғанӣ менамоянд.

Бояд зикр намуд, ки соҳибкорӣ омили асосии истеҳсолот ва намуди бартариятдоштаи фаъолияти иқтисодиест, ки Ҳукумати кишвар ба ин самт таваҷҷуҳи хосса дорад. Дар робита ба ин 21 январи соли 2015 Президенти кишвар муҳтарам Эмомалӣ Раҳмон дар Паёмашон ба Парлумони мамлакат зикр намуда буданд, ки ҷалби ҳарчӣ бештари сармоя ва рушди бемайлони соҳибкориву бахши хусусӣ бояд ҳамчун самти афзалиятноки тараққиёти мамлакат густариш бахшида шавад.

Дар шароити муосир яке аз омилҳои асосии ташкили самараноки низоми иқтисоди бозорӣ ташаккул ва инкишофи фаъолияти соҳибкорӣ мебошад. Соҳибкориро метавон ҳамчун муҳаррики асосии рушди иқтисодию иҷтимоӣ, манбаи асосии таъмини  шуғли аҳолӣ ва шукуфоии ҷомеа арзёбӣ намуд.

АКСҲО аз манбаъҳои боз