Намоиши «Бунбаст»-и театри Лоҳутӣ дар Фестивали «Рӯзҳои театри Ҷуҷеноғлу»-и Туркия иштирок мекунад

ДУШАНБЕ, 07.04.2022 /АМИТ «Ховар»/. Ҳунармандони Театри давлатии академии драмавии ба номи Абулқосим Лоҳутӣ намоиши «Бунбаст»-ро дар Фестивали «Рӯзҳои театри Ҷуҷеноғлу» пешкаш менамоянд, иттилоъ дод ба АМИТ «Ховар» сардори Раёсати санъати Вазорати фарҳанги мамлакат Мирзоолим Саидов.

Фестивали «Рӯзҳои театри Ҷуҷеноғлу» аз 7 то 10 апрел дар шаҳри Истанбули Туркия доир мегардад.

Намоиши «Бунбаст» аз рӯйи намоиши драмнависи турк Тунҷер Ҷуҷеноғлу ва таҳияи Ҳунарпешаи мардумии Тоҷикистон Қурбони Собир ба саҳна гузошта шудааст.

Дар он нақшҳои асосиро Мавлона Наҷмуддинова, Гулмираи Аҳрорзод ва Аъзами Розиқ иҷро намудаанд.

Ёдовар мешавем, ки нахустнамоиши «Бунбаст» 5 апрел дар саҳнаи Театри давлатии академии драмавии ба номи Абулқосим Лоҳутӣ пешниҳоди дӯстдорони театр гардонида шуд. 

АКС: Театри давлатии академии драмавии ба номи А. Лоҳутӣ