Раиси вилояти Хатлон аз коргоҳҳои саноатии ноҳияи Восеъ боздид намуд

Апрель 23, 2022 11:10

ДУШАНБЕ, 23.04.2022 /АМИТ «Ховар»/. Бахшида ба ҷашни 35-солагии Истиқлоли давлатии Ҷумҳурии Тоҷикистон ва Солҳои рушди саноат эълон гардидани солҳои 2022-2026 дар Ҷамоати шаҳраки «Ҳулбук»-и ноҳияи Восеъ коргоҳи истеҳсоли мебели оҳанӣ ба фаъолият оғоз намуд, иттилоъ доданд аз мақомоти иҷроияи ҳокимияти давлатии вилояти Хатлон ба АМИТ «Ховар».

Зикр шуд, ки дар иртибот ба дастури Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади беҳтар намудани сатҳу сифати хизматрасонӣ дар маҳалҳо Раиси вилояти Хатлон Қурбон Ҳакимзода бо сафари корӣ аз ноҳияи Восеъ боздид намуда, бо фаъолияти коргоҳи истеҳсоли мебели оҳанӣ шинос гардид. Коргоҳи мазкур аз ҷониби соҳибкори маҳаллӣ Бахтиёр Султонов бунёд гардида, мизу курсии оҳанин истеҳсол менамояд. Иқтидори истеҳсолии коргоҳ истеҳсоли 6500 дона мизу курсӣ дар як сол буда, барои бунёди коргоҳи истеҳсолӣ соҳибкор тақрибан 90 ҳазор сомонӣ сарф кардааст.

Алҳол дар ин ҷо 6 сокини маҳаллӣ бо ҷойи кори доимӣ ва то 2500 сомонӣ маош таъминанад. Ин коргоҳ дар доираи амалисозии ҳадафи чоруми стратегӣ — саноатикунонии босуръати мамлакат бо мақсади таъсиси ҷойҳои нави корӣ, рушди иқтисодиёт ва истеҳсоли маҳсулоти рақобатпазири ивазкунандаи воридот сохта шудааст.

Раиси вилоят Қурбон Ҳакимзода ташаббуси соҳибкори маҳаллиро барои бо шуғли доимӣ фаро гирифтани коргарону мутахассисон ва дар ин замина беҳтар намудани сатҳи зиндагии мардум муҳиму саривақтӣ арзёбӣ намуд. Бунёди иншооти замонавӣ дар доираи дастгириҳои пайвастаи Ҳукумати Ҷумҳурии Тоҷикистон аз соҳибкории хурду миёна сурат гирифта, ба таъмини афзоиши истеҳсоли маҳсулот ва рушди иқтисодӣ мусоидат мекунад.

Қурбон Ҳакимзода инчунин аз корхонаи истеҳсоли маҳсулоти ширӣ ва хӯроки чорво, воқеъ дар шаҳраки Ҳулбук боздид намуд. Иқтидори солонаи корхонаи мазкур истеҳсоли то 30 тонна маҳсулот буда, дар доираи Солҳои рушди саноат бо ибтикори соҳибкори маҳаллӣ Илҳом Файзуллоев дар масоҳати 0,12 гектар сохта шудааст. Қурбон Ҳакимзода изҳор намуд, ки соҳибкории хурду миёна дар пешбурди иқтисодиёти ноҳияи Восеъ нақши асосӣ дошта, яке аз сарчашмаҳои асосии даромади буҷети маҳаллӣ ва таъсиси ҷойҳои нави корӣ мебошад.

Таъкид шуд, ки ноҳияи Восеъ барои рушди соҳаи саноат имконияти фаровон дошта, дар ҳудуди ноҳия захираҳои зиёди ашёи хом, махсусан намак ва маҳсулоти кишоварзӣ мавҷуд аст.

Бунёди корхонаву коргоҳҳои нави саноатӣ ва ба роҳ мондани коркарди пурраи ашёи хоми маҳаллӣ ба таъсиси ҷойҳои нави корӣ, афзоиши истеҳсоли маҳсулоти ивазкунандаи воридот ва ба содирот нигаронидашуда мусоидат намуда, ба рушди ноҳия такони ҷиддӣ мебахшад.

АКС: Мақомоти иҷроияи ҳокимияти давлатии вилояти Хатлон

Апрель 23, 2022 11:10

Хабарҳои дигари ин бахш

Дар шаҳри Ҳисор корхонаи саноатии истеҳсоли бомпӯшҳои азбестӣ мавриди истифода қарор гирифт
Дар ноҳияи Кушониён пули дарозиаш 85-метра ба истифода дода шуд
Муовини Сарвазири мамлакат Сулаймон Зиёзода бо ҳолати корҳои кишоварзии ноҳияи Шуғнон шинос шуд
Масъалаи дурнамои ҳамкории миёнамуҳлат миёни Тоҷикистон ва Бонки АвруОсиёи Рушд баррасӣ гардид
ТИБҚИ СУПОРИШИ ПРЕЗИДЕНТ. Гурӯҳи кории Вазорати кишоварзӣ дар сафари корӣ дар ВМКБ қарор дорад
Имсол вилояти Суғд дар майдони беш аз 30 ҳазор гектар кишти такрорӣ мегузаронад
«Бонки Эсхата» додани қарзро то 100 000 сомонӣ аз сар гирифт
«Саноатсодиротбонк» дар ду сол ба соҳаҳои иқтисодиёти Тоҷикистон 224 млн сомонӣ қарз ҷудо намуд
Боз як кишвари дигар хостори харидории неруи барқ аз Тоҷикистон гардид
Иқтидори сайёҳии Тоҷикистон дар «Seoul International Travel Fair 2022» муаррифӣ шуд
Дар Намоишгоҳи байналмилалии «Тоҷикистон-2022» беш аз 70 корхонаи дохиливу хориҷӣ маҳсулоти худро манзур намуданд
ТИБҚИ СУПОРИШИ ПРЕЗИДЕНТ. Таҷдиди роҳи мошингарди Қалъаи Хумб то дарвозаи Рӯшон расман оғоз гардид