Раванди татбиқи «Барномаи рушди иҷтимоию иқтисодии шаҳри Ҳисор барои солҳои 2021-2025» баррасӣ шуд

Апрель 11, 2022 11:12

ДУШАНБЕ, 11.04.2022 /АМИТ «Ховар»/. Ҷараёни татбиқи  «Барномаи рушди иҷтимоию иқтисодии шаҳри Ҳисор барои солҳои 2021-2025» дар маҷлиси васеи корӣ таҳти раёсати Раиси шаҳри Ҳисор Қосим Роҳбар баррасӣ шуд. Дар ин бора АМИТ «Ховар» бо истинод ба Мақомоти иҷроияи ҳокимияти  давлатии шаҳри Ҳисор иттилоъ медиҳад.

Мақсади асосии барнома ба рушди иҷтимоию иқтисодии шаҳр, баланд бардоштани сатҳи зиндагии мардум нигаронида шуда, тавассути истифодаи самараноки иқтидору захираҳо, ҷорӣ намудани технологияи муосир ва дар ин замина муҳайё намудани ҷойҳои нави корӣ амалӣ карда мешавад.

Барнома дар умум 654 лоиҳаро дар соҳаҳои саноат,  кишоварзӣ, сайёҳӣ, нақлиёт ва роҳ, соҳибкорӣ, маориф ва илм, тандурустӣ, фарҳанг ва варзиш, таъминот бо оби нӯшокӣ, хоҷагии манзилӣ-коммуналӣ, ҳифзи муҳити зист, таъминот бо барқ, ҳолатҳои фавқулода, идоракунии раванди барнома, манзил ва сохтмон, алоқа ва фазои иттилоотӣ ба маблағи 1025,9 миллион сомонӣ, аз ҷумла соли 2021 амалишавии 102 лоиҳа ба маблағи 83,39 миллион сомонӣ ва оғоз гардидани 524 лоиҳа ба маблағи 265,17 миллион сомониро дар бар мегирад.

Раиси шаҳр нисбат ба ҷой доштани камбудиҳои ҷузъӣ дар қабули қарорҳои вобаста ба барнома ва номутобиқатӣ дар баъзе аз бандҳои он, бахусус дар самти маориф, инчунин саҳланкорӣ дар таҳлили стратегияи соҳаҳои асосӣ, ки ба рушди босуръати иқтисодии шаҳр таъсири мусбат мерасонад, эрод гирифта, барои ислоҳи онҳо таклифу пешниҳоди муфид  намуд.

Бобҳои алоҳидаи барнома дар соҳаҳои иқтисодӣ, иҷтимоӣ, инфрасохтор, ҳифзи муҳити зист, ҳолатҳои фавқулода таҳлилу баррасӣ гардида, аз ҷумла дар соҳаи кишоварзӣ номукаммалии он дар масъалаҳои истифодаи заминҳои кишоварзӣ, истеҳсоли маҳсулоти кишоварзӣ ва шаклҳои моликият, самараву даромаднокӣ, таъминоти моддию техникӣ ва ғайраҳо дар 5 соли амали Барнома рӯнамо гардид.

Инчунин ҷадвали лоиҳаҳои иҷро ва оғозгардида дар самтҳои соҳаҳои саноат, кишоварзӣ, соҳибкории хурду миёна, манзил ва сохтмон, сайёҳӣ,  рушди шуғли пурмаҳсул, тандурустӣ ва ҳифзи иҷтимоии аҳолӣ, маориф, фарҳанг, варзиш, таъминот бо оби ошомиданӣ, манзилию коммуналӣ, таъминот бо барқ, нақлиёт ва роҳ, алоқа ва иттилоот, ҳифзи муҳити зист, идоракунии хатари офатҳои табиӣ, идоракунии раванди татбиқи барнома пешниҳод гардида, оид ба лоиҳаҳои иҷро нагардида дар соли 2021 ва маблағҳои азхуднашуда маълумот дода шуд. Зикр шуд, ки соли 2022 тибқи барнома 3 лоиҳа бо маблағи 5 миллиону 301 ҳазор сомонӣ бояд оғоз гарданд.

Бо хулосаи раиси шаҳр, соли 2021 шумораи лоиҳаҳое, ки оғоз нагардиданд, 357 адад буда, маблағи он 181,1 миллион сомониро ташкил медиҳад, ки аз ҷониби масъулин андешидани тадбирҳои заруриро тақозо менамояд.

Ҳамчунин зикр шуд, ки дар раванди таҳияи барнома ба шитобкорӣ роҳ дода, талаботи қарори Ҳукумати Ҷумҳурии Тоҷикистон дар бораи «Тартиби таҳияи барномаҳои рушди иҷтимоию иқтисодии маҳалҳо» ба таври комил риоя нагардидааст.

Қосим Роҳбар аз сатҳи пасти фаъолияти аъзои гурӯҳи корӣ, арзёбии барнома аз ҷониби масъулин дар гузаронидани мониторингҳо, пешниҳоди маълумот ба Мақомоти иҷрояи ҳокимияти давлатии шаҳри Ҳисор ва Кумитаи рушди маҳали назди Президенти Ҷумҳурии Тоҷикистон изҳори нигаронӣ намуд.

Дар анҷом ба гурӯҳи корӣ барои ислоҳ ва такмили барнома дар мувофиқа бо вазоратҳои марбута 6 моҳ муҳлат дода шуд.

АКСҲО: Мақомоти иҷроияи ҳокимияти давлатии шаҳри Ҳисор

Апрель 11, 2022 11:12

Хабарҳои дигари ин бахш

Ҳайати Тоҷикистон дар иҷлосияи 36-уми Шурои байнидавлатии обуҳавошиносии кишварҳои ИДМ иштирок намуд
Судяҳои Тоҷикистон дар Конфронси байналмилалии антикризисӣ дар Қазоқистон иштирок намуданд
Масъалаҳои ислоҳоти судӣ байни Суди Олии Ҷумҳурии Тоҷикистон ва Барномаи рушди СММ баррасӣ гардиданд
ЗАНОН ВА СИЁСАТИ МИЛЛӢ. Дар ин мавзуъ ҳамоиши вакилзанон доир шуд
Муносибатҳои сиёсию иқтисодӣ ва фарҳангии Тоҷикистон бо давлатҳои Аврупо баррасӣ гардид
Дар доираи иҷлосияи 80-уми Маҷмаи Умумии Созмони Милали Муттаҳид масъалаҳои соҳаи тандурустӣ баррасӣ гардиданд
Доир ба нақши Мактаби давлатдории Эмомалӣ Раҳмон дар таҳкими маориф ва рушди он конференсия баргузор шуд
Дар ноҳияи Рӯдакӣ ҷаласаи Шурои муросо баргузор гардид
Дар Тоҷикистон маъракаи иммунизатсия бар зидди вируси папилломаи одам оғоз мегардад
Дурнамои ҳамкории Тоҷикистон ва Туркия дар самти меҳнат ва шуғли аҳолӣ баррасӣ гардид
Вобаста ба баланд бардоштани тавонмандсозӣ барои самаранокии идораи давлатӣ ҳамоиш доир шуд
«ЗАНОН ДАР ИҚТИСОДИ «САБЗ» ВА РАҚАМӢ». Дар шаҳри Гулистон Форуми минтақавии Муколамаи занони Осиёи Марказӣ доир шуд