БА ПЕШВОЗИ 35-СОЛАГИИ ИСТИҚЛОЛИ ДАВЛАТӢ. Дар Роштқалъа бунгоҳи тиббӣ ва корхонаи коркарди мӯинаи бузи кашмирӣ ба истифода дода мешаванд

Май 11, 2022 11:20

ХОРУҒ 11.05.2022 /АМИТ «Ховар»/. Раиси Вилояти Мухтори Кӯҳистони Бадахшон Алишер Мирзонабот дар доираи сафари корӣ ба ноҳияи Роштқалъа аз ҷараёни корҳои сохтмонӣ  дар бунгоҳи тиббии деҳаи Миденвед дидан  намуд, хабар медиҳад мухбири минтақавии АМИТ «Ховар» Файз МИРАСАН.

Зикр шуд, ки дар ин русто 58 хоҷагӣ зиндагӣ дошта,  ба чунин муассисаи тиббӣ ниёз доранд. Корҳои сохтмонӣ дар бунгоҳи тиббӣ аз моҳи августи соли 2021 оғоз гардида,  Ҷамъияти дорои масъулияти маҳдуди «Шариф ШС» бо ҷалби 10 нафар коргарони маҳаллӣ талош дорад, ки биноро дар остонаи ҷашни Истиқлоли давлатӣ мавриди истифода қарор диҳад. Бунгоҳи мазкур дорои 5 ҳуҷраи корӣ буда, дар назар аст, ки бо таҷҳизоти муосири тиббӣ ҷиҳозонида шавад.

Бахшида ба Солҳои рушди саноат дар Тоҷикистон (2022-2026) аз ҷониби Барномаи ҷонибдории инкишофи иҷтимоии манотиқи кӯҳистон дар ноҳияи Роштқалъа бо харҷи 6 миллион сомонӣ сохтмони корхонаи коркарди мӯинаи бузи кашмирӣ ва васлу насби таҷҳизот идома дорад.  Бинокорон бунёди биноро ба анҷом расонида, мутахассисон ба васлу насби таҷҳизот шурӯъ намудаанд.

Зимни боздид Раиси Вилояти Мухтори Кӯҳистони Бадахшон Алишер Мирзонабот аз ҷараёни васлу насб ва  хатҳои коркарди технологияи мӯинаи бузҳои ангорӣ ё кашмирӣ изҳори қаноатмандӣ намуда, аз масъулини мақомоти иҷроияи ҳокимияти давлатии ноҳия талаб кард, ки ба коргоҳ мутахассисони варзидаи маҳаллӣ ҷалб намоянд. Зеро маҳсулоти ин корхона асосан барои содирот ба берун аз кишвар пешбинӣ шудааст.

Қаблан мӯинаи бузи кашмириро барои коркард ба кишвари ҳамсояи Афғонистон интиқол дода, танҳо пас аз ин онро ба муштариёни хориҷии худ пешниҳод менамуданд. Ҳоло коргарон имконият пайдо кардаанд, ки  дар бозори дохилию хориҷӣ маҳсулоти тайёрро ба фурӯш гузоранд. Дар оғози фаъолият коргоҳи мазкур 15 нафар сокинони маҳаллиро, ки қаблан ба омӯзиш фаро гирифта шуда буданд, ба кор ҷалб карда, батадриҷ  теъдоди коргарон зиёд хоҳад шуд.

Ба гуфтаи мутахассисони соҳа, корхона дар як сол то 18 тонна мӯинаи бузи ангорӣ ё кашмириро коркард намуда, аз он риштаи аълосифати аз лиҳози экологӣ тоза тавлид менамояд. Бояд зикр намуд, ки чанд сол пеш барои коркарди риштаи мӯинаи ангорӣ ба ин водӣ таҷҳизоти хурди коркарди мӯина аз   хориҷи кишвар интиқол дода шуд, ки талаботи корхонаро қонеъ намекунонид. Зеро бо афзоиши шумораи хоҷагиҳои махсуси парвариши бузҳои ангорӣ дар ноҳия маҳсулоти хом низ афзуда, зарурати бунёди корхонаи иқтидораш баландтарро ба миён овард.

Ҳоло корхона ба хариди ду намуди мӯина бо нархҳои 80 ва 140 сомонӣ барои ҳар килограмм аз хоҷагиҳои шахсию фермаҳои чорводорӣ машғул аст. Мутахассисони соҳаи чорводорӣ мегӯянд, ки  бунёд гардидани чунин иншооти саноатӣ дар ояндаи наздик на танҳо садҳо  нафар сокинони маҳаллиро бо ҷои нави кор ва маоши арзанда таъмин мекунад, балки аз ҳисоби он парвариши бузҳои кашмирӣ дар ноҳияҳои дигари вилоят низ ба таври бесобиқа рушд хоҳад кард.

Дар айни замон 20 дастгоҳи ресандагӣ  аз Ҷумҳурии Мардумии Чин  ворид ва васлу насб шуда, рӯзҳои наздик 8 дастгоҳи дигари истеҳсолӣ аз давлатҳои пешрафтаи аврупоӣ ба ин корхона интиқол меёбад.

АКС: АМИТ «Ховар»

Май 11, 2022 11:20

Хабарҳои дигари ин бахш

35-СОЛАГИИ ИСТИҚЛОЛИ ДАВЛАТӢ. Шаҳри Турсунзода гулзор гардидааст
МАСЛИҲАТИ МУТАХАССИС. Қулфинай сарчашмаи асосии витамини С мебошад
Дар Тоҷикистон дар заминҳои лалмӣ шолӣ парвариш карда мешавад
Муносиботи Тоҷикистон ва Чин бар руҳияи дӯстӣ, робитаҳои неки ҳамсоягию таърихӣ ва шарикии стратегӣ асос ёфтаанд
Роҳбарони ниҳодҳои ҳифзи муҳити зисти Созмони Ҳамкории Шанхай дар Остона масъалаҳои экологӣ ва тағирёбии иқлимро баррасӣ намуданд
Президенти Тоҷикистон ба роҳбарони шаҳру ноҳияҳо супориш доданд, ки ҷиҳати иҷрои саривақтии нақша-чорабиниҳои ҷашни 35-солагии Истиқлоли давлатӣ тадбирҳои зарурӣ андешанд
Президенти Тоҷикистон аз он изҳори нигаронӣ намуданд, ки соли 2023 дар Хатлон 900 гектар замини корами обӣ аз гардиши кишоварзӣ берун мондааст
Дар Душанбе бахшида ба Рӯзи кормандони соҳаи стандартизатсия ва метрология конфронси ҷумҳуриявӣ доир шуд
25 МАЙ-РӮЗИ КОРМАНДОНИ СОҲАИ СТАНДАРТИЗАТСИЯ ВА МЕТРОЛОГИЯ. «Тоҷикстандарт» ташхиси сифати молу маводро тибқи меъёрҳои замонавӣ таъмин менамояд
35-СОЛАГИИ ИСТИҚЛОЛИ ДАВЛАТӢ. Дар ноҳияи Данғара як қатор иншооти таъйиноти гуногун ба истифода дода шуданд
АЗ ИФТИТОҲИ ГУЗАРГОҲИ САРҲАДИИ «КУЛМА ҚАРОСӮ» 20 СОЛ СИПАРӢ ШУД. Нақши он дар тақвияти робитаҳои тиҷоратии Тоҷикистон ва Чин муассир аст
Пешвои миллат Эмомалӣ Раҳмон бо рафти сохтмони меҳмонхонаи муосир дар маркази ноҳияи Данғара шинос шуданд