Дар Тоҷикистон ҷамъоварии ҳосили пилла ҷараён дорад

Май 18, 2022 14:14

КӮЛОБ, 18.05.2022. /АМИТ «Ховар»/. Хоҷагидорони Ҷамоати деҳоти Зиракии шаҳри Кӯлоб дар айни замон ба ҷамъоварии ҳосили кирмак машғул мебошанд, иттилоъ дод мудири бахши матбуоти Мақомоти иҷроияи ҳокимияти давлатии шаҳри Кӯлоб Далер Шарифов.

Кирмакпарварӣ ба мисли дигар соҳаҳои кишоварзӣ дар мамлакат мавқеи асосиро доро мебошад. Асоси пилларо нахи он ташкил медиҳад. Он нахи абрешим, ки аз пилла гирифта мешавад, аз дигар нахҳои табиӣ фарқи калон дорад. Фарқияти он дар мустаҳкамӣ, хусусияти ёзишхӯрӣ ва аз ҷиҳати экологӣ тоза будани он зоҳир мегардад. Инчунин аз нахи абрешим зиёда аз 330 номгӯй маҳсулот истеҳсол мешавад.

Тавре намояндаи ҶСК «Пиллаи тоҷик» дар шаҳру деҳоти Кӯлоб Давлат Шеров иброз дошт, «мувофиқи дурнамо, 63 қуттӣ тухми кирмак ба 4 ҷамоат тақсим гардида буд, ки тибқи нақшабандӣ, бояд 2 тоннаву 500 кг пилла ҷамъоварӣ карда шавад. Ҳоло хоҷагидорон ба ҷамъоварии ҳосили он машғул мебошанд».

Мавриди зикр аст, ки дар мамлакат «Барномаи рушди соҳаҳои кирмакпарварӣ ва коркарди пилла дар Ҷумҳурии Тоҷикистон барои солҳои 2020-2024» амал мекунад, ки мақсади асосии он фароҳам овардани шароит ва замина барои рушди босуботи соҳаҳои кирмакпарварӣ ва коркарди пилла дар асоси коркарди ашёи хоми маҳаллӣ, таъмини шуғли аҳолӣ, таҳияи механизмҳои иқтисодӣ ва омилҳои ҳавасмандгардонӣ барои ҷалби сармоягузориҳои бевосита ба соҳа ба шумор меравад.

Сокини Ҷамоати деҳоти Зиракӣ Бибитош Муродова беш аз 30 сол боз ба парвариши кирмак машғул буда, аз ин ҳисоб ҳамасола зиёда аз 100 килограмм пилла ба даст оварда, даромади хуби иқтисодӣ мегирад.

Ба гуфти кирмакпарварони ҷамоати мазкур, парвариши кирмак нигоҳубини пайваста ва дар вақти муайян бо ғизо таъмин намуданро талаб менамояд.

Сокини деҳаи Зарқалъаи Ҷамоати деҳоти Зиракӣ Идимо Бобулова беш аз 25 сол боз ба парвариши кирмак машғул буда, хамасола дар мавсим дар парваришу истеҳсол ва иҷрои нақшаи дурнамои ҷамоат саҳм мегузорад.

Соҳаи кирмакпарварӣ ва коркарди пилла рукни муҳими кишоварзӣ маҳсуб мешаванд. Зеро маҳз иқлими мусоиди Тоҷикистон имконият фароҳам овардааст, ки сокинон ба ин соҳа шуғл варзида, маҳсулоти истеҳсолнамудаашонро пешкаши бозори дохилӣ ва ҷаҳонӣ гардонанд.

Парвариши кирмаки пилла аллакай дар хоҷагиҳо ба охир расида, хоҷагидорон ба ҷамъоварии ҳосили пилла оғоз намуданд.

Бо парваришу нигоҳубини дурусти кирмак дар хоҷагиҳои мамлакат сафи корхонаҳои саноатӣ зиёд гардида, дар таъмини бозор бо маҳсулоти абрешимӣ ва дастрасӣ ба ашёи хоми аълосифат саҳми назаррас мегузоранд.

АКС: Мақомоти иҷроияи ҳокимияти давлатии шаҳри Кӯлоб

Май 18, 2022 14:14

Хабарҳои дигари ин бахш

АЗ ИФТИТОҲИ ГУЗАРГОҲИ САРҲАДИИ «КУЛМА ҚАРОСӮ» 20 СОЛ СИПАРӢ ШУД. Нақши он дар тақвияти робитаҳои тиҷоратии Тоҷикистон ва Чин муассир аст
РӮЗИ БАЙНАЛМИЛАЛИИ МОРХӮР. Бахшида ба рӯзи ин ҳайвони нодир конференсия доир шуд
24 МАЙ- РӮЗИ БАЙНАЛМИЛАЛИИ БУЗИ МОРХӮР. Шумораи бузи кӯҳии пармашох–Морхӯр дар Тоҷикистон беш аз 6000 сарро ташкил медиҳад
Бонки ҷаҳонӣ талошҳои Тоҷикистонро дар самти тавсеаи ҳисоббаробаркунии ғайринақдӣ ҷонибдорӣ менамояд
Таваҷҷуҳи соҳибкорони Чин ба бунёди коргоҳ ва корхонаҳои истеҳсолӣ дар вилояти Хатлон меафзояд
Бар асари боронҳои пуршиддат дар Тоҷикистон 133 километр роҳ ва 14 пул зери об мондааст
КУМАКИ ПРЕЗИДЕНТИ ТОҶИКИСТОН БА РОҲДОРОН. Ба муассисаҳои хоҷагии роҳ ва нигоҳдории роҳҳои автомобилгарди минтақаи Рашт техникаи нав дастрас гардид
Саридораи геологияи назди Ҳукумати Ҷумҳурии Тоҷикистон соҳиби дастгоҳи замонавии рақамӣ шуд
Тағйирот ба Қонун «Дар бораи минтақаҳои озоди иқтисодӣ». Ҳадафи ниҳоӣ афзоиш додани содирот ва коҳиш додани воридот аст
Ҳайати Агентии назорати давлатии молиявӣ ва мубориза бо коррупсияи Тоҷикистон дар конференсияи минтақавӣ дар Тошканд иштирок намуд
Тоҷикистон ва Чин барои сармоягузорӣ ба кони ангишти «Шӯроб» созишнома ба имзо расониданд
Тоҷикистон ва Озарбойҷон ҳамкории афзалиятнокро тақвият медиҳанд