Алиризо Баҳромов дар Чемпионати Осиё оид ба гӯштин медали нуқра ба даст овард

ДУШАНБЕ, 05.07.2022 /АМИТ «Ховар»/. Дар рӯзи ниҳоии Чемпионати Осиё оид ба гӯштин миёни наврасони то 15-сола варзишгари тоҷик Алиризо Баҳромов медали нуқра ба даст овард. Дар ин бора АМИТ «Ховар» бо истинод ба Кумитаи миллии олимпии Тоҷикистон хабар медиҳад.

Алиризо дар вазни -68кг-и гуштини тарзи озод дар ду давр бар варзишгарони Қирғизистон (Элхан Эрмеков) ва Қазоқистон (Ербол Маратулӣ), инчунин дар нимфинал бар варзишгари Ҳиндустон (Нишант Руҳил) ғалаба карда, ба финал баромад. Ӯ дар финал аз варзишгари Эрон Ризо Алиакбар Афшор мағлуб гардида, сазовори медали нуқра шуд.

Варзишгари дигар, бародари Алиризо, Идрис Баҳромов дар вазни — 48 кг гӯштин гирифт, вале аз медал бенасиб монд.

Чемпионати Осиё оид ба гӯштин миёни наврасон (U15) ва ҷавонон (U20) дар шаҳри Манамаи Баҳрайн то 10 июл идома меёбад.

Қувваозмоиҳо миёни наврасон ба анҷом расид.

Шуруъ аз имрӯз, 5 июл то 10 июл қувваозмоиҳо миёни ҷавонон баргузор мешавад. Дар ин синну сол кишвари моро се варзишгар — Фирӯз Мирзораҷабов (-60кг), Шероз Очилов (-72 кг) дар гўштини юнонӣ-римӣ ва Саидасан Ашрафхонов (-74) дар гӯштини озод намояндагӣ мекунанд.

АКС: КМО Тоҷикистон