Консули генералии Тоҷикистон дар Алмаато бо фаъолони диаспораи тоҷикони шаҳри Тараз мулоқот намуд

ДУШАНБЕ, 08.07.2022 /АМИТ «Ховар»/. 7 июл дар ҳошияи сафари корӣ ба вилояти Ҷамбул вохӯрии Консули генералии Ҷумҳурии Тоҷикистон дар шаҳри Алмаато Равшан Бобохонзода бо фаъолони диаспораи тоҷикони шаҳри Тараз баргузор гардид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Дар рафти вохӯрӣ ба таваҷҷуҳи ҳозирин маълумот дар бораи муносибатҳои дӯстона ва шарики стратегии Тоҷикистону Қазоқистон, ҳамчунин дастовардҳои ду кишвар дар соҳаи тиҷоративу иқтисодӣ расонида шуд.

Баъдан консули генералӣ ба саволҳои ҳозирин ҷавобҳои мушаххас дод. Ҳамватанон бештар дар бораи хизматрасониҳои консулӣ, ҳуқуқӣ ва мушкилиҳо ҳангоми ҳуҷҷатгузорӣ барои гирифтани иҷозати иқомати доимии Ҷумҳурии Қазоқистон муроҷиат намуданд.

Дар охири вохӯрӣ консули генералӣ саҳми ҳамватанони бурунмарзӣ дар ташкил ва ҷашнгирии идҳои миллию давлатиро дар кишвари иқомат муҳим арзёбӣ намуд.

Акс: ВКХ ҶТ