Дар Бадахшон масъалаи фаъолгардонии қитъаи Минтақаи озоди иқтисодии Ишкошим баррасӣ гардид

ДУШАНБЕ, 02.08.2022 /АМИТ «Ховар»/. Дар Вилояти Мухтори Кӯҳистони Бадахшон оид ба фаъолгардонии қитъаи Минтақаи озоди иқтисодии Ишкошим дар маҳаллаи Теми шаҳри Хоруғ ва вусъати корҳои сохтмонӣ дар ин мавзеъ миёни Раиси вилоят Алишер Мирзонабот ва Вазири рушди иқтисод ва савдои Ҷумҳурии Тоҷикистон Завқӣ Завқизода табодули афкор сурат гирифт, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии ВМКБ.

Раиси вилоят иброз дошт, ки бо дастгирии Сарвари давлат ҳоло ВМКБ ба марҳилаи нави рушд ворид гардида, корҳои созандагиву бунёдӣ авҷи тоза пайдо намудаанд.

Ҳамзамон Завқӣ Завқизода бобати бунёди иншооти азими саноатӣ дар вилоят, аз ҷумла сохтмони НБО-и «Себзор» дар ноҳияи Роштқалъа, ҷалби сармояи дохилию хориҷӣ ба иқтисодиёти кишвар, аз ҷумла ВМКБ ва ба кор даровардани иқтидорҳои нави истеҳсолӣ дар вилоят ибрози андеша намуд.

Тарафҳо роҷеъ ба тавсеаи ҳамкории минбаъда дар самти таҳкими заминаҳои иқтисодии вилоят изҳори умед намуданд.

Акс: МИҲД-и ВМКБ