МОРО ДАР ЗИЁДА АЗ 100 ДАВЛАТИ ҶАҲОН МЕХОНАНД. Дар шашмоҳаи аввали соли 2022 аз сомонаи АМИТ «Ховар» беш аз 2 миллион маротиба дидан кардаанд

Август 18, 2022 12:19

ДУШАНБЕ, 18.08.2022 /АМИТ «Ховар»/. Дар 6 моҳи аввали соли 2022 аз сомонаи АМИТ «Ховар» 2 миллиону 066 ҳазору 299 маротиба дидан кардаанд, ки нисбат ба ҳамин давраи соли 2021 52 063 маротиба ё худ 2,5 фоиз зиёд мебошад. Чунин маълумотро ба мо хадамоти русии liveinternet.ru Русия, ки ба ҷамъоварӣ ва таҳлили ченакҳои самаранокии сомонаҳо машғул аст, пешниҳод намуд.

Ҳамчунин дар ин давра теъдоди воридшавандагон ба сомонаи мо ба 365 ҳазору 375 нафар расид. Ин нишондиҳанда нисбат ба ҳамин давраи соли  гузашта 124 ҳазору 453 нафар ё беш аз 34 фоиз зиёд мебошад.


Тибқи маълумот, шумораи  воридшавандагон аз ҳисоби мардон  68,1% ва занон – 31,9%-ро ташкил медиҳад. Аз ин теъдод ба синни аз 18-сола поён — 1,9%,  аз 18 то 24-сола – 23,6%, аз 25 то 34-сола — 26,8%, аз 35 то 44-сола – 31,6% ва аз 44-сола боло – 16,1% рост меояд.


Моро дар зиёда аз 100 давлати ҷаҳон мехонанд. Аз ҷумлаи онҳо дар шашмоҳаи  аввали соли 2022 дар 50 кишвар аз ҳама бештар ба сомонаи мо ворид шудаанд. Ба даҳгонаи аввал Тоҷикистон (77,8%), Русия (5,9%), Олмон (2,3%), Фаронса (1,8%), ИМА (2,3%), Британияи Кабир (1,1%), Нидерланд (0,8%), Узбекистон (1,1%), Лаҳистон (0,6%) ва Қазоқистон (0,7%) дохил мешаванд.


Сохтори гузариш ба саҳифаҳои сомона чунин аст: дохилӣ  – 55,1%, тавассути  шабакаҳои  иҷтимоӣ – 27,5%, ба воситаи саҳифаҳои иловагӣ – 11,6%, тариқи системаҳои  ҷустуҷӯӣ – 5% ва аз сомонаҳои дигар – 0,7%.


Албатта, ин теъдоди корбарони интернет ба барномаҳои Радиои «Ховар» низ дар басомади 101,5 FM дастрасӣ доранд, ки онро метавон дар сомонаи www.khovar.tj мустақиман гӯш кард.

Ёдовар мешавем, ки АМИТ «Ховар» мақомоти  марказии иттилоотии Тоҷикистон  ва яке аз агентиҳои маъруфи иттилоотӣ дар минтақа ва фазои пасошӯравӣ мебошад.

АМИТ «Ховар» имрӯз ягона агентии иттилоотӣ дар ҷумҳурӣ мебошад, ки мақоми расмӣ дорад. Он дорои ҳуқуқи эксклюзивии ҷамъоварӣ ва паҳн намудани иттилоот ва санадҳои расмӣ оид ба фаъолияти Президенти Ҷумҳурии Тоҷикистон, Маҷлиси Олии Ҷумҳурии Тоҷикистон ва Ҳукумати Ҷумҳурии Тоҷикистон, инчунин шарҳ додани онҳо мебошад.

Агентӣ таъминкунандаи боэътимоди иттилооти саривақтӣ ва муътамад оид ба рӯйдодҳои тамоми минтақаҳои Тоҷикистон мебошад. Истифодабарандагони иттилооти агентии «Ховар» на танҳо рӯзномаву маҷаллаҳо, телевизион ва радио мебошанд, балки маводи паҳнкардаи агентӣ аз ҷониби истифодабарандагони сомонаҳои интернетӣ, сафоратхонаҳои хориҷӣ, доираҳои тиҷоратӣ, вазорату идораҳо, ташкилоти ҷамъиятӣ ва шахсони алоҳида дар Тоҷикистон ва берун аз он фаъолона истифода мешаванд.

Иттилооти АМИТ «Ховар» бо забонҳои тоҷикӣ, русӣ, англисӣ, арабӣ ва ҳуруфоти форсӣ паҳн мегардад. Агентӣ бо агентиҳои иттилоотии пешрафта, хадамот ва марказҳои ҷаҳонӣ ва минтақавӣ робитаҳои мутақобилан судманд дорад.

 

P.S. Мо ба тамоми истифодабарандагони сомона ва ҳамаи онҳое, ки навиштаҷоти моро мехонанд ва дар ин самт фаъоланд, изҳори миннатдорӣ менамоем. Ин барои мо як навъ арзёбии фаъолияти хеш буда, моро водор месозад, ки дар оянда боз ҳам беҳтар  фаъолият намоем.

Акрамхоҷа АКБАР,
АМИТ «Ховар»

АКС: АМИТ «Ховар»/Тоҳир САИД

Август 18, 2022 12:19

Хабарҳои дигари ин бахш

Кумита оид ба таҳсилоти ибтидоӣ ва миёнаи касбӣ бахшида ба Рӯзи Ваҳдати миллӣ конфронс доир намуд
Дар Агентии суғуртаи иҷтимоӣ ва нафақа 28-солагии Рӯзи Ваҳдати миллиро ҷашн гирифтанд
Дар Душанбе вобаста ба иҷрои Барномаи миллии ташаккули тарзи ҳаёти солим ҷаласа баргузор гардид
Дар Душанбе Конфронси ҷумҳуриявӣ таҳти унвони «Ваҳдат – мароми модарон» баргузор шуд
Дар Душанбе вобаста ба хизматрасониҳои молиявӣ ва ҳуқуқи соҳибкорон конфронси ҷумҳуриявӣ доир гардид
Сафари Корвони «Модарони ваҳдатсаро» ба шаҳру ноҳияҳои ҷумҳурӣ оғоз гардид
Дар Озарбойҷон Конфронси байналмилалии ҳизбҳои сиёсӣ баргузор шуд
Фестивали дӯстии ҷавонон-2025 оғоз шуд
Бахшида ба Рӯзи ҷаҳонии донори хун дар Тоҷикистон маъракаи хунсупорӣ гузаронида шуд
Дар Женева масъалаи кушодани марказҳои раводиди давлатҳои Иттиҳоди Аврупо дар Тоҷикистон баррасӣ гардид
Бахшида ба ҷашни Ваҳдати миллӣ Корвони «Модарони ваҳдатсаро» ташкил мегардад
Дар Женева ҳамкорӣ байни Тоҷикистон ва Созмони байналмилалии меҳнат баррасӣ гардид