НАМОИШГОҲИ БАЙНАЛМИЛАЛИИ СОХТМОНИИ «TAJBUILD». Он иқтидору зарфияти бинокории Тоҷикистон ва кишварҳои хориҷиро муаррифӣ менамояд

ДУШАНБЕ, 02.08.2022 /АМИТ «Ховар»/. Беш аз 50 ширкати бонуфузи сохтмонии ватанию хориҷӣ дар нахустин Намоишгоҳи байналмилалии сохтмонии «TajBuild», ки 4, 5 ва 6 август дар Қасри «Манеж»-и шаҳри Душанбе баргузор мегардад, имконият ва иқтидору зарфияти худро ба намоиш мегузоранд.

Нахустин Намоишгоҳи байналмилалии сохтмонии «TajBuild» бо мақсади рушди соҳаи сохтмону меъморӣ ва саноат дар доираи Солҳои рушди саноат эълон гардидани солҳои 2022-2026 дар Ҷумҳурии Тоҷикистон ва иҷрои дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати рушди соҳаи сохтмон ва меъморӣ бо ибтикори Ассотсиатсияи ширкати «TajBuild» дар ҳамкорӣ бо Палатаи савдо ва саноати Ҷумҳурии Тоҷикистон гузаронида мешавад.

Дар Намоишгоҳи байналмилалии сохтмонии «TajBuild» бонуфузтарин ширкатҳои сохтмониву меъморӣ, саноат ва савдо, технология ва дигар коммуникатсияҳои муҳандисӣ аз Тоҷикистон, Русия, Туркия, Эрон, Узбекистон зарфияти худро дар соҳаи меъморӣ ва сохтмонӣ ба маъраз мегузоранд.

Тавре директори Ассотсиатсияи ширкати «TajBuild» Алиҷон Қодиров зимни нишасти матбуотӣ ба намояндагони расонаҳои хабарӣ гуфт, «яке аз ҳадафҳои асосии баргузории нахустин Намоишгоҳи байналмилалии «TajBuild» дар Душанбе — муаррифии иқтидори ширкатҳои сохтмонӣ ва таҳкими ҳамкорӣ миёни ширкатҳои сохтмонии ватанӣ ва хориҷӣ мебошад».

Зикр гардид, ки дар нахустин Намоишгоҳи байналмилалии сохтмонии «TajBuild» беҳтарин дастовардҳо ва таҷрибаи пешқадами ширкатҳои бонуфузи сохтмонии ватанию хориҷӣ, инчунин маҳсулоти сохтмонӣ, технологияҳои муосири сохтмонӣ, таҷҳизоти махсуси соҳавӣ ба маъраз гузошта мешаванд.

Намоишгоҳ аз шаш бахш – маҳсулоти сохтмонӣ ва ороишӣ, меъморӣ ва ороишӣ, сохтмони манзилҳои наздишаҳрӣ, коммуникатсияҳои муҳандисӣ ва таҷҳизот, техникаҳои махсус, механизмҳо, асбобҳо, либосҳои махсуси соҳавӣ ва моликияти ғайриманқул иборат мебошад. Ҳоло дар Қасри «Манеж», ки макони баргузории нахустин Намоишгоҳи байналмилалии сохтмонии «TajBuild» мебошад, корҳои омодагӣ ҷиҳати дар сатҳи баланди ташкилӣ гузаронидани намоишгоҳи мазкур идома доранд.

Баргузории нахустин Намоишгоҳи байналмилалии сохтмонии «TajBuild» дар пойтахт дар ҳолест, ки тибқи Нақшаи генералии шаҳри Душанбе солҳои оянда дар пойтахт даҳҳо биноҳои маъмурию истиқоматӣ, марказҳои тиҷоратию фароғатӣ, гипермаркетҳо, марказҳои замонавии фурӯши маҳсулоти тару тозаи кишоварзӣ, қасри фарҳанг, театрҳо, мактабу шифохонаҳо, майдонҳои варзишӣ, тандурустӣ ва боғчаҳои кӯдакона бо тарҳи меъмории муосир ва миллӣ бунёд мегарданд.

Марзия САИДЗОДА,
АМИТ «Ховар»

АКС: АМИТ «Ховар»