ҶОМИ ТОҶИКИСТОН-2022. Санаи баргузории бозиҳои даври чорякфинал муайян шуд

ДУШАНБЕ, 25.08.2022 /АМИТ «Ховар»/. Лигаи футболи Тоҷикистон санаи баргузории бозиҳои даври ¼-финали Ҷоми Тоҷикистон-2022-ро тасдиқ кард. Дар ин бора ба шореҳи варзиши АМИТ «Ховар» Меҳрони Қурбон дар Федератсияи футболи Тоҷикистон хабар доданд.

Ба иттилои манбаъ, 27 август дастаи футболи «Файзканд»-и ноҳияи Восеъ бо дастаи «Куктош»-и ноҳияи Рӯдакӣ бозӣ мекунад. Се вохӯрии дигари чорякфинал 28 август баргузор мешаванд. Дар ин рӯз дастаҳои футболи «Эсхата»-и шаҳри Хуҷанд бо КМВА-и шаҳри Душанбе, «Саройкамар»-и ноҳияи Панҷ бо «Хатлон»-и шаҳри Бохтар ва «Истиқлол»-и шаҳри Душанбе бо «Равшан»-и шаҳри Кӯлоб миёни ҳам рақобат мекунанд.

Мавриди зикр аст, ки бозиҳои даври ¼-финали Ҷоми Тоҷикистон-2022 аз як бозӣ иборат буда, дар сурати мусовӣ анҷом ёфтани вақти асосӣ, ду қисми иловагии 15-дақиқаӣ таъйин карда мешавад. Агар ғолиб дар ин муддат ҳам маълум нагардад, бар асоси муқаррароти ФИФА ғолиб дар силсилазарбаҳои 11-метра муайян карда мешавад.

Ҷоми Тоҷикистон-2022
Даври ¼-финал

27 август (шанбе)
Оғоз – соати 16:00
«Файзканд» – «Куктош»
Рудакӣ, варзишгоҳи «Нефтяник»

28 август (якшанбе)
Оғоз – соати 16:00
«Эсхата» – КМВА
Хуҷанд, варзишгоҳи «Спартак»

«Саройкамар» – «Хатлон»
Панҷ, Варзишгоҳи марказӣ

Оғоз – соати 18:30
«Истиқлол» – «Равшан» (Кӯлоб)
Душанбе, Варзишгоҳи марказии ҷумҳуриявӣ

АКС: Федератсияи футболи Тоҷикистон