АЗ БЕМОРИИ СУРХЧА ВА ГУЛАФШОН КӮДАКОНРО ЭҲТИЁТ КУНЕД! Дар баъзе минтақаҳоиТоҷикистон эмгузаронии иловагӣ ҷараён дорад

Сентябрь 13, 2022 10:10

 ДУШАНБЕ, 13.09.2022 /АМИТ «Ховар»/. Аз 5 то 15 сентябр дар шаҳри Душанбе, навоҳии Рашт ва Нуробод рӯзҳои эмгузаронии иловагӣ бар зидди бемории сурхча ва гулафшон ҷараён доранд, ки он кӯдакони  аз 5- сола то наврасони 15-соларо дар бар мегирад, иттилоъ дод ба АМИТ «Ховар» сардори Раёсати амнияти санитарӣ-эпидемиологии  ҳолатҳои фавқулода ва кумаки фаврию тиббии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон Наврӯз Ҷаъфаров.

Наврӯз Ҷаъфаров иброз намуд, ки рӯзҳои эмгузаронии иловагӣ бар  зидди бемориҳои сурхча ва гулафшон дар минтақаҳои зикргардида ба он хотир ба роҳ монда шудаанд, ки ҳолатҳои гирифторӣ ба ин гуна беморӣ  бештар ба қайд гирифта шудаанд.

Бояд гуфт, ки барои пешгирии ин бемориҳо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҳамасола дар саросари мамлакат маъракаи Рӯзҳои миллии эмкунӣ бар зидди бемории сурхакон ва гулафшон низ доир менамояд.

Ба гуфтаи мутахассисон,  бемории сурхча шадиди сироятӣ буда, ба он ҳарорати баланди шадид, илтиҳоби роҳҳои нафас, сулфа, сурхшавӣ ва ашкрезӣ аз чашмон ва пайдоиши доначаҳои сурх  хос аст.  Пайдоиши доначаҳои сурх  хосияти  пай дар пайӣ дорад.  Мисол, дар рӯзи якум  ин доначаҳо дар паси гӯшҳо, рӯй ва  гардан пайдо мешаванд, рӯзи дуюм ин доначаҳо дар қисми болои  қафаси сина ва  дастҳо мебароянд,  рӯзҳои  сеюм  пайдошавии доначаҳо ба  қисми поёнии бадан, яъне пойҳо мегузарад.

Барангезандаи  бемории сурхча  вирус мебошад, ки ба воситаи  ҳаво аз шахси бемор ба шахсони осебпазир, ки дар вақташ мувофиқи тақвими миллӣ бар зидди ин беморӣ иммунизатсия нашудаанд, мегузарад.

Давраи хатарнок ва сирояткунии атрофиён- ин 4 рӯз пеш аз баромадани доначаҳои сурх ва 4 рӯз баъд аз баромадани доначаҳо ба ҳисоб меравад. Дар ин давра сари вақт беморро бояд аз дигарон ҷудо  намоянд ва барои бемор  шароити муносиб муҳайё кунанд. Давраи ниҳоии бемории сурхча аз 7 то 18 рӯзро дар бар мегирад.

Ягона роҳи пешгирии бемории сурхча – ин иммунизатсия ба воситаи гузаронидани ваксина бар зидди ин беморӣ мебошад. Ваксинае, ки дар Тоҷикистон истифода бурда мешавад, ин  ваксинаи комплексӣ буда, бар  зидди ҳам бемории сурхча ва ҳам гулафшон равона карда шудааст.

Дар ҷумҳурӣ мувофиқи тақвими миллӣ иммунизатсия бар зидди бемории сурхча 2 маротиба гузаронида мешавад, вояи якум дар синни яксолагии кӯдакон ва вояи дуюм такроран дар 6-солагӣ. Барои пайдо шудани масунияти пурра бар зидди ин беморӣ кӯдакон ҳатман бояд ду вояи ваксинаро қабул кунанд.

Бемории Гулафшон шадиди сирояткунанда буда, дар пӯсти бадани бемор доғҳои сурх пайдо мешаванд. Он бо роҳи нафаскашӣ, атсазанӣ ва сулфа аз бемор ба дигар нафар мегузарад. Ҳарчанд бачагони хурдсол бемории гулафшонро хеле сабук мегузаронанд, онҳо дар давраи беморӣ манбаи паҳншавӣ ва барангезандаҳои он буда метавонанд. Бемории гулафшон хусусан ба занони ҳомила хавфи ҷиддӣ дорад, зеро вируси барангезандаи гулафшон метавонад ба тамоми узвҳои ҷанин зарари калон расонад.

Ба гуфти мутахассисон, тадбири эмкунӣ имкон медиҳад, ки эҳтимоли сар задани беморӣ, шароити гузаришу паҳншавии он маҳдуд карда шавад. Бузургтарин дастоварди тиб бар зидди сурхакон ва гулафшон эмкунист.

Фирӯза ДАВЛАТЗОДА,
АМИТ «Ховар»

АКС аз манбаъҳои боз ва бойгонӣ

Сентябрь 13, 2022 10:10

Хабарҳои дигари ин бахш

Беҳтарин тараннумгарони Ватан муайян гардиданд
Душанбе мизбони ҷаласаи 28-уми Шурои роҳбарони мақомоти муҳоҷирати давлатҳои иштирокдори Иттиҳоди Давлатҳои Мустақил мегардад
ИМРӮЗ-РӮЗИ АДВОКАТҲО. Асоси ислоҳоти ниҳоди адвокатураи Тоҷикистонро Паёми Президенти Тоҷикистон ба Маҷлиси Олӣ ташкил медиҳад
«МАКТАБИ СИЁСИИ ПЕШВОИ МИЛЛАТ». Дар Кӯлоб Конференсияи IV байналмилалии илмӣ-назариявӣ баргузор гардид
Кумакҳои Пешвои миллат ба зарардидагони офати табиӣ дар ноҳияҳои Нуробод ва Рашт расиданд
Дар Душанбе бо иштироки беш аз 10 ҳазор ҷавони гуногункасб Рӯзи ҷавонони Тоҷикистон бошукуҳ таҷлил шуд
Дар Озарбойҷон оид ба масъалаҳои оила, занон ва кӯдакон дар самти баробарии гендерӣ Ёддошти тафоҳум оид ба ҳамкорӣ ба имзо расид
23 МАЙ — РӮЗИ ҶАВОНОНИ ТОҶИКИСТОН. Дар Бадахшон ҷаласаи Шурои кор бо ҷавонон доир шуд
Бахшида ба Рӯзи ҷавонони Тоҷикистон ҳамоиши занону духтарони шаҳри Душанбе баргузор гардид
ОГОҲӢ. Дар Тоҷикистон 24-25 май боронҳои пуршиддат, сел, жола ва раъду барқ дар назар аст
«ШАРОРАИ ҶАВОНӢ». Бахшида ба Рӯзи ҷавонони Тоҷикистон барномаи фарҳангӣ-фароғатӣ баргузор мегардад
СОЛИ МАЪРИФАТИ ҲУҚУҚӢ. Оид ба нақшии калидии ташаккули маърифати ҳуқуқии шаҳрвандон дар давлати ҳуқуқбунёд ҳамоиш доир гардид