ХИЗМАТ БА ВАТАН ШАРАФ АСТ! Дар Тоҷикистон барои даъвати тирамоҳии шаҳрвандон ба хизмати ҳарбӣ корҳои омодагӣ ҷараён доранд

Сентябрь 28, 2022 12:37

ДУШАНБЕ, 28.09.2022 /АМИТ «Ховар»/. То оғози маъракаи даъвати тирамоҳии ҷавонон ба сафи Қувваҳои мусаллаҳ, ки ҳамасола 1 октябр шурӯъ гардида, то охири моҳи ноябр идома меёбад, рӯзҳои башумор мондаанд. Аллакай масъулини мақомоти вобастаи даъват дар якҷоягӣ бо кормандони Комиссариати ҳарбӣ барои дар сатҳи зарурӣ ташкилу ба роҳ мондани ин маъракаи муҳими сиёсӣ тадбирҳои зарурӣ роҳандозӣ намудаанд, иттилоъ дод ба хабарнигори АМИТ «Ховар» сардори маркази матбуоти Вазорати мудофиаи мамлакат, полковник Фаридун МАҲМАДАЛИЗОДА.

Тавре зимни суҳбат Фаридун Маҳмадализода иброз намуд, ҳамасола дар Ҷумҳурии Тоҷикистон ду мавсими даъвати шаҳрвандон ба хизмати ҳатмии ҳарбӣ пешбинӣ гардидааст. Яке даъвати баҳории шаҳрвандон ба хизмати ҳарбист, ки аз 1 апрел оғоз гардида, то охири моҳи май идома меёбад. Дуюмӣ- ин даъвати тирамоҳии шаҳрвандон ба хизмати ҳатмии ҳарбист, ки аз 1 октябр шурӯъ шуда, то охири моҳи ноябр ташкилу ба роҳ монда мешавад.

«Ҳоло ҳамкории зичи мақомот бо аҳолии кишвар, бавижа дар шаҳру ноҳияҳо ба роҳ монда шудааст, ки дар доираи он талаботи Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» ва Фармони Президенти Ҷумҳурии Тоҷикистон муҳтарам Эмомалӣ Раҳмон дар бораи даъвати навбатии шаҳрвандон ва гусели сарбозоне, ки муҳлати муайяншудаи хизмати ҳатмии ҳарбиро ба анҷом расонидаанд, ба мардум фаҳмонида мешавад. Дар заминаи ин ҳамкорӣ ҳамзамон бо худи ҷавонони синни даъватӣ вохӯриҳои судманд анҷом дода мешаванд, то онҳо вазифаи худуҳдадориро дар шомил шудан ба сафи Қувваҳои мусаллаҳ дар сатҳи зарурӣ иҷро намоянд»,-иброз дошт сардори маркази матбуот.

Моҳи январи соли 2021 Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» дар тарҳи нав қабул карда шуд, ки он аз 10 боб ва 62 модда иборат буда, тамоми самтҳои фаъолияти даъвати шаҳрвандон ба хизмати ҳатмии ҳарбӣ ва дигар чорабиниҳое, ки ба қайд гузоштани хизмати ҳарбиро ба танзим медароранд, дар бар мегирад. Мутобиқи ин қонун, ҳамасола теъдоди муайяни шаҳрвандон ба сафи Қувваҳои мусаллаҳ даъват карда мешаванд. Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» дар асоси таҳлилу омӯзиши таҷрибаҳои пешқадами кишварҳои дуру наздики хориҷӣ таҳия гардида, ба талабот ва шароити ҷомеаи имрӯзаи Тоҷикистон мутобиқ гардонида шудааст. Илова бар ин, қонуни мазкур якчанд навовариҳоро вобаста ба тартиби даъват ба хизмати ҳарбӣ, бақайдгирии шаҳрвандон, баланд бардоштани масъулияти онҳо, тартиби адои хизмати ҳарбӣ, мушаххас намудани ваколатҳои мақомоти марказӣ ва маҳаллии ҳокимияти давлатӣ пешбинӣ намуда, барои дар сатҳи зарурӣ баргузор намудани чорабиниҳои даъватии шаҳрвандон ба хизмати ҳатмии ҳарбӣ равона шудааст.

Дарвоқеъ, дар шароити имрӯзаи пуртазод вазъи зудтағйирёбандаи ҷаҳони муосир, ки ҳатто давлатҳои пурқудрат ба таҳдиду хатарҳои ҷиддӣ рӯ ба рӯ гашта, буҳрони иҷтимоиву иқтисодӣ аксари кишварҳои сайёраро дар ҳолати ноустувор қарор додааст, ягон ҷавони ватандӯсту меҳанпарасти кишварро бетафовут гузошта наметавонад. Имрӯзҳо ҷавонони барӯманду қавииродаи кишвар хуб дарк кардаанд, ки хизмат ба Ватан-Модар қарзи виҷдонӣ ва имонист. Пас месазад, ки ҳар ҷавони ба синни даъватӣ расида баҳри ҳифзу ҳимояи ҳар ваҷаб замину ҳар зарра хоки Ватан ба сафи Қувваҳои мусаллаҳи кишвар шомил гардад.

Шаҳлои САДРИДДИН,
АМИТ «Ховар»,

АКС: АМИТ «Ховар»

Сентябрь 28, 2022 12:37

Хабарҳои дигари ин бахш

ДАР АРАФАИ СОЛИ НАВИ МИЛОДӢ. Вакили Маҷлиси вакилони халқи шаҳри Душанбе Маҳмудҷон Муродов аз номи Раиси Маҷлиси миллӣ Рустами Эмомалӣ ба сарбозону афсарон кумаки моддӣ ва туҳфаҳо расонид
СТАНИСЛАВ ЗАС СУХАНОНИ РУСТАМИ ЭМОМАЛИРО ДАСТГИРӢ КАРД. Созмони Аҳдномаи амнияти дастҷамъӣ таҳаддуди пайваста аз қаламрави Афғонистонро таъйид сохт
Jazeera Airlines Кувайтро бо Тоҷикистон мепайвандад
АСРОРИ АБРЕШИМ. Тоҷикон онҳоро ҳазорон сол пеш медонистанд ва аз он замон то ба имрӯз анъанаҳои бофтани атласи миллиро нигоҳ медоранд
КОРОНАВИРУС НЕ, ЗУКОМИ МАВСИМӢ. Вазорати тандурустӣ ва ҳифзи иҷтимоии аҳолии Тоҷикистон аз сокинон даъват мекунад, ки ба худтабобаткунӣ машғул нашаванд
Номинаи муштараки Тоҷикистон «Анъанаи нақли латифаҳои Хоҷа Насриддин» ба Феҳристи мероси фарҳанги ғайримоддии башарият ворид шуд
ХАБАРИ ХУШ! Номинатсияи муштараки Тоҷикистон «Кирмакпарварӣ ва истеҳсоли анъанавии абрешим барои бофандагӣ» ба Феҳристи мероси фарҳанги ғайримоддии башарият ворид шуд
НАРХИ ТУХМИ МУРҒ БА ЧӢ ВОБАСТА АСТ? Ба ин савол муовини якуми Вазири кишоварзии Тоҷикистон Музаффар Мирзозода посух дод
ЭҲТИЁТ ШАВЕД! Коронавирус дар Осиёи Марказӣ боз хуруҷ кард
БЛОГ ЧИСТ ВА БЛОГЕР КИСТ? Назари коршиносон оид ба танзими муносибатҳо дар фаъолияти корбарони интернетӣ
ДИҚҚАТ, ЭҲТИЁТ НАМОЕД! Миқёси маҳдудият дар Чин бар асари афзоиши COVID рекордӣ шудааст
ПАРЧАМИ ДАВЛАТӢ БАРОИ ШУМО ЧИСТ? Бо ин суол хабарнигорони АМИТ «Ховар» ба роҳбарони вазорату идораҳо ва намояндагони касбу кори гуногун муроҷеъ шуданд