Намояндаи Тоҷикистон дар Форуми адибони ҷавони кишварҳои Осиёи Марказӣ қадрдонӣ гардид
ДУШАНБЕ, 20.10.2022 /АМИТ «Ховар»/. 18-19 октябр дар шаҳри Тошканд бо ташаббуси Иттифоқи нависандагони Узбекистон аввалин Форуми адибони ҷавони кишварҳои Осиёи Марказӣ баргузор гардид, ки дар он аз Тоҷикистон хабарнигори рӯзномаи «Халқ овози» ва Радиои «Овози тоҷик» Зуҳриддин Умаров низ иштирок намуд, хабар медиҳад АМИТ «Ховар».
Дар Форуми адибони ҷавони кишварҳои Осиёи Марказӣ намояндагони Тоҷикистон, Узбекистон, Қазоқистон, Қирғизистон, Туркманистон ва Афғонистон ширкат варзиданд.
Дар маросими кушодашавии аввалин Форуми адибони ҷавони кишварҳои Осиёи Марказӣ раиси Иттифоқи нависандагони Узбекистон, Шоири халқии Узбекистон Сироҷиддин Сайид, Қаҳрамони Узбекистон, адабиётшиноси барҷаста Иброҳим Ғафуров ва дигарон иштирок намуда, иброз доштанд, ки ин ҳамоиш ба рушди муносибатҳои дӯстиву бародарии кишварҳои минтақа, беҳтар ба роҳ мондани ҳамкории адабӣ ва тарғибу ташвиқи фарҳанги ҳамдигар дар кишварҳои Осиёи Марказӣ мусоидат менамояд.
Дар форум таъкид шуд, ки дӯстиву бародарии адибони барҷастаи узбеку тоҷик, ба мисли Ғафур Ғулом, Ойбек, Шароф Рашидов, Зулфия, Абдулло Орифов, Эркин Воҳидов бо Мирзо Турсунзода, Мӯмин Қаноат, Лоиқ Шералӣ маҳз дар заминаи вохӯриву суҳбатҳои эшон дар чунин ҳамоишҳо ба вуҷуд омадаанд.
Изҳори умед карда шуд, ки иштирокдорони ҳамоиш бо ҳамсолони худ аз кишварҳои Осиёи Марказӣ дӯстӣ барқарор намуда, минбаъд дар тарғиб, ташвиқ ва тарҷумаи асарҳои ҳамдигар ба забонҳои дигар талош менамоянд.
Намояндаи Тоҷикистон Зуҳриддин Умаров иброз дошт, ки «солҳои охир ҳамкории Тоҷикистон ва Узбекистон дар заминаи сиёсати хирадмандонаи сарони ду кишвари бо ҳам дӯст — Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Узбекистон муҳтарам Шавкат Мирзиёев ба сатҳи сифатан нав бароварда шуд. Натиҷаи ин ҳамкориро дар соҳаи адабиёт низ мушоҳида кардан мумкин аст. Аз ҷумла, дар ду давлат рӯзҳои фарҳангӣ баргузор гардида, дар доираи он вохӯрии адибони ҳарду кишвар ташкил гардиданд».
Зикр шуд, ки дар шаҳрҳои Душанбе ва Самарқанд муҷассамаҳои Ҷомӣ ва Навоӣ гузошта шуданд.
Ҳамчунин солгарди Қаҳрамони Тоҷикистон, Шоири халқии Тоҷикистон Мирзо Турсунзода дар Тошканд ва солгарди Қаҳрамони Узбекистон, Шоири халқии Узбекистон Эркин Воҳидов дар Душанбе баргузор гардиданд.
Дар кори форум аз ҷониби иштирокдорон қироати шеър ва аз ҷониби шоиру нависандагони барҷаста дарсҳои маҳорат сурат гирифтанд.
Дар фарҷоми ҳамоиш иштирокдорон, аз ҷумла намояндаи Тоҷикистон Зуҳриддин Умаров низ бо сертификат ва туҳфаҳои хотиравӣ қадрдонӣ карда шуданд.
АКС: АМИТ «Ховар»
ДАР ҲАР ЯК ОҲАНГ МУҲАББАТИ БЕАНДОЗАИ ТОҶИКОН БА ВАТАН ЭҲСОС МЕШУД. Бардошт аз баргузории Рӯзҳои фарҳанги Тоҷикистон дар Русия
«ТОҶИ СОМОН». Дар Душанбе дуюмин синамоҷашнвораи байналмилалӣ баргузор мегардад
Инна Блюшенко аз Швейтсария: «Мақсад дорам забони ширину шевои тоҷикиро омӯзам»
Президенти Академияи миллии илмҳои Тоҷикистон дар Конференсияи байналмилалии «Илм барои бехатарии ҷаҳон» иштирок намуд
35-СОЛАГИИ ИСТИҚЛОЛИЯТИ ДАВЛАТӢ. Дар Чойхонаи миллӣ барои дар як шабонарӯз қабули 5000 мизоҷ шароит фароҳам оварда мешавад
Ба пешвози 700-солагии Ҳофизи Шерозӣ дар Тоҷикистон барномаҳои фарҳангию маърифатӣ доир мешаванд
ШАҲРИСТОНИ ҲУЛБУК. Бозёфтҳои аз ин ёдгорӣ пайдогардида намунаи санъати олии ҳунармандӣ буда, нотакрор мебошанд
«КОРВОНИ КИТОБ». Ба китобхонаҳои шаҳру ноҳияҳои Бадахшон беш аз 6 ҳазор нусха китоб дастрас мегардад
АМИТ «Ховар» ва ҶСП «Ширкати байнидавлатии телевизион ва радиои «Мир»» Ёддошти тафоҳум ба имзо расониданд
Дар Душанбе мубодилаи барномаҳои фарҳангӣ ва намоиши филмҳо байни Тоҷикистон ва Чин баргузор гардид
Дар мавзуи ташаккул ва рушди синошиносӣ дар Тоҷикистон конфронси илмӣ доир гардид
Рӯзҳои фарҳанги Ҷумҳурии Тоҷикистон дар Ҷумҳурии Тотористони Федератсияи Русия доир гардид
