Тоҷикистон ва Беларус метавонанд корхонаи васлнамоии мошинҳои «БелАЗ» таъсис диҳанд

ДУШАНБЕ, 14.10.2022 /АМИТ «Ховар»/. Вазирони саноати Тоҷикистон ва Беларус Шералӣ Кабир ва Александр Рогожник дар Душанбе масъалаи таъсиси корхонаи муштараки истеҳсолӣ барои васли мошинҳои худпарто (самосвал)-и «БелАЗ»-ро баррасӣ карданд. Дар ин бора дирӯз, 13 октябр дар маркази матбуоти Вазорати саноат ва технологияҳои нави Тоҷикистон хабар доданд.

«Зарурати ташкили корхонаҳои муштарак дар соҳаи саноати маъдани кӯҳӣ, металлургӣ, химиявӣ, сабук ва хӯрокворӣ, ки захираҳои калон доранд, зикр карда шуд. Аз ҷумла, масъалаи таъсиси корхонаи муштараки истеҳсолӣ доир ба васли мошинҳои гаронвазни тамғаи «БелАЗ» баррасӣ шуд»,- гуфта шудааст дар иттилоия.

11-12 октябр дар шаҳри Душанбе намоишгоҳи корхонаҳои истеҳсолии Беларус баргузор гардид, ки дар он, аз ҷумла, маҳсулоти навтарини ширкати «БелАЗ» ба намоиш гузошта шуданд. Ҳайати вакилони ширкатро директори генералй Сергей Никифорович роҳбарӣ намуд. ДАР АКС аз боло: муҷассамаи мошини самосвали «БелАЗ 540А» дар даромадгоҳи НБО «Норак»- яке аз рамзҳои ин сохтмони азими асри 20. Дар сохтмони Неругоҳи барқи обии «Норак», ки дар ИДМ калонтарин буда, даҳ сол идома ёфт, таҷҳизоти заводи Беларус фаъолият менамуд. Ин завод то имрӯз ба Тоҷикистон таҷҳизот таҳвил медиҳад.

АКС: АМИТ «Ховар»