БОКС. Баҳодур Усмонов ва Муҳаммад Аброриддинов дар Чемпионати Осиё ҷои сеюмро гирифтанд

ДУШАНБЕ, 11.11.2022 /АМИТ «Ховар»/. Варзишгарони тоҷик Баҳодур Усмонов ва Муҳаммад Аброриддинов дар Чемпионати Осиё оид ба бокс ҷои сеюмро гирифтанд. Дар ин бора АМИТ «Ховар» бо истинод ба Кумитаи миллии олимпии Тоҷикистон хабар медиҳад.

10 ноябр дар шаҳри Аммони Урдун муҳорибаҳои даври нимфинали Чемпионати Осиё оид ба бокс баргузор шуданд. Дар ин давр ду варзишгари мо – Баҳодур Усмонов дар вазни -63,5кг аз Шива Тҳапаи ҳиндустонӣ ва Муҳаммад Аброриддинов дар вазни +92кг аз Камчибек Конкабаеви қазоқистонӣ мағлуб гардида, ҷои сеюмро касб карданд.

Баҳодур Усмонов дар даври аввал бар варзишгари Кувайт Нодир Бадрон, дар даври дуюм бар намояндаи Тайланд Сомчай Вонгсуван, дар чорякфинал бар варзишгари Туркманистон Хурсанд Имонқулиев пирӯз гардида буд.

Муҳаммад Аброриддинов сабқатро аз даври чорякфинал оғоз карда, бар намояндаи Сурия Муҳаммад Млайес пирӯз шуд.

8 варзишгари дигарамон дар даврҳои муқаддамотӣ аз ҳарифонашон мағлуб шуданд.

АКС: КМО Тоҷикистон