Хадамоти изтирории Арабистони Саудӣ пайомадҳои обхезии шадидро бартараф мекунад

ДУШАНБЕ, 26.11.2022 /АМИТ «Ховар/. Хадамоти изтирории Арабистони Саудӣ пайомадҳои обхезии шадидро, ки чанде пеш дар Ҷидда — дуввумин шаҳри бузурги ин кишвар ба амал омада буд, бартараф мекунад. Тавре АМИТ «Ховар» иттилоъ медиҳад, дар ин бора «Middle East Eye» хабар додааст.

Ба маълумоти Хадамоти обуҳавошиносии ин кишвар, борише, ки боиси обхезӣ гардид, дар таърихи шаҳр ҳамчун шадидтарин сабт шудааст. Давоми ҳашт соати борони пай дар пай 179,7 мм бориш ба қайд гирифта шуд. Қабл аз ин, бориши соли 2009 рекордӣ ҳисобида мешуд, ки он вақт 111 мм борида буд.

Тибқи иттилои нав, бар асари обхезӣ на кам аз ду нафар ба ҳалокат расидаанд. Даҳҳо парвозҳо ба таъхир афтода, мактабҳо баста шудаанд. Ба сокинон тавсия дода шудааст, ки бе зарурат аз хона набароянд.

Бояд тазаккур дод, ки дар Ҷидда тақрибан 4 миллион нафар зиндагӣ мекунанд. Бар асари обхезии соли 2009 123 нафар ба ҳалокат расида буданд.

АКС аз манбаъҳои боз