Мусобиқаи варзишӣ оид ба намуди волейбол барои дарёфти «Ҷоми Ҳизби Халқии Демократии Тоҷикистон» ҷамъбаст гардид

ДУШАНБЕ, 22.12.2022. /АМИТ «Ховар»/. Имрўз дар Донишгоҳи славянии Россия ва Тоҷикистон Мусобиқаи варзишӣ оид ба намуди волейбол байни кормандони дастгоҳи КИМ ҲХДТ, кумитаҳои иҷроияи ҲХДТ дар шаҳри Душанбе ва кумитаҳои иҷроияи ҲХДТ дар шаҳру ноҳияҳои тобеи марказ барои дарёфти «Ҷоми Ҳизби Халқии Демократии Тоҷикистон» ҷамъбаст гардид. Дар он дастаи дастгоҳи КИМ ҲХДТ ба гирифтани ҷойи якум ноил гардид, хабар доданд ба АМИТ «Ховар» дар маркази матбуот ва таҳлили дастгоҳи КИМ ҲХДТ.

Дар мусобиқаи мазкур 12 даста дар 2 гурӯҳ бозӣ намуданд. Аз ҷумла, дастаҳои дастгоҳи КИМ ҲХДТ ва кумитаҳои иҷроияи ҳизб дар шаҳру ноҳияҳои Душанбе, И.Сомонӣ, Шоҳмансур, Сино, Фирдавсӣ, Турсунзода, Ҳисор, Рӯдакӣ, Варзоб, Шаҳринав ва Ваҳдат байни ҳамдигар сабқат карданд.

Ҳамин тариқ, дастаи дастгоҳи КИМ ҲХДТ сазовори ҷойи якум гардида, КИ ҲХДТ дар ноҳияи Фирдавсӣ зинаи дуюм ва КИ ҲХДТ дар шаҳри Турсунзода мақоми сеюмро соҳиб шуданд.

Дар маросими ҷамъбасти мусобиқа ба дастаи ғолиб Ҷомҳои ифтихорӣ, диплом, медалҳои ифтихорӣ ва мукофоти пулӣ тақдим карда шуд.

Муовини Раиси ҲХДТ Асрор Латифзода иброз дошт, ки мусобиқаи мазкур ба 28-солагии таъсиси Ҳизби Халқии Демократии Тоҷикистон бахшида шуда, дар асоси дастуру супоришҳои Пешвои миллат, Президенти кишвар, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон оид ба оммавигардонии варзиш ва самаранок истифода бурдани иншоотҳои варзишӣ дар ҳамдастӣ бо Федератсияи волейболи Ҷумҳурии Тоҷикистон, Ташкилоти ҷамъиятии ҷавонон «Созандагои Ватан» ва Донишгоҳи славянии Россия ва Тоҷикистон роҳандозӣ гардид.

«Мақсади асосӣ аз амалӣ намудани иқдоми мазкур тарғиби тарзи ҳаёти солим, ҷалби шаҳрвандони мамлакат ба машғулиятҳои тарбияи ҷисмонӣ ва варзиш, ташвиқи васеи бозии волейбол дар байни аҳолии кишвар, таъмини бевоситаи иҷрои «Барномаи рушди волейбол дар Ҷумҳурии Тоҷикистон” ва муайян намудани беҳтарин дастаи волейболбозони сохторҳои ҲХДТ маҳсуб меёбад», — тазаккур дод А.Латифзода.

Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода таъкид намуд, ки Ҳизби Халқии Демократии Тоҷикистон варзишро ҳамчун яке аз омилҳои муассири тарбия ва муаррифии шоистаи кишвар дар арсаи байналмилалӣ эътироф намуда, варзишгаронро, ки бо иштироки фаъолона соҳиби ҷоизаҳои олимпӣ ва байналмилаӣ мегарданд, дастгирӣ ва барои ҷалби сармояи иловагӣ бо мақсади бунёди толору майдончаҳои варзишӣ талош мекунад.

Гуфта шуд, ки рушди варзиш яке аз самтҳои барномавии фаъолияти Ҳизби Халқии Демократии Тоҷикистон ба ҳисоб меравад. Бо назардошти он, ки дар шароити кунунӣ варзиш ҳамчун василаи шоистаи муаррифгари миллату кишвар дар олам маҳсуб мешавад, ба рушди он таваҷҷуҳи махсус зоҳир мегардад.

Дар маросими мазкур ҳамчунин Раиси Ташкилоти ҷамъиятии ҷавонон «Созандагони Ватан» Оятулло Аҳмадзода, директори телевизони «Варзиш» Парвиз Нориён ва Ректори Донишгоҳи славянии Россия ва Тоҷикистон Машраб Файзулло иштирок намуданд.

АКС: Маркази матбуот ва таҳлили дастгоҳи КИМ ҲХДТ