САТҲИ КИНОИ ТОҶИКРО БОЯД БАЛАНД БАРДОШТ. Барномаи рушди кинои Ҷумҳурии Тоҷикистон барои солҳои 2023-2027 қабул гардид

Декабрь 9, 2022 14:54

ДУШАНБЕ, 09.12.2022 /АМИТ «Ховар»/. 29 ноябр зимни баргузории маҷлиси Ҳукумати Ҷумҳурии Тоҷикистон таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳукумати мамлакат муҳтарам Эмомалӣ Раҳмон «Барномаи рушди кинои Ҷумҳурии Тоҷикистон барои солҳои 2023-2027» баррасӣ ва қабул гардид.

Сарвари давлат дар ҷараёни баррасии лоиҳаи ин барнома таъкид намуданд: кино соҳаи хеле муҳим аст, сатҳи онро мебояд хеле баланд бардошт.

Вобаста ба ҳадаф ва нақшаи амали барномаи мазкур дар Муассисаи давлатии «Тоҷикфилм» ба АМИТ «Ховар» маълумот доданд.

Муассисаи давлатии «Тоҷикфилм» лоиҳаи «Барномаи рушди кинои Ҷумҳурии Тоҷикистонро барои солҳои 2023-2027» бо назардошти вазъи воқеии соҳа, раванди ҷаҳонишавӣ ва амалисозии муқаррароти Қонуни Ҷумҳурии Тоҷикистон «Дар бораи кино», мутобиқи Стратегияи миллии рушди Ҷумҳурии Тоҷикистон барои давраи то соли 2030, Протоколи маҷлиси Шӯрои ҳукуматӣ оид ба рушди кинематографияи миллӣ ва ҳадафу вазифаҳои оинномавӣ ҷиҳати татбиқи сиёсати давлатӣ дар соҳаи кино ва тамоюли инъикоси фарҳангу худшиносии миллӣ таҳия намудааст. Ҳадафи кинои миллӣ ба ҳайси маъмултарин санъат, тарғиби идеологияи давлат, дастовардҳои замони соҳибистиқлолӣ, таъриху фарҳанг, анъана ва расму оини миллати тоҷик дар давраи ҷвҳонишавӣ мебошад.

Маблағгузории чорабиниҳои барномаи мазкур аз буҷети давлатӣ, маблағҳои Муассисаи давлатии «Тоҷикфилм», инчунин шарикии давлат ва бахши хусусӣ, ҳамзамон дигар манбаъҳое, ки қонунгузории Ҷумҳурии Тоҷикистон манъ накардааст, амалӣ карда мешавад.

Барнома дар асоси таҳлилҳои асоснок бо таваҷҷуҳ ба дурнамои рушди кинои ватанӣ таҳия гардида, дар он роҳҳо ва воситаҳои рушди кинои тоҷик муайян гардидаанд.

Ҳадаф ва вазифаҳои Муассисаи давлатии «Тоҷикфилм», пеш аз ҳама, истеҳсол, паҳнкунӣ, намоиши оммавии кино, таъмини рушди кинематография ва санъати аудиовизуалии миллӣ, таҳкими заминаи меъёрии ҳуқуқии соҳа, ташкили назорати фаъолияти кинотолорҳо ва нуқтаҳои нусхабардорӣ, ба низом даровардани бозори маводи аудиовизуалӣ мебошад, ки бе заминаи устувори моддию техникӣ ва дастгирии давлатӣ амалӣ шудани онҳо ғайриимкон аст.

«Барномаи рушди кинои Ҷумҳурии Тоҷикистон барои солҳои 2023-2027» масоили муҳими соҳа, аз қабили тайёр намудани мутахассисони ҷавон дар хориҷи кишвар, таъмини соҳаи кино бо техникаву технологияи ҳозиразамони филмофарӣ ва кинонамоишдиҳӣ, истеҳсоли филмҳои баландмазмуни миллӣ, ҷалби мутахассисони баландихтисос, барқарорсозии хазинаи миллии кинои тоҷик, муҷаҳҳаз намудани кинотеатрҳо бо технологияи нави муосир, таҳкими заминаи моддию иқтисодӣ ва ҷалби тамошобинро ба кино фаро гирифта, барои ба роҳ мондани ҳамкорӣ бо дигар кишварҳо ҷиҳати истеҳсоли филмҳои муштарак, пешниҳоди дастовардҳои соҳаи кинои тоҷик дар ҷашнвораҳои байналмиллалию минтақавӣ ва муаррифии кинои тоҷик дар арсаи ҷаҳонӣ мусоидат менамояд.

Ҳангоми таҳияи лоиҳа ба ғайр аз таҷрибаи миллӣ инчунин таҷрибаи давлатҳои пешрафта дар соҳаи филмофарӣ бо дарназардошти манфиатҳои миллӣ ба инобат гирифта шудааст.

Муддати амали барнома панҷ сол ва нақшаи амали он ду марҳила (солҳои 2023-2025 ва солҳои 2026-2027)-ро дар бар мегирад. Он дар солҳои минбаъда тамоми ҷабҳаҳои фаъолияти соҳаро ба танзим дароварда, пояҳои рушди кинои миллиро таҳким бахшида, тавсеаи ҳамкорӣ ва ба арсаи ҷаҳонӣ роҳ ёфтани кинои тоҷикро амалӣ менамояд.

Фирӯза ДАВЛАТЗОДА,
АМИТ «Ховар»

АКС аз бойгонии АМИТ «Ховар»

Декабрь 9, 2022 14:54

Хабарҳои дигари ин бахш

Дар Панҷакент дар мавзуи «Рӯдакӣ ва эҳёи фарҳанги тоҷикон» конференсияи байналмилалӣ доир шуд
Даври сеюми Озмуни ҷумҳуриявии «Тоҷикистон — Ватани азизи ман» баргузор мегардад
Дар Маркази инноватсионии Чину Тоҷикистон оид ба маҳсулоти табиӣ коргоҳи истеҳсоли маводи доруворӣ ба истифода дода шуд
«РӮДАКӢ РАФТУ МОНД ҲИКМАТИ ӮЙ». Дар Бӯстон ба ифтихори бунёдгузори адабиёти тоҷик озмун доир гардид
ВАРО БУЗУРГИЮ НЕЪМАТ ЗИ ОЛИ СОМОН БУД. Эҳдо ба Рӯзи Рӯдакӣ
ИМРӮЗ — РӮЗИ РӮДАКӢ. Сардафтари адабиёти тоҷику форс бо осори мондагори худ ба забону адаби мо умри ҷовидона бахшидааст
Дар Институти астрофизика доир ба системаи офтобӣ машварат баргузор шуд
Барои кормандони соҳаи ҳифзи муҳити зист ва ҳифзи ҳуқуқ машғулияти омӯзишӣ баргузор гардид
Китоби «Рустами Эмомалӣ – дастпарвари Мактаби давлатдории Пешвои миллат» роҳнамо барои ҷавонони Тоҷикистон аст
«ШОҲНОМА» — БУЗУРГТАРИН ҲАМОСАИ МИЛЛӢ. Ин асар шоҳкории беназири сатҳи ҷаҳонӣ эътироф гардидааст
Аз қалъаи Бибихонуми шаҳри Бохтар бозёфтҳои давраҳои таърихӣ кашф карда шуданд
Оид ба тадбирҳои инноватсионӣ дар соҳаҳои молия, таҳсил ва иқтисод конференсияи байналмилалӣ доир шуд