Вазъи саломатии чемпиони секаратаи ҷаҳон оид ба футбол Пеле бад шудааст

ДУШАНБЕ, 22.12.2022 /АМИТ «Ховар»/. Дар бораи бад шудани саломатии чемпиони секаратаи ҷаҳон оид ба футбол Пеле пизишкони собиқ футболбоз хабар доданд. Дар ин бора ТАСС навиштааст.

Ба гуфтаи табибон, Эдсон Арантис ду Насименту (Пеле), ки барои танзими курси химиотерапия барои саратони рӯдаи рост ва муолиҷаи сирояти роҳи нафас дар беморхона бистарӣ шуда буд, тамоюли манфии бемории онкологӣ ба вуҷуд омадааст. Духтурон тавзеҳ доданд, ки ӯ то ҳол ба шуъбаи эҳё ниёз надорад ва дар шуъбаи муқаррарӣ қарор дорад.

Қаблан духтари Пеле- Келлӣ Насименту хабар дода буд, ки падараш Мавлуди Исоро бо аҳли оилааш таҷлил намекунад, зеро ӯ маҷбур шуд, ки бинобар нишондиҳандаҳои тиббӣ дар бемористон бимонад.

Ёдовар мешавем, ки футболбози ҷаҳонӣ, чемпиони секаратаи ҷаҳон дар ҳайати дастаи мунтахаби Бразилия Пеле бинобар бад шудани вазъи умумиаш ба таври ғайринақшавӣ дар беморхона бистарӣ шуд.

Ба гузориши ESPN, пизишкони Пелеи 82-сола гуфтаанд, ки курси химиотерапия барои рафъи варамҳои бадани ӯ кумак накардааст. Илова бар ин, дар бадани Пеле омоси сершумор ба вуҷуд омада,  кори дилаш номӯътадил гардидааст. Дар Пеле ҳолатҳои беҳушӣ низ ба қайд гирифта шудаанд.

АКС: аз саҳифаи шахсии Пеле дар шабакаҳои иҷтимоӣ