ЧЕМПИОНАТИ CAFA-2023. Ҳайати дастаи мунтахаби занонаи Тоҷикистон оид ба футзал барои ширкат дар мусобиқа муайян гардид
![](https://khovar.tj/wp-content/uploads/2023/01/tajikistan-womens-national-futsal-team-training-camp2023.jpg)
ДУШАНБЕ, 19.01.2023 /АМИТ «Ховар»/. Сармураббии дастаи мунтахаби занонаи Тоҷикистон оид ба футзал Мустафо Афшорӣ ҳайати ниҳоии дастаро ҷиҳати ширкат дар чемпионати Ассотсиатсияи футболи Осиёи Марказӣ (CAFA) эълон кард. Дар ин бора ба АМИТ «Ховар» дар Федератсияи футболи Тоҷикистон хабар доданд.
Ба ҳайати дастаи занонаи Тоҷикистон 14 нафар – 3 дарвозабон ва 11 бозигар шомил гардиданд.
Дар Чемпионати CAFA-2023 оид ба футзал, ки аз 25 то 31 январ дар шаҳри Тошканд баргузор мешавад, дастаи занонаи Тоҷикистон бо дастаҳои мунтахаби Узбекистон (27 январ), Эрон (28 январ) ва Қирғизистон (30 январ) бозӣ мекунад.
Мусобиқа аз рӯйи системаи даврӣ дар як марҳила баргузор мешавад. Дастаи ғолиб тибқи шумораи бештари холҳо муайян мегардад.
Ҳайати дастаи мунтахаби занонаи Тоҷикистон оид ба футзал барои ширкат дар чемпионати CAFA-2023:
Дарвозабонҳо: Сайёра Саидова, Рӯзигули Ҳасан, Муниса Гулова (ҳама аз «Зебонисо»);
Бозигарон: Некубахт Худододова, Карина Мирзоева, Нисо Абдуллоева, Ҷонона Қурбонова, Шамсия Ҳусейнова, Малика Қаюмова (ҳама аз «Зебонисо»), Мадина Фозилова (бе бошгоҳ), Лайло Ҳалимова, Беназир Ҷумъахонзода («Хатлон»), Комила Расулова (МВЗО №27 «Сокол», Москва), Марҷона Файзуллоева («Зебо», Дӯстӣ).
Сармураббӣ – Мустафо Афшорӣ (Эрон).
Акс: ФФТ