ФУТЗАЛ. Фирӯз Бозмамадов фаъолияти касбии худро дар қораи Аврупо идома медиҳад

ДУШАНБЕ, 09.01.2023 /АМИТ «Ховар»/. Дарвозабони мунтахаби Тоҷикистон ва дастаи «Истиқлол»-и Душанбе оид ба футзал Фирӯз Бозмамадов фаъолияти минбаъдаи касбии худро дар қораи Аврупо идома медиҳад, хабар доданд ба АМИТ «Ховар» дар дастаи «Истиқлол».

Фирӯз Бозмамадови 23 — сола бо дастаи футзали «Спорт Полудне Лантсут»-и Лаҳистон қарордоди ҳамкорӣ баст. Ҷонибҳо дар бастани  шартномаи яксола ва бо назардошти тамдид намудан барои як соли дигар (яъне 1+1) ба мувофиқа расиданд.

Ёдовар мешавем, ки тими  «Спорт Полудне Лантсут» дар Лигаи дуюми Лаҳистон ҳунарнамоӣ мекунад. Фирӯз Бозмамадов аз марҳилаи дуюми Лигаи дуюми Лаҳистон, ки аз 15-уми январ оғоз мешавад, бозии худро оғоз хоҳад кард.

Инчунин, «Истиқлол»- и Душанбе Рустам Ҳамидовро ба бошгоҳи «Жетысу» (Талдықорғон) ба иҷора равон кард.

Рустам Ҳамидов шарафи намояндаи Суперлигаи Қазоқистонро ба муҳлати шаш моҳ ҳимоят карда, пас аз он ба «Истиқлол» бармегардад.

Ёдовар мешавем, қаблан маълум шуда буд, ки узви дастаи мунтахаби футзали Тоҷикистон ва сарбони дастаи «Соро компания»-и Душанбе Файзалӣ Сардоров низ бо дастаи «Столица»-и Беларус шартномаи ҳамкорӣ имзо кард.

Варзишгар дар нимаи моҳи январ ба ҳайати дасати Беларус мепайвандад.

АКС: ТВ Варзиш