БОЗ ОМАДАНИ КОМЕТАИ «САБЗ» ПАС АЗ 50 ҲАЗОР СОЛ. 1 феврал ситораи думдор аз сайёраи Замин гузаштааст

ДУШАНБЕ, 02.02.2023 /АМИТ «Ховар»/. 1 феврали соли 2023 кометаи С/2022 Е3, ки онро кометаи «сабз» ва ё ситораи думдор ҳам меноманд, дар масофаи наздиктарин ба Замин, ки 37 млн километрро ташкил медиҳад, 10-20 дақиқа дар осмон истода, баъдан гузашта рафтааст. Дар ин хусус ба АМИТ «Ховар» Директори Институти астрофизикаи Академияи илмҳои миллии Тоҷикистон Гулчеҳра Қоҳирова хабар додааст.

Ба иттилои манбаъ, наздикшавии навбатии комета бо Офтобу Замин баъди 50 ҳазор сол рӯй хоҳад дод, агар ӯ бо дигар ҷирми кайҳонӣ барнахӯрад ва пора-пора нашавад.

«Ин ситораи думдорро аз сабаби доштани ранги сабз кометаи «сабз» номидаанд. Молекулаҳои карбондори комета зери таъсири афканишоти ултрабунафши Офтоб хароб шуда, ҳангоми ин раванд шуои сабз ба вуҷуд меояд.

Мушоҳидаҳои комета ҳангоми наздикшавӣ ба Офтобу Замин аллакай дар расадхонаҳои Институти астрофизикаи Академияи илмҳои миллии Тоҷикистон амалӣ шуда истодаанд.

Гулчеҳра Коҳирова гуфт, омӯзиши кометаҳо барои ҳалли масъалаҳои пайдоиши коинот, аз ҷумла пайдоиш ва захираи об дар сайёраи Замин мусоидат менамояд. Фарзияе вуҷуд дорад, ки кометаҳо метавонанд обро ба Замин биоранд.

Мавриди зикр аст, ки кометаи нави C/2022 E3 (ZTF) 2 марти соли 2022 дар расадхонаи Паломари ШМА кашф шудааст ва ба гурӯҳи кометаҳои дароздавр тааллуқ дорад, яъне даври гардиши онҳо дар атрофи Офтоб зиёда аз 200 сол мебошад. Ҳангоми ҳисоби мадор маълум гардид, ки комета бори охир 50 ҳазор сол пеш аз ин дар наздикии Офтобу Замин ҷойгир будааст.

ДАР АКС: Акси кометаи С/2022 Е3, ки дар телескопи расадхонаи астрономии Ҳисори Институти астрофизикаи Академияи илмҳои миллии Тоҷикистон дар шаби 31 январи ба 1 феврали соли 2023 ба навор гирифта шудааст.

София ШОИК,
АМИТ «Ховар»

АКС: Институти астрофизикаи Академияи илмҳои миллии Тоҷикистон