Ҳайати Тоҷикистон дар Конфронси панҷуми Созмони Милали Муттаҳид иштирок кард

Март 9, 2023 17:21

ДУШАНБЕ, 09.03.2023 /АМИТ «Ховар»/. Дар шаҳри Давҳаи Давлати Қатар ҳайати Ҷумҳурии Тоҷикистон бо роҳбарии Вазири рушди иқтисод ва савдои Ҷумҳурии Тоҷикистон Завқӣ Завқизода дар Конфронси панҷуми Созмони Милали Муттаҳид оид ба мамлакатҳои камтараққикарда (LDC) таҳти унвони «Аз иқтидор ба шукуфоӣ» иштирок намуд. Дар ин хусус ба АМИТ «Ховар» дар Вазорати рушди иқтисод ва савдои ҷумҳурӣ хабар доданд.

Дар ҳошияи чорабинии мазкур 8 март Вазири рушди иқтисод ва савдои Ҷумҳурии Тоҷикистон Завқӣ Завқизода бо Директори иҷроияи минтақаҳои озоди иқтисодии Давлати Қатар Шайх Муҳаммад бин Файсал Оли Сонӣ вохӯрӣ намуд.

Зимни мулоқот ҷонибҳо густариши муносибатҳои иқтисодию тиҷоратӣ, бунёди корхонаҳои муштараки саноатӣ, ҷалби сармоя ва ба роҳ мондани робитаҳои дуҷониба байни минтақаҳои озоди иқтисодии Ҷумҳурии Тоҷикистон ва Давлати Қатарро мавриди муҳокима қарор доданд.

Бо мақсади таҳкиму тақвияти ҳамкории иқтисодию тиҷоратӣ ҷонибҳо омодагии худро барои таҳия ва ба имзо расонидани санади ҳамкорӣ байни минтақаҳои озоди иқтисодии Тоҷикистон ва Қатар иброз доштанд.

Инчунин 8 март дар шаҳри Давҳа вохӯрии Вазири рушди иқтисод ва савдои Ҷумҳурии Тоҷикистон Завқӣ Завқизода бо Директори кулли бахши маркетинги ширкати «Диёри Қатар»- доктор Абдуллоҳ Яъқуб ал-Саид баргузор шуд.

Ҷонибҳо фаъолияти ширкати мазкур дар Тоҷикистон, густариш додани ҳамкории мутақобилан судманд ва раванди идомаи татбиқи лоиҳаҳои муштаракро мавриди муҳокима қарор доданд.

Таъкид гардид, ки сармоягузории ширкати «Диёри Қатар» дар татбиқи лоиҳаҳои бахши сохтмон, аз ҷумла бунёди муваффақонаи марҳилаи якуми лоиҳаи «Диёри Душанбе» ифодагари алоқамандии ҷонибҳо ҷиҳати тавсеаи минбаъдаи ҳамкории мутақобилан судманди иқтисодию сармоягузорӣ мебошад.

Бо мақсади густариш додани ҳамкории мутақобилан судманд ва ҷалби сармояи қатарӣ ба иқтисоди миллӣ Завқӣ Завқизода роҳандозии марҳилаи дуюм, сеюм ва чоруми лоиҳаи «Диёри Душанбе»-ро дархост кард.

Дар ҷавоб ба дархости ҳайати Тоҷикистон роҳбарияти ширкати «Диёри Қатар» барои сармоягузории минбаъда дар татбиқи марҳилаи дуюм, сеюм ва чоруми лоиҳаи «Диёри Душанбе» изҳори омодагӣ намуд.

6 март дар шаҳри Давҳаи Давлати Қатар инчунин Вазири рушди иқтисод ва савдои Ҷумҳурии Тоҷикистон Завқӣ Завқизода бо Мудири иҷроияи Созмони сармоягузории Қатар (Qatar Investment Authority) Мансур бин Иброҳим Оли Маҳмуд мулоқот намуд.

Ҷонибҳо зимни мулоқот самтҳои афзалиятноки ҳамкории мутақобилан судманди Тоҷикистон ва Қатарро дар самти сармоягузорӣ ва татбиқи лоиҳаҳои афзалиятноки сармоягузории давлатӣ, ки дар Барномаи сармоягузориҳои давлатӣ барои солҳои 2021-2025 ворид гардидаанд, мавриди муҳокима қарор доданд.

Дар вохӯрӣ ҷонибҳо омодагии худро ҷиҳати густариши ҳамкорӣ ва татбиқи самтҳои гуфташуда баён намуданд.

АКС: Вазорати рушди иқтисод ва савдои Ҷумҳурии Тоҷикистон

Март 9, 2023 17:21

Хабарҳои дигари ин бахш

Дар шаҳри Хоруғ корхонаи истеҳсоли ҳасиб бунёд мегардад
Дар Суғд барои дарёфти грантҳои раиси вилоят озмун баргузор мешавад
ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Дар Эстония Хонаи савдои Тоҷикистон таъсис дода мешавад
Намояндагони Тоҷикистон дар «Аirspace world 2024» дар Женева иштирок намуданд
Ҳангоми истифодаи хабару маводи сомона истинод ба www.khovar.tj ҳатмӣ аст!
Саҳифаҳои расмии АМИТ «Ховар» дар шабакаҳои иҷтимоӣ: facebook.com/niatkhovar, t.me/niatkhovar, youtube.com/@niat_Khovar_tj, instagram.com/niat_khovar/, twitter.com/niatkhovar, Радиои Ховар 101.5 fm, facebook.com/khovarfm/
Роҳбари хоҷагии деҳқонии «Бобои Носир»: «Истифодаи оқилонаи 7,5 гектар замин ва даромад аз он дар баланд гардидани сатҳи зиндагии 5 оила мусоидат намуд»
Деҳқонони ноҳияи Мастчоҳ имсол дар майдони зиёда аз 23 ҳазор гектар кишту парвариши зироати кишоварзиро ба нақша гирифтаанд
Дар шаҳри Хуҷанд Намоишгоҳи X байналмилалии савдо «Суғд-2024» доир мегардад
«РОҲ БА СӮИ ТИЁНШОН». Душанбе охири моҳи май мизбони конфронси байналмилалӣ мегардад
Соли 2023 ба буҷети шаҳри Гулистон аз ҳисоби хизматрасонии сайёҳӣ ва табобатӣ зиёда аз 40 миллион сомонӣ ворид шуд