Бахшида ба Ҷашни байналмилалии Наврӯз дар Кумитаи давлатии идораи замин ва геодезӣ ҳамоиши тантанавӣ баргузор шуд

ДУШАНБЕ, 22.03.2023 /АМИТ «Ховар»/. Бахшида ба Ҷашни байналмилалии Наврӯз дар Кумитаи давлатии идораи замин ва геодезии Ҷумҳурии Тоҷикистон ҳамоиши тантанавӣ  баргузор карда шуд, хабар медиҳад АМИТ «Ховар» бо истинод ба ин кумита.

Дар ҷамъомад изҳор гардид, ки «ҷашни байналмилалии Наврӯз, ки ба муждаи эҳёи табиат ва сабзу хуррам гардидани муҳити зист вобаста аст, дар оғози фасли зебои баҳор бо шукуҳу шаҳомати хосса ва шодиву хурсандии нотакрор таҷлил мегардад. Воқеан, Наврӯз, ки яке аз маҳбубтарин ҷашнҳои таърихӣ ва фарҳангии миллати тоҷик мебошад, ҳамчун рамзи офариниши ҳаёту оғози тозаи зиндагӣ то имрӯз расидааст. Дар ин рӯзи фараҳбахши баҳорӣ оростани дастархони идона бо ҳафтсину ҳафтшин ба ҳукми анъана даромада, бо риояи ин анъанаи неки ниёгон дар Кумитаи давлатӣ ҳамасола ҷашни Наврӯз таҷлил карда мешавад».

Изҳори умед карда шуд, ки Наврӯзи имсола ба мардуми куҳанбунёду соҳибфарҳанги Тоҷикистон, аз ҷумла кормандони Кумитаи давлатии идораи замин ва геодезӣ дар иҷрои нақшаҳои бунёдкориву созандагӣ  низ неруву тавони тоза мебахшад.

Роҳбарияти Кумитаи давлатӣ аз дастурхони идона, ки дар он саҳми бонувони Кумитаи давлатӣ назаррас ва инъикосгари ойини  аҷдодии тоҷикон буд, дидан намуда, ба ҳунари волои кадбонугии занону духтарон баҳои баланд доданд.

АКС: Кумитаи давлатии идораи замин ва геодезии Ҷумҳурии Тоҷикистон