Директори АМИТ «Ховар» бо Сафири Арабистони Саудӣ дар Тоҷикистон мулоқот намуд

ДУШАНБЕ, 01.03.2023 /АМИТ «Ховар»/. Масъалаҳои тақвияти ҳамкорӣ дар самти табодули иттилоот, инъикоси ташаббусҳои ҷаҳонии Президенти Ҷумҳурии Тоҷикистон муҳтарам Эмомалӣ Раҳмон дар масъалаҳои обу иқлим ва рӯйдодҳои муҳиму дастовардҳои назаррас дар расонаҳои давлатии Ҷумҳурии Тоҷикистон ва Шоҳигарии Арабистони Саудӣ имрӯз зимни мулоқоти Директори Агентии миллии иттилоотии Тоҷикистон «Ховар» Субҳиддин Шамсиддинзода бо Сафири Фавқулода ва Мухтори Шоҳигарии Арабистони Саудӣ дар Ҷумҳурии Тоҷикистон Валид ибни Абдураҳмон ар-Рушайдон баррасӣ шуд.

Зимни мулоқот таъкид гардид, ки баҳри фаъол намудани робитаҳои дуҷониба дар самти иттилоърасонӣ ҷонибҳо лоиҳаи Ёддошти тафоҳуми ҳамкорӣ байни АМИТ «Ховар» ва Агентии иттилоотии давлатии Арабистони Саудӣ омода намудаанд, ки имзои он метавонад ба таҳкими муносибатҳо ниҳодҳои иттилотии ҳар ду давлат мусоидат намояд.

Директори Агентӣ талошҳои Сафорати Арабистони Саудиро дар Ҷумҳурии Тоҷикистон ҷиҳати  таҳкими ҳамкорӣ, хусусан дар бахши воситаҳои ахбори омма мусбат арзёбӣ намуд.

Дар навбати худ, Сафири Арабистони Саудӣ нақши хабаргузориҳои иттилоотиро дар таҳкими муносибатҳои дуҷониба муҳим дониста, омодагии намояндагии дипломатиро баҳри мусоидат ба таҳкими робитаҳои иттилоотӣ таъкид кард.

АКС: АМИТ «Ховар»