Қоҳир Расулзода ва Михаил Мишустин дар Конфронси нуҳуми ҳамкории байниминтақавии Тоҷикистону Русия иштирок ва суханронӣ намуданд
ДУШАНБЕ, 02.03.2023 /АМИТ «Ховар»/. Имрӯз Раиси Ҳукумати Федератсияи Русия Михаил Мишустин ва Сарвазири Ҷумҳурии Тоҷикистон Қоҳир Расулзода дар Конфронси нуҳуми ҳамкории байниминтақавӣ «Шарикии тиҷоратӣ ва сармоягузории Русия ва Тоҷикистон» иштирок ва суханронӣ намуданд.
«Дар доираи рӯзномаи конфронси имрӯза 7 ҷаласаи панелӣ оид ба самтҳои гуногуни ҳамкорӣ ва доираи васеи масъалаҳои ҳамгироии дуҷониба, ҳамчунин ҷаласаи Шӯрои соҳибкорони Тоҷикистону Русия баргузор гардид. Ин конфронс дар остонаи рӯйдоди муҳим дар таърихи равобити Тоҷикистону Русия доир мешавад. 20 май мо 30-юмин солгарди имзои созишномаи ҳамкорӣ ва кумаки мутақобиларо таҷлил хоҳем кард», — тазаккур дод Сарвазири Ҷумҳурии Тоҷикистон Қоҳир Расулзода.
Бино ба гуфтаи Сарвазири мамлакат, дар ин давра равобити ду давлат бар заминаи устувори манфиатҳои умумӣ ва арзишҳои дӯстии чандинасра асос ёфтааст.
«Ин собит сохт, ки муносибатҳои Тоҷикистону Русия ҳамеша ба рушду таҳкими мантиафтҳои мутақобилан судманди дарозмуддати амниятӣ ва рушди устувори ду давлат нигаронида шудаанд», — илова кард Қоҳир Расулзода.
Раиси Ҳукумати Федератсияи Русия Михаил Мишустин ба Президенти Ҷумҳурии Тоҷикистон муҳтарам Эмомалӣ Раҳмон ва Сарвазири мамлакат Қоҳир Расулзода барои истиқболи гарму самимии ҳайати Русия ва ташкили чорабинии имрӯза дар сатҳи олӣ изҳори минатдорӣ намуд.
«Конфронс маротибаи нуҳум баргузор мешавад ва дар он беш аз ҳазор нафар ирштирок дорад. Намояндагони 16 вилояти Русия, беш аз 200 ширкат ба Душанбе омаданд. Ин манфиати тарафайнро ба таҳкими ҳамкорӣ дар соҳаҳои гуногун тасдиқ мекунад. Русия ва Тоҷикистонро муносибатҳои устувори шарикии стратегӣ ва иттифоқӣ мепайвандад. Ҳамкории иқтисодию тиҷоратӣ босуръат рушд меёбад. Аз рӯи натиҷаҳои соли гузашта гардиши савдо 18 фоиз афзуда, 1,5 миллиард долларро ташкил дод. Ин нишондиҳандаи рекордӣ дар 20 соли охир аст, аммо, бо вуҷуди ин, ин кофӣ нест», — гуфт Раиси Ҳукумати Федератсияи Русия.
Русия аз ҷиҳати сармоягузорӣ ба иқтисоди Тоҷикистон яке аз ҷойҳои аввалро ишғол менамояд. Ҳаҷми умумии маблағгузорӣ беш аз 1,5 миллиард доллар аст.
«Ширкатҳои Русия дар бахшҳои асосии иқтисодӣ, аз ҷулма сохтмон, энергетика, саноат, коммуникатсия ва хизматрасонии молиявӣ фаъолона кор мекунанд. Мо ҳоло ҳамкориро дар соҳаҳои тандурустӣ, маориф ва сайёҳӣ ба таври ҷиддӣ таҳким мебахшем. Ҳамаи вазирони соҳавии мо, ки ба ин соҳаҳо масъуланд, ба ин чо омадаанд. Ҳамкории саноатӣ дар як қатор соҳаҳо рушд мекунад», — афзуд Михаил Мишустин.
Лайло Тоири
АМИТ «Ховар»
АКС: АМИТ «Ховар»
ТО ШАБАКАҲОИ 5G ИНКИШОФ ДОДАНИ ИНФРАСОХТОРИ РАҚАМӢ. Ҷиҳати пешбурди иқтисоди рақамӣ тақвияти кор дар чанд самти асосӣ таъкид гардид
Сарвари давлат: «То охири соли 2025 пардохтҳои ғайринақдӣ дар соҳаҳои буҷетӣ ва хизматрасониҳои давлатӣ пурра таъмин карда шаванд»
Нақши Паёми Президенти Ҷумҳурии Тоҷикистон ба Маҷлиси Олӣ дар гузаронидани ислоҳоти иқтисодӣ бузург мебошад
РУШДИ ТОҶИКИСТОН ТАВАССУТИ РАҚАМИКУНОНӢ, ЗЕҲНИ СУНЪӢ ВА НИЗОМИ МАОРИФИ ПЕШРАФТА. Бардошт аз Паёми Президенти Ҷумҳурии Тоҷикистон ба Маҷлиси Олӣ
ИСТИҚЛОЛИЯТИ ЭНЕРГЕТИКӢ-ЯКЕ АЗ ҲАДАФҲОИ СТРАТЕГИИ ҲУКУМАТИ ТОҶИКИСТОН. Моҳи майи соли 2027 Тоҷикистон ба истиқлоли комили энергетикӣ ноил мегардад
Эмомалӣ Раҳмон: «Соли 2025 дар вилояти Суғд сохтмони неругоҳи барқи офтобӣ бо иқтидори 200 мегаватт оғоз мегардад»
Дар Тоҷикистон «Стратегияи ҷалби сармоя барои давраи то соли 2040» таҳия мегардад
Истеҳсоли маҳсулоти кишоварзӣ дар Тоҷикистон аз 39 миллиард сомонӣ ба 73 миллиард сомонӣ расонида шуд
Ба ҳама намуд санҷишҳои фаъолияти субъектҳои соҳибкорӣ (ба истиснои санҷишҳои мақомоти андоз) то 1 январи соли 2027 мораторий эълон карда шуд
Президенти Тоҷикистон: «Аз моҳи майи соли 2027 норасоии неруи барқ дар Тоҷикистон пурра бартараф мегардад»
Солҳои 2025-2030 Солҳои рушди иқтисоди рақамӣ ва инноватсия эълон гардиданд
